تەگەراندا يسلامدىق كيىم ۇلگىسىنىڭ ەنگىزىلۋىنە نارازىلىق رەتىندە كيىمىن شەشكەن ستۋدەنت قىز احۋ ءداريايدىڭ جاعدايى بەلگىلى بولدى، دەپ حابارلايدى "ادىرنا" ۇلتتىق پورتالى.
Amnesty International قۇقىق قورعاۋ ۇيىمى بۇل وقيعاعا قاتىستى پىكىر ءبىلدىرىپ، ستۋدەنتتىڭ ءوز كيىمىن "مىندەتتى تۇردە جابىق كيۋدى تالاپ ەتكەن قاۋىپسىزدىك قىزمەتكەرلەرىنىڭ ارەكەتىنە نارازىلىق رەتىندە" شەشكەنىن مالىمدەدى. ۇيىم ءداريايدى "شۇعىل جانە ەشبىر شارتسىز بوساتۋعا" شاقىرعان بولاتىن.
Daily Mail باسىلىمىنىڭ جازۋىنشا، حالىقارالىق سىننان كەيىن يراننىڭ سوت ورگاندارى 19 قاراشادا ستۋدەنتكە ەشقانداي ايىپ تاعىلماعانىن جانە ونىڭ وتباسىنا قايتارىلعانىن حابارلادى.
"ول اۋرۋحاناعا جەتكىزىلگەننەن كەيىن دەنساۋلىعىندا ماسەلە بار ەكەنى انىقتالىپ، وتباسىنا تاپسىرىلدى. وعان قاتىستى قىلمىستىق ءىس قوزعالماعان", – دەپ مالىمدەدى سوت وكىلى اسگار دجاحانگير.
1979 جىلعى يسلام رەۆوليۋتسياسىنان كەيىن يراندا ايەلدەرگە جابىق كيىنۋ مىندەتتەلگەن. احۋ ءداريايدىڭ نارازىلىق ارەكەتى ەلدەگى رەسمي تۇلعالار تاراپىنان قاتاڭ سىنعا ۇشىرادى.
يراننىڭ عىلىم ءمينيسترى حوسسەين سيماي ستۋدەنتتىڭ ارەكەتىن "ادەپسىز جانە داستۇرگە قايشى" دەپ اتاعانىمەن، ونىڭ ۋنيۆەرسيتەتتەن شىعارىلماعانىن ايتتى. ۋنيۆەرسيتەتتىڭ وكىلى امير ماحدجۋبتىڭ ايتۋىنشا، ستۋدەنتتىڭ پوليتسيا بولىمىندە قاتتى پسيحولوگيالىق قىسىم كورىپ، پسيحيكالىق اۋىتقۋدان زارداپ شەگەتىنى انىقتالعان.
الايدا الەۋمەتتىك جەلى قولدانۋشىلارىنىڭ كەيبىرى ونىڭ ارەكەتى ادەيى ۇيىمداستىرىلعان نارازىلىق بولۋى مۇمكىن ەكەنىن ايتۋدا.
ەسكە سالا كەتەيىك، 2 قاراشا كۇنى تەگەراندا حيدجاب زاڭدارىنا قارسى ەكەنىن كورسەتۋ ءۇشىن ءىش كيىمگە دەيىن شەشىنىپ، نارازىلىق بىلدىرگەن ستۋدەنت قىزدىڭ ۇستالعانى جايلى جازعان ەدىك. ونى قاۋىپسىزدىك قىزمەتكەرلەرى ۇستاپ، كەيىن پسيحياتريالىق اۋرۋحاناعا اپارعان.
بۇل وقيعا يرانداعى ايەلدەرگە قاتىستى زاڭداردى قايتا قاراۋ جانە ولاردىڭ قۇقىقتارىن قورعاۋ ماسەلەلەرىن ودان ءارى كۇشەيتتى.
