تۇركى الەمى ەلدەرى ونەر تەرميندەرىنىڭ بىرىڭعاي سوزدىگى مەن ءانۇرانىن جازۋدا جۇمىس جۇرگىزىپ جاتىر، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
بۇل باستامانى انكارا مۋزىكا جانە بەينەلەۋ ونەرى ۋنيۆەرسيتەتىنىڭ رەكتورى، تۇركى مەملەكەتتەرى ونەر ۋنيۆەرسيتەتتەرى وداعىنىڭ توراعاسى، پروفەسسور ەرحان وزدەن كوتەرگەن. الداعى ۋاقىتتا سوزدىك ونەردىڭ بارلىق باعىتتارىن قامتىپ، ءارتۇرلى تۇركى تىلدەرىندەگى ماعىنالارىن ەسكەرە وتىرىپ، تەرميندەر ۇسىنىلادى. بۇل - ەنتسيكلوپەديانىڭ ءبىر ءتۇرى بولماق.
"جوبانىڭ ماقساتى – بارلىق تۇركى ەلدەرى ءۇشىن تۇسىنىكتى ءارى قولجەتىمدى تەرميندەردىڭ بىرىڭعاي بازاسىن قۇرۋ. بۇل ءبىزدىڭ ايماق حالىقتارىنىڭ ءتىلى مەن مادەنيەتىنىڭ بىرلىگىن نىعايتۋعا كومەكتەسەدى", - دەپ اتاپ ءوتتى ەرحان وزدەن.
كەلەسى ماڭىزدى جوبانىڭ ءبىرى - تۇركى مەملەكەتتەرىنىڭ ورتاق ءانۇرانىن جازۋ. پروفەسسور ءانۇراننىڭ ءماتىنى مەن اۋەنى تۇركى حالىقتارىن بىرىكتىرەتىن تاريحتى، داستۇرلەر مەن قۇندىلىقتاردى بەينەلەيتىنىن دە تىلگە تيەك ەتتى.
ء"انۇران بارلىق تۇركى ەلدەرىنىڭ وكىلدەرىنە تۇسىنىكتى تىلدە جازىلادى. ءبىز ونىڭ بىرلىگىمىز بەن ورتاق بولاشاعىمىزدىڭ سيمۆولىنا اينالۋىنا ۇمتىلامىز", — دەدى پروفەسسور وزدەن.
ءانۇران جازۋ بويىنشا جۇمىس جەدەل قارقىنمەن جۇرگىزىلىپ جاتىر.
