«قايسار» كاپيتانى ماقسات بايجانوۆ ملادەنوۆ پەن دوسمامبەتوۆ تۇرعاندا «قايسارعا» ورالمايمىن دەيدى.
وسى جاقىندا عانا اقپارات اعىنىندا «قايسار» فۋتبول كومانداسىنىڭ كاپيتانى كلۋبپەن كەلىسىم-شارتتى ۇزگەنى جايىندا حابارلاما شىقتى. «قايسار» ءوز الاڭىندا «اقتوبەگە» 0:3 جەڭىلىپ، جەرگىلىكتى جانكۇيەر الدىندا جەرگە قارادى. ونىڭ الدىندا عانا «دالا قاسقىرلارى» عاني مۇراتبەۆ اتىنداعى ستاديوندا «جەتىسۋعا» جەڭىلىپ، جانكۇيەر قاۋىم نارازىلىق ايتتى. وسى ناتيجەلەردەن كەيىن باس باپكەر ستويچو ملادەنوۆ پەن كلۋب باسشىسى سەرىك دوسمامبەتوۆتىڭ كىنالىنى تاۋىپ، كاپيتاندى كلۋبتان شىعارۋدى ءجون ساناپتى.
ارينە، ءۇش ويىن قاتارىنان جەڭىلىس تاپقان «قايسار» كومانداسىنىڭ ناتيجەسىنە ءبىرىنشى كەزەكتە باس باپكەر ملادەنوۆ جاۋاپ بەرۋى ءتيىس. الايدا، بولگاريالىق باپكەر باسشىلىقتىڭ الدىن وراپ، قىزمەتىن ساقتاۋ ءۇشىن كوماندادان وزىنە ۇناماعان ويىنشىلاردى كەزەگىمەن كەتىرىپ وتىردى. الدىمەن مارات حايرۋللين، كەيىننەن براتيسلاۆ پۋنوشەۆاتس، سوسىن مىنە، كاپيتان ماقسات بايجانوۆقا دا كەلىپ جەتتى.
ءمان-جايدى ءبىلۋ ءۇشىن ءبىز ماقساتتىڭ وزىنە حابارلاسىپ، ءبىر اۋىز پىكىرىن بىلدىك.
- سوڭعى كەزدەرى كوماندامىز جەڭىلىپ، جانكۇيەر الدىندا ۇياتقا قالىپ ءجۇردى. بىراق، ناتيجەگە ءبىرىنشى كەزەكتە جاۋاپ بەرەتىن ادام – باس باپكەر. الايدا، ستويچو ملادەنوۆ مەنىڭ ۇستىمنەن راپورت جازىپ، «سپورتتىق تالاپتارىن ءتۇسىرىپ جىبەردى» دەپ، باسشىلىققا جەتكىزگەن. باسشىلىقتان سەرىك دوسمامبەتوۆ وعان قول قويىپ، بار كىنانى ماعان جاۋىپ وتىر. سوسىن، «بايقوڭىر» كومانداسىنا اۋىستىرىپ، مەنى پوەزبەن سەمەيگە ءبىرىنشى-ليگا ويىنىنا بارۋىمدى تالاپ ەتتى. مەن ارينە، مۇنداي جاعدايلارعا مۇلدە قارسى بولدىم دا، كلۋبتان «ءوز ەركىممەن» كەتۋدى ءجون سانادىم.
- سوندا كوماندانىڭ ناشار ناتيجەلەرىنە كاپيتان كىنالى مە؟
- بۇل كوماندادا مەنەن باسقا تاعى 3 كاپيتان بار. مەن قانشا كلۋبتا فۋتبول وينادىم، بىراق ءبىر كوماندادا 4 كاپيتان بولۋىن ءبىرىنشى كورۋىم. ۇجىم ىشىندەگى اتموسفەرانىڭ دۇرىس بولماۋى دا وسىدان.
