مارعۇلان سەيسەمباي. رەيدەرلىك شابۋىلدان ەڭ كوپ اقشا جوعالتقان جانە بيزنەستەرىنەن ايىرىلعان اداممىن

225

دوستار،
ساقتىق تانىتۋدى سۇراپ جازعان كەشەگى ۇندەۋىمە قولداۋ ءبىلدىرىپ، پىكىر جازعانداردىڭ سانى وتە كوپ بولدى.

وزدەرىڭىزگە ايرىقشا العىس ايتامىن!

وسىنداي قۋاتتى انتيشابۋىلدان كەيىن مەنىڭ قاسكوي قارسىلاستارىمنىڭ ەڭبەگى ەش بولىپ، جوسپارى بۇزىلدى دەپ ۇمىتتەنەمىن. ەڭ بولماعاندا، ولاردىڭ ويعا العان ءىسىن ماعىناسىز ەتۋ ءۇشىن ءوز پوستىمدى جاريالاپ ۇلگەردىم. ماعان قارسى ازىرلەنىپ جاتقان شابۋىلدىڭ باستى سەبەبى جاقىندا عانا تەلەگرامداعى ارناما جاريالاعان بiرنەشە جازبام بولدى دەپ ويلايمىن.
https://t.me/MargulanSeissembai

ماعان جالا جابۋى مۇمكىن دەگەن قيسىنسىز دالەلدەرىن تابۋعا تىرىسايىن. سونىمەن، مىنا ماسەلەلەرگە قاتىستى مەنىڭ پiكiرلەرiم مەن ناقتى ۇستانىمدارىم:

1. رەيدەرلىك تۋرالى.
بۇل مەنىڭ قاسكويلەرىمنىڭ سۇيىكتى تاقىرىبى. بىردەن ايتايىن، وسى ەلدە ماعان قارسى جاسالعان رەيدەرلىك شابۋىلدىڭ كەسىرىنەن ەڭ كوپ اقشا جوعالتقان جانە بيزنەستەرىنەن ايىرىلعان اداممىن. مەن وسىلايشا «سەمەي كومىردى»، «اليانس بانكتى»، «مەرتۆىي كۋلتۋك» مۇناي كەن ورنىنداعى ۇلەسىمدى، الماتى قالاسىنداعى 18-دەن استام جەر تەلىمىن جوعالتتىم. سوماعا شاققاندا بۇل 6 ملد. اقش دوللارىنان دا كوپ اقشا. سوندىقتان مەن رەيدەرلىك شابۋىلدىڭ كەز كەلگەن تۇرىنە شىداپ وتىرا المايمىن جانە ونىڭ قانداي دا تۇرىنە بولسىن قارسىمىن. رەيدەرلiك شابۋىل دەگەنiمiز ول اكىمشىلىك رەسۋرستار مەن جەمقور سۋديالاردى قولدانا وتىرىپ مۇلىكتى تارتىپ الۋ.

2. اليانس بانكى مەن مەملەكەت/حالىق قارجىسىنىڭ جىمقىرىلۋى تۋرالى.
مەن ەشقاشان مەملەكەتپەن بىرگە بيزنەس جاساعان ەمەسپىن. ءتىپتى اليانس بانكتە دە ۇلتتىق كومپانيالاردىڭ دەپوزيتتەرى بولعان ەمەس. مەنى ۇرلادى دەپ ايىپتاپ، بىراق مۇلدەم دالەلدەي الماعان سومانىڭ مولشەرى 1,1 ملرد. دوللار ەدى. اليانس بانكتەگى مەنiڭ 1,35 ملرد. اقش دوللارى اقشام بولعانىنا قاراماي. سونىمەن قاتار، قارجى جىمقىردى دەگەن كىناسى دالەلدەنگەن جوق، ال مەنىڭ اليانس بانككە سالعان قاراجاتىم اۋديتورلىق ەسەپ ناتيجەلەرى مەن حالىقارالىق سوتتار ارقىلى دالەلدەندى. وعان قوسا، مەنىڭ ارەكەتتەرىم سەبەبىنەن جابىرلەنگەن بىردە-ءبىر ادام جوق، ال بانكتى تارتىپ العانداردىڭ كەسىرىنەن ءجابىر كورگەندەردىڭ سانى وتە كوپ.

