ەكس-پرەزيدەنت نۇرسۇلتان نازارباەۆتىڭ وليگارح كۇيەۋ بالاسى تيمۋر قۇلىباەۆ باس پروكۋراتۋرانىڭ اكتيۆتەردى قايتارۋ جونىندەگى كوميتەتىن سوتقا بەردى، دەپ حابارلايدى «ادىرنا» ءتىلشىسى قازتاگ-قا سىلتەمە جاساپ.
«تالاپكەر: «قازاقستان رەسپۋبليكاسى باس پروكۋراتۋراسىنىڭ اكتيۆتەرىن قايتارۋ كوميتەتى» رەسپۋبليكالىق مەملەكەتتىك مەكەمەسى. جاۋاپكەر: قۇلىباەۆ تيمۋر اسقارۇلى»،— دەلىنگەن 18 قاراشادا باستالعان پروتسەستىڭ تاراپتارىنىڭ سيپاتتاماسىندا.
ءىس سۋدياعا بەرىلىپ، اپەللياتسيا ساتىسىندا قارالىپ جاتىر. ازىرگە باسقا اقپاراتتار جاريالانبادى.
ايتا كەتەيىك، بۇعان دەيىن قۇلىباەۆ باس پروكۋراتۋرانىڭ اكتيۆتەردى قايتارۋ جونىندەگى كوميتەتىنىڭ ارەكەتىنە شاعىمدانۋ ءۇشىن بىرنەشە رەت سوتقا جۇگىنگەن بولاتىن. الايدا استانا قالاسىنىڭ ازاماتتىق ىستەر جونىندەگى اۋدانارالىق سوتى ونىڭ ارىزدارىن قايتارىپ تاستاعان.
بۇدان الدىن قارجىلىق مونيتورينگ اگەنتتىگىنىڭ باسشىسىنىڭ ورىنباسارى جەڭىس ەلەمەسوۆ بۇرىنعى پرەزيدەنت نۇرسۇلتان نازارباەۆتىڭ قىزدارى مەن كۇيەۋ بالاسىنا قاتىستى ەشقانداي تەرگەۋ جۇرگىزىلمەيتىنىن ايتقان بولاتىن. جۋىردا بەلگىلى بولعانداي، Joint Resources قارجىلىق ەسەبىنە سايكەس، تيمۋر قۇلىباەۆتىڭ كومپانياسى 39 ميلليارد تەڭگەدەن استام تازا پايدا العان. بۇل كومپانيا ەنەرگەتيكا، تاۋ-كەن جانە مۇناي سالالارىنداعى اكتيۆتەردى باسقارادى.
بيىل تيمۋر قۇلىباەۆتىڭ اتىراۋ وبلىسىنداعى «كاسپي نەفت» كومپانياسىنا 13,6 ملرد تەڭگە ايىپپۇل سالىنعان.
«اق-نىڭ 2021-2022 جىلدارى بۇرعىلاۋ جانە كەن ورنىن پايدالانۋ قىزمەتىندە قۇرالعان 4500 توننادان استام قاۋىپتى قالدىقتارعا جيناقتالۋ ءليميتىن الماعانى انىقتالدى. پروكۋروردىڭ ۇسىنىسىن قاراۋ ناتيجەسى بويىنشا اتىراۋ وبلىستىق سوتىنىڭ سوت القاسىنىڭ 02.07.2024 جىلعى قاۋلىسىمەن «كاسپي نەفت» اق اكىمشىلىك قۇقىق بۇزۋشىلىق تۋرالى كودەكستىڭ 328-بابىمەن اكىمشىلىك جاۋاپكەرشىلىككە تارتىلىپ، 13 684 868 730 تەڭگە ايىپپۇل سالىندى»، - دەپ حابارلانعان سول كەزدەگى اقپاراتتا.
ال ءماجىلىس دەپۋتاتى باقىتجان بازاربەك تە تيمۋر قۇلىباەۆتىڭ كومپانياسى الماتى اكىمدىگىنەن 34 ميلليارد تەڭگە ءوندىرىپ الماق نيەتتە ەكەنىن ايتىپ، دابىل قاققان. دەپۋتاتتىڭ ايتۋىنشا تالاپ ءال-فارابي اتىنداعى قازۇۋ-دىڭ جەرىن قايتارۋ ىسىمەن بايلانىستى بولعان. دەپۋتات ءوز ءوتىنىشىن باس پروكۋراتۋراعا جولداعان.
"سوت شەشىمى بويىنشا بيزنەس ورتالىق سالاتىن جەرىنەن ايىرىلعان تيمۋر قۇلىباەۆتىڭ فيرماسى الماتى اكىمدىگىنە 34 ميلليارد تەڭگە سوماسىندا شوت-فاكتۋرا جاسادى. ەندى سوتتان ۇتىلعاننان كەيىن كومپانيا بيزنەس ورتالىقتىڭ قۇرىلىسىنا سالعان ءوزىنىڭ زاڭسىز ينۆەستيتسيالارىن ءوندىرىپ العىسى كەلەدى. بۇل اكىمدىك زاڭسىز بەرگەن بارلىق جەر ۋچاسكەلەرى جوبالارعا بايلانىستى", – دەگەن ەدى دەپۋتات.
2017 جىلعى 1 تامىزدا ءال-فارابي اتىنداعى قازاق ۇلتتىق ۋنيۆەرسيتەتى الماتى اكىمدىگىنە ءال-فارابي داڭعىلى، 71 مەكەنجايى بويىنشا جەر ۋچاسكەسىنىڭ شەكارالارىن تۇزەتۋ تۋرالى وتىنىشپەن جۇگىنگەن. جالپى قازۇۋ ءوز اۋماعىن ءبىر گەكتارعا – 73,2-دەن 72,1 گەكتارعا دەيىن قىسقارتۋدى جوسپارلاعانى ايتىلادى.