- ماقسات، ءسىز «قايسار» فۋتبول كلۋبىنىڭ تۇلەگىسىز، قانشاما جىلدار وسى كوماندا ءۇشىن تەر توكتىڭىز. جانكۇيەر قاۋىم بايجانوۆ «قايسارعا» كەلىپ سپورتتىق عۇمىرىن اياقتاپ، قوشتاسۋ ماتچىن قىزىوردادا وتكىزەدى دەپ ءجۇر ەدى؟ ەندى قانداي جوسپارىڭىز بار؟
- ءيا، راس ايتاسىز. مەن قازاقستاننىڭ كوپتەگەن كلۋبتارىندا وينادىم. بىراق، وتكەن جىلى ءوزىمنىڭ تۋعان جەرىمنىڭ كومانداسى دەپ «قايسارعا» كەلدىم. بۇل مەنىڭ ءوز ءۇيىم. دەگەنمەن مىندا ماعان جاسالىنىپ وتىرعان قاستاندىقتاردان كەيىن كوڭىلىم قالىپ وتىر. ەندى وسى ماۋسىم اياقتالعان سوڭ وزگە كومانداعا اۋىسامىن.
- كوپتەگەن فۋتبولشىلار ءوزى ويناپ باستاعان كلۋبتارىنا كەلىپ قوشتاسۋ ماتچىن جاساپ جاتادى عوي. ءسىز بالكىم «قايسارعا» قايتىپ كەلەتىن دە شىعارسىز؟
- البەتتە، قايتىپ كەلۋىم مۇمكىن. بىراق، باپكەر ستويچو ملادەنوۆ بولىپ، كلۋبتا سەرىك دوسمامبەتوۆ قىزمەت ەتىپ جاتسا مەن «قايسار» كومانداسىنا مۇلدە كەلمەيمىن. مەن ونداي ادامدارمەن ءبىر كلۋبتا بولعىم كەلمەيدى.
قىزىلوردا فۋتبول مەكتەبىنىڭ تۇلەگى ماقسات بايجانوۆ فۋتبولدان قازاقستاننىڭ ەكى دۇركىن چەمپيونى. ۇلتتىق قۇراما ساپىندا تالاي گولدار سالىپ، ەل ابىرويىن اسقاقتاتتى. ول ورتالىق الاڭدا ويقاستاپ «شاحتەر» كومانداسىمەن بىرگە ەۋروكۋبوك ويىندارىندا جارقىلدادى. ماقسات بايجانوۆتىڭ البانيادا «سكەندەربەۋ» قاقپاسىنا سوققان گولىنان كەيىن قاراعاندىنىڭ «شاحتەرى» قازاق فۋتبولىنىڭ تاريحىندا تۇڭعىش رەت ەۋروپا ليگاسىنىڭ توپتىق كەزەڭىنە وتكەن ەدى. «قايسار» ساپىندا 210 ويىن وتكىزىپ، 26 گول سالسا، جالپى بىرىنشىلىكتە 424 ويىن وتكىزىپ، 44 گولدىڭ اۆتورى اتاندى. وسىنشاما ەڭبەگى سىڭگەن ماقسات بايجانوۆتىڭ «قايسار» كومانداسىنان وسىلايشا قيىن جاعدايدا كەتۋى قالىڭ جانكۇيەردىڭ كوڭىلىنە باتقانى راس. الەۋمەتتىك جەلىدە ءوز پىكىرىن ءبىلدىرىپ، «ماقسات بايجانوۆتى قۇرمەتتەپ، شاپان جاۋىپ شىعارىپ سالا دا المادىق-اۋ» دەپ جازىپ جاتقاندار سانى جەتەرلىك. البەتتە، اندرەي فينونچەنكو «شاحتەر» ءۇشىن، نۇربول جۇماسقاليەۆ «توبىل» ءۇشىن قانداي فۋتبولشى بولسا ماقسات بايجانوۆ تا «قايسار» ءۇشىن سونداي اياقدوپشى ەكەنى داۋسىز. سوندىقتان دا، بۇل جاعدايدىڭ بارلىعى ءبىرىنشى كەزەكتە جەرگىلىكتى فۋتبول كلۋبىنىڭ باسشىلىعىنا سىن ەكەنى انىق. ەرمۇحامەد ماۋلەن
ەرمۇحامەد ماۋلەن
inbusiness.kz