3. پارا جانە قانداي دا كەلىسىمدەر تۋرالى.
مەن پارا بەرىپ بيزنەس جاسايتىنداردى بيزنەسمەن ەمەس، ءوز كۇشىمەن اقشا تابا المايتىن مۇگەدەكتەر دەپ سانايمىن. مەن بيزنەس جاساۋ ءۇشىن نەمەسە قانداي دا ءبىر تەندەردى ۇتۋ ءۇشىن ەشقاشان ەشكىمگە پارا بەرگەن ەمەسپىن.

4. وففشورلار مەن شەتەل بانكتەرىندەگى ەسەپشوتتار تۋرالى.
بۇرىن مەنىڭ وففشورلىق كومپانيالار مەن شەتەلدىك بانكتەردە ەسەپشوتتارىم بولاتىن. قاراجات كوزدەرى زاڭدى تۇردە كورسەتىلسە، بۇل زاڭسىز بولىپ ەسەپتەلمەيدى. مەن ەشقاشان مۇنداي ادىسپەن سالىق تولەۋدەن جالتارعان ەمەسپىن. سوندىقتان، ەسەپشوتتار مەن وففشورلىق كومپانيالار تۋرالى قانداي دا ءبىر دەرەكتەر «شىعا قالسا»، نە ءۇشىن مۇنداي كومپانيانىڭ اشىلعانىنا جانە قاراجاتتىڭ قايدان پايدا بولعانىنا قاتىستى ءاربىر جاعدايعا ناقتى جاۋاپ بەرە الامىن.

5. مەنiڭ كاپيتالدارىمنىڭ قاينارى جونiندە.
مەن ءوزىمنىڭ ءاربىر ميلليونىمنىڭ قايدان پايدا بولعانىنا جاۋاپ بەرە الامىن. مەندە ەشقاشان ءبىر تيىن دا ەڭبەكسىز تابىلعان اقشا بولعان ەمەس.

6. مەنىڭ بيلىككە ساتىلعانىم تۋرالى.
بۇل ارگۋمەنت مەن ءۇشىن ەڭ كۇلكىلى كورىنەدi. بىراق مەن بۇعان جاۋاپ بەرەمىن، ويتكەنى بيلىككە دەگەن رەنىشى بار كوپتەگەن ادامدار مەنى سوگەدى ءارى بۇل ماعان تاڭبا بوپ جابىسادى. وسىنشاما قارجى تاپقاننان كەيىن جانە ونىڭ ءبارىن تارتىپ العاننان كەيىن مەنى ساتىپ الۋعا بولادى دەيسىزدەر مە؟ مەن ميللياردەر بولدىم، بايلىقتىڭ شىڭىنا شىقتىم، اقشا مەن ءۇشىن ءوزىم قالاعانداي ءومىر سۇرۋگە ارنالعان قۇرال، باسقا تۇك تە ەمەس. مەن قازىر تەك ءبىر-اق نارسە قالايمىن. ول – دۇرىس ەلدە ار-ۇجداننان اتتاماي ءومىر ءسۇرۋ. ماعان بيلىك كەرەك ەمەس. ماعان تانىمالدىلىق تا قاجەت ەمەس. ماعان تەك جاقسى ءارى وركەنيەتتi ەلدە ءومىر ءسۇرۋ عانا كەرەك.
7. مەنىڭ ساياسي امبيتسيام تۋرالى.
جوعارىدا جازعانىمداي، ماعان بيلىكتىڭ كەرەگى جوق. ماعان تەك جاقسى، وركەنيەتتى قازاقستان عانا كەرەك. ول ءۇشىن مەن، قوعام قايراتكەرى ءارى بەلسەندى ازامات رەتىندە، ماعان قاتىستى نارسەنىڭ ءبارىن جاسايمىن، بىراق تەك زاڭ اياسىندا عانا. ءدۇمپۋ نە توڭكەرىستى باسقارۋ مەن ءۇشىن مۇمكىن ەمەس نارسە. مەن ءبۇلدىرۋشى، بۇزۋشى ادامنان گورى ەپتى، ءتيىمدى ءارى راتسيونالدى جاسامپازبىن.
كەيىنگى سالدارى قانداي بولاتىنىن بىلمەيتىندىكتەن، مەن «بولشەۆيكتەرشە» توڭكەرىس جاساۋدى قابىلدامايمىن. مەن ءۇشىن، قالاي بولعاندا دا، ەلىمىزدىڭ تاۋەلسىزدىگى ءبىرىنشى ورىندا!

ەندى باسقا دا ماسەلەلەرگە قاتىستى ۇستانىمدارىمدى ايتايىن.

