Almaty soty osy jyldyń jazynda avtobýspen bolǵan jol-kólik oqıǵasy boıynsha aıypty dep tanylǵan Anel Sartaevany túrmege qamaý týraly úkim shyǵardy, dep habarlaıdy “Adyrna” ulttyq portaly QazTAG agenttigine siltep.
«Almaly aýdandyq soty kólik quraldaryn basqarý kezinde jol qozǵalysy erejelerin buzý saldarynan abaısyzda adam ólimine ákep soqqan oqıǵa boıynsha (QK 345-babynyń 3-bóligi) aıyptalýshy S.-ǵa qatysty qylmystyq isti qarady», - dep málimdedi Almaty sotynyń baspasóz qyzmeti.
Aıyptaýǵa sáıkes, Sartaeva «jol ber» belgisin elemeı, jolǵa shyǵyp ketken, sol jerde ol qalalyq avtobýspen soqtyǵysqan. Avtobýs ınerııamen baǵdarshamdy soǵyp, trotýarǵa shyǵyp, dúken ǵımaratyna soǵylǵan. Jolaýshylardyń biri jedel járdem kelgenge deıin qaıtys boldy.
Sot barysynda áıeldiń kishkentaı balasy bar ekeni aıtyldy. Ol óziniń kinásin moıyndap, sottan bas bostandyǵynan aıyrmaýdy suraǵan. Qaza tapqan jolaýshynyń uly sotta aıyptalýshyny keshirip, eshqandaı talap qoımaǵan.
Sot úkimi boıynsha, S. QK 345-babynyń 3-bóligi boıynsha kináli dep tanylyp, 2 jyl 6 aı merzimge bas bostandyǵynan aıyryldy. Sondaı-aq, oǵan kólik júrgizý quqyǵynan 5 jylǵa aıyrý jazasy taǵaıyndaldy. QK 74-babynyń 1-bóligi negizinde úkimdi oryndaý merzimi 3 jylǵa, balasy 3 jas 9 aı bolǵanǵa deıin keıinge qaldyryldy.
Aıta keteıik, Anel Sartaeva Salem Social Media medıakompanııasynyń prodıýseri bolǵan jáne «5:32», «Eskort», «1286» syndy serıaldardyń prodıýseri retinde tanylǵan.
