الماتىدا ش. ءۋاليحانوۆ اتىنداعى №12 مامانداندىرىلعان گيمنازيانىڭ 100 جىلدىق مەرەيتويىنا وراي رەسپۋبليكا سارايىندا «عاسىر مەكتەبى» اتتى مەرەكەلىك كونتسەرت پەن تاريحي كورمە ءوتتى. ءىس-شاراعا الماتى اكىمى ەربولات دوساەۆ، قازاقستاننىڭ ءبىلىم ءمينيسترى عاني بەيسەمباەۆ، پەداگوگتار، مەكتەپ تۇلەكتەرى مەن وقۋشىلارى قاتىستى.
قالا باسشىسى قازاقستان پرەزيدەنتى قاسىم-جومارت توقاەۆتىڭ قۇتتىقتاۋ جەدەلحاتىن وقىپ، گيمنازيا ۇجىمىن 100 جىلدىعىمەن قۇتتىقتادى.
«شەجىرەلى ءبىلىم ورداسى كەزىندە الماتى قالاسىنداعى بالالاردى قازاق تىلىندە وقىتقان بىردەن-ءبىر مەكەمە بولدى. شىن مانىندە، وتكەن عاسىرداعى انا ءتىلىمىزدىڭ تاعدىرى وسى مەكتەپتىڭ تاريحىمەن تىعىز بايلانىستى. ونىڭ ۇستازدارى زاماننىڭ قيىندىعىنا قاراماستان، ۇلتتىق پەداگوگيكانىڭ ءداستۇرىن ساقتاپ قالۋعا جانە ەل مۇددەسىنە قىزمەت ەتكەن زيالى قاۋىمنىڭ تۇتاس بۋىنىن تاربيەلەۋگە زور ۇلەس قوستى. گيمنازيانىڭ مىڭداعان تۇلەگى ەلىمىزدى وركەندەتۋ جولىندا تىنىمسىز تەر توكتى. ولاردىڭ اراسىندا حالقىمىزدىڭ ماقتانىشىنا اينالعان ءبىرتۋار تۇلعالارىمىز از ەمەس»، - دەپ ايتىلعان مەملەكەتتىك باسشىسىنىڭ قۇتتىقتاۋ سوزىندە.
№12 مامانداندىرىلعان گيمنازيانىڭ ءجۇز جىلدىق مەرەيتويى «كەشە.بۇگىن.ەرتەڭ» ۇرانىمەن ۇرپاقتار ساباقتاستىعىن اتاپ ءوتتى. مەكتەپ تاريحىنا ارنالعان «عاسىر مەكتەبى» كورمەسى گيمنازيانىڭ قالىپتاسۋ كەزەڭدەرىن عانا ەمەس، سونىمەن قاتار ەلدىڭ ورتا ءبىلىم بەرۋ جۇيەسىنىڭ دامۋىن دا كورسەتەدى.
№12 گيمنازيا قازاق كسر حالىق كوميسسارلارى كەڭەسىنىڭ قاۋلىسىمەن 1924 جىلى 22 قازاندا ايماقتىق تاجىريبەلىك-كورمە مەكتەبى رەتىندە قۇرىلدى. باستاپقىدا ونىڭ تەك ءبىر ساتىسى بولدى – باستاپقى. 1936 جىلى ءدال وسى مەكتەپ رەسپۋبليكاداعى تولىق ورتا ءبىلىم بەرۋ جۇيەسىن باستادى.
12-ءشى گيمنازيا تاريحىنداعى ماڭىزدى كەزەڭ سوتسياليستىك ەڭبەك ەرى، 15 جىل ديرەكتور بولعان قازاقستاننىڭ ەڭبەك سىڭىرگەن مۇعالىمى رافيكا نۇرتازينانىڭ ەسىمىمەن بايلانىستى. ونىڭ باستاماسى بويىنشا مەكتەپتە ورىس ءتىلىن وقىتۋدىڭ عىلىمي-ادىستەمەلىك جۇيەسى جاسالدى.
1972 جىلى مەكتەپ رەسپۋبليكادا ءبىرىنشى بولىپ اعىلشىن ءتىلىن تەرەڭدەتىپ وقىتۋدى ەنگىزدى، بۇل ءۇش ءتىلدى بىلەتىن مامانداردى دايارلاۋعا ىقپال ەتتى.
مەكتەپ 70-تەن استام اكادەميك، 300-دەن استام عىلىم دوكتورى، 500-دەن استام عىلىم كانديداتتارى مەن كوپتەگەن مادەنيەت قايراتكەرلەرىن تاربيەلەدى.
تۇلەكتەر قاتارىندا: كۇلاش بايسەيىتوۆا، ءابىلحان قاستەەۆ، اسقار توقپانوۆ، نۇرعيسا تىلەنديەۆ، سىدىق مۇحامەدجانوۆ، اسەت بەيسەۋوۆ، مانسۇر ساعاتوۆ; مەملەكەت قايراتكەرلەرى قايرات سارىباي، شامشا بەركىمباەۆا، كەنجالى ايمانوۆ، مارات ءاشىم، جانار ايتجانوۆا جانە باسقا دا كوپتەگەن تانىمال تۇلعالار بار.
2007 جىلدان باستاپ №12 مامانداندىرىلعان گيمنازيا الماتىنىڭ ۇزدىك وندىعىنا كىرەدى. 2015, 2017 جانە 2020 جىلدارى گيمنازيا «ۇزدىك مەكتەپ»، «ۇزدىك مەكەمە»، «ۇزدىك پەداگوگيكالىق ۇجىم» ناگرادالارىمەن ماراپاتتالدى. 2022-2023 وقۋ جىلدارىندا گيمنازيا «ۇزدىك مامانداندىرىلعان گيمنازيا» اتاعىنا يە بولدى.
بۇگىنگى تاڭدا گيمنازيا دارىندى بالالاردى قولداۋ جانە دامىتۋ بويىنشا جۇمىستى جالعاستىرۋدا، ولاردىڭ قابىلەتتەرىن اشۋعا ەرەكشە نازار اۋدارىلۋدا.