1. مەن جەردى ساتۋعا تۇبەگەيلى قارسىمىن. جەمقورلىق جايلاعان وسىنداي جاعدايدا، تابيعي قازبا بايلىقتارىمىزدىڭ ءبارىن دەرلىك شەتەلدىكتەرگە بەرىپ قويعانىمىز سەكىلدى، جەرىمىزدەن دە ايىرىلىپ قالامىز.
2. ءبىزدىڭ جەرىمىزدە قىتايلىق كاسىپورىنداردىڭ سالىنۋىنا قارسىمىن. جەمقورلىقتى جويىڭىزدار، جەكە مەنشىكتى قۇرمەتتەڭىزدەر، سوتتاردىڭ تاۋەلسىزدىگىن قامتاماسىز ەتىڭىزدەر. قالعانىنىڭ ءبارىن كاسىپكەرلەردىڭ وزدەرى-اق تىندىرادى. بىزدە وتە تالانتتى جانە قارىم-قابىلەتى كۇشتى ادامدار كوپ. ولارعا تەك سەنىم ارتۋ كەرەك. سوندا سىرتتان ينۆەستيتسيا ىزدەۋدىڭ قاجەتى بولماي قالادى.
3. مەن شىنايى قازاق تاريحىن قالپىنا كەلتىرۋ كەرەك دەگەن ويدامىن. تاريحي ادىلەتتىلىك ورناۋى ءتيىس. بولشەۆيكتەر تاراپىنان جاسالعان بارلىق ادىلەتسىزدىكتەرگە ءتيىستى باعا بەرىلۋى كەرەك.
4. مەن قازاقستاننىڭ كوپۇلتتى بولۋىن قولدايمىن. كوپۇلتتىلىق ءبىزدىڭ مەملەكەتتىلىگىمىزدى نىعايتىپ، بەكەمدەي تۇسەدى دەگەن ويدامىن. سونىمەن بىرگە، ءبىزدىڭ ءداستۇرىمىز بەن مادەنيەتىمىزگە وزگەشە رەڭك بەرەدى. ەكونوميكامىزعا ايرىقشا سەپتىگىن تيگىزەدى. مۇنى مەن كۇندەلىكتى ومىرىمدە دە، بارلىق كاسىپورىندارىمدا دا كورىپ ءجۇرمىن.
5. مەن قازاق ءتىلىنىڭ جان-جاقتى دامۋىن قولدايمىن. بۇل تاريحي ادىلدىكتىڭ ورناۋى ءۇشىن وتە ماڭىزى ءارى نەگىزگى ۇلت – قازاقتاردىڭ تىلەگى. سونداي-اق، بولاشاقتا ءاربىر قازاق ءۇش ءتىلدى ءبىلۋى كەرەك دەپ سانايمىن. سونىمەن قاتار، بولاشاعىن قازاقستانمەن بايلانىستىراتىن كەز كەلگەن وزگە ۇلتتىڭ وكىلى قازاق ءتىلىن مىندەتتى تۇردە ۇيرەنۋگە ءتيىس.
6. ەرەكشە ايتا كەتەتىن جايت، مەنىڭ ورىس حالقىنا دەگەن كوزقاراسىم وتە جاقسى، بىراق رەسەي بيلىگىنە وڭ قاباق تانىتپايمىن. قازىرگى ورىس بيلىگى، وكىنىشكە قاراي، افريكادا دا، رەسەيدە دە بىردەي بولاتىن ديكتاتۋرادان باسقا ەشتەڭە ەمەس. بىراق سولاي بولسا دا، بۇل ءبىزدىڭ ەڭ ۇلكەن ءارى تاريحي كورشىمىز بولعاندىقتان، قاي كەزدە دە دوس بولۋىمىز كەرەك.
7. قىتايلىقتارمەن قارىم-قاتىناسىمىزدى تىم تەرەڭدەتە بەرمەي، ولارمەن تەك ساۋدا بايلانىستارىن عانا ورناتۋىمىز كەرەك. كەز كەلگەن تەرەڭ قاتىناس ولاردىڭ پايداسىنا شەشىلەدى. ولار كۇشتى، قارجىسى دا كوپ، وزدەرى دە الدەقايدا كوپ.

ازىرگە وسىلار. كوپتەگەن ماڭىزدى ماسەلەلەرگە دەگەن ۇستانىمدارىمدى ءبىرشاما اشىپ ايتىپ، ولاردىڭ بۇرمالاۋلارى مەن قيسىنسىز جالا جابۋىنا از مۇمكىندىك قالدىردىم دەگەن ويدامىن.

فەيسبۋك پاراقشاسىنان

پىكىرلەر