استانادا 28 قاراشادا ۇجىمدىق قاۋىپسىزدىك شارتى ۇيىمىنىڭ (ۇقشۇ) ءسامميتى ءوتتى. جابىق ەسىك جاعدايىندا وتكەن جيىندا حالىقارالىق جانە ايماقتاعى قاۋىپسىزدىك ماسەلەلەرى كەڭىنەن تالقىلاندى، دەپ حابارلايدى "ادىرنا" ۇلتتىق پورتالى ازاتتىق راديوسىنا سىلتەپ.
سامميتكە قازاقستان پرەزيدەنتى قاسىم-جومارت توقاەۆ، رەسەي پرەزيدەنتى ۆلاديمير پۋتين، بەلارۋس باسشىسى الەكساندر لۋكاشەنكو، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون جانە ۇقشۇ باس حاتشىسى يمانعالي تاسماعامبەتوۆ قاتىستى.
سامميت قارساڭىندا يمانعالي تاسماعامبەتوۆ "ورەشنيك" گيپەردىبىستىق زىمىرانىن قولدانۋ ماسەلەسى مەن ۇقشۇ-نىڭ زاماناۋي قارۋ-جاراقتاردى زەرتتەۋ جۇمىستارى تۋرالى مالىمدەمە جاسادى. ول رەسەيدىڭ جاڭا زىمىران جۇيەسىن سىناقتان وتكىزۋگە ءماجبۇر بولعانىن اتاپ ءوتىپ، حالىقارالىق جاعدايدىڭ ۇيىم جۇمىسىنا تىكەلەي اسەر ەتەتىنىن جەتكىزدى.
سونىمەن قاتار، ۇيىم سامميتىندە امەريكالىق ATACMS زىمىرانى مەن ونىڭ رەسەي اۋماعىنداعى نىسانالارعا شابۋىلى تالقىلانبايتىنى دا بەلگىلى بولدى. باس حاتشى رەسەيدىڭ ۇقشۇ-دان اسكەري كومەك سۇراماعانىن، مۇنداي ءوتىنىشتىڭ تۇسپەگەنىن راستادى.
پرەزيدەنت قاسىم-جومارت توقاەۆ ۇقشۇ-نى جاي عانا اسكەري ارىپتەستىك ەمەس، مۇشە ەلدەردىڭ ەگەمەندىگى مەن اۋماقتىق تۇتاستىعىن قورعاۋعا باعىتتالعان تەڭدەسسىز مەحانيزم دەپ اتادى. ول قازاقستاننىڭ توراعالىعى كەزىندە ۇيىمنىڭ جۇمىسى جۇيەلى تۇردە دامىعانىن، اسكەري جاتتىعۋلار مەن كونسۋلتاتسيالاردىڭ ۇزدىكسىز ۇيىمداستىرىلعانىن اتاپ ءوتتى.
بۇل سامميت ارمەنيانىڭ قاتىسۋىنسىز ءوتتى. ەرەۆان ۇيىمنان شىعۋ مۇمكىندىگىن بىرنەشە رەت كوتەرگەنىمەن، ازىرگە رەسمي تۇردە شەشىم قابىلداماعان.
جيىن بارىسىندا ۇقشۇ ەلدەرىنىڭ قاۋىپسىزدىگىن قامتاماسىز ەتۋ، حالىقارالىق جاعدايدىڭ دامۋ بولاشاعى جانە ۇيىم اياسىنداعى جاڭا مۇمكىندىكتەر تالقىلاندى. قازاقستاننىڭ 2024 جىلعى ۇقشۇ-داعى توراعالىعىنىڭ قورىتىندىلارى جاريالانىپ، الداعى كەزەڭنىڭ جوسپارى بەكىتىلدى.
سامميت سوڭىندا تاراپتار بىرلەسكەن مالىمدەمە قابىلداپ، ءوزارا قولداۋ كورسەتۋگە جانە ۇيىمنىڭ ايماقتاعى تۇراقتىلىقتى قامتاماسىز ەتۋگە قوسقان ۇلەسىن نىعايتۋعا كەلىستى.
