قازاقستان 2025 جىلدىڭ ءساۋىر ايىنا دەيىن سىرداريا وزەنى ارقىلى شامامەن 11 ملرد تەكشە مەتر سۋ الادى. بۇل تۋرالى بۇگىن، 11 قاراشادا سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«ورتالىق ازيا ەلدەرىنىڭ وكىلدەرىمەن كەلىسسوزدەر بارىسىندا وسىنداي كەلىسىمگە قول جەتكىزىلىپ وتىر. سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ەلىمىزدىڭ اتىنان تۇركىمەنستاننىڭ اشحاباد قالاسىندا وتكەن مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ وتىرىسىنا قاتىستى. باس قوسۋعا وزبەكستاننىڭ، تاجىكستاننىڭ جانە تۇركىمەنستاننىڭ سۋ شارۋاشىلىعى باسشىلارى كەلدى. قىرعىزستان اتالمىش كوميسسياعا باقىلاۋشى رەتىندە قاتىسىپ وتىر»،—دەلىنگەن حابارلامادا.
ناتيجەسىندە 1 ساۋىرگە دەيىن ەلىمىزدەگى شاردارا سۋ قويماسىنا 11 ملرد تەكشە مەتر سۋ كەلەدى دەپ كۇتىلۋدە. بۇل 2025 جىلعى سۋارۋ ماۋسىمىندا ەلىمىزدىڭ وڭتۇستىك ايماقتارىنا قاجەت سۋ كولەمىن جيناقتاۋعا مۇمكىندىك بەرەدى.
ايتا كەتۋ كەرەك، وتىرىسقا قاتىسۋشىلار سىرداريا جانە امۋداريا وزەندەرى باسسەيندەرىندەگى سۋ قويمالارىنىڭ بولجامدى جۇمىس كەستەسىن بەكىتتى، سونىمەن قاتار 2024-2025 جىلداردىڭ كۇزگى-قىسقى كەزەڭىنە ورتالىق ازيا ەلدەرىنە سۋ بەرۋ كولەمىن ايقىندادى.
«بيىل كەلىسسوزدەر مەن بىرلەسكەن جۇمىستىڭ ناتيجەسىندە ءبىز سىرداريا وزەنى باسسەينىندە سۋدى ءتيىمدى بولۋگە قول جەتكىزدىك. سونداي-اق، 86-شى وتىرىس قورىتىندىسى بويىنشا بىرلەسىپ اتقارىلعان جۇمىسقا وڭ باعامدى بەرگىم كەلەدى. اتاپ ايتقاندا، قىرعىزستانمەن سۋ-ەنەرگەتيكالىق ىنتىماقتاستىق تۋرالى كەلىسىمدەر جۇزەگە اسىرىلدى، سونداي-اق بيىل سۋارۋ ماۋسىمىندا «باحري-توچيك» سۋ قويماسىنىڭ جۇمىس كەستەسىن ۇيلەستىرۋ بويىنشا ءىس-شارالار قابىلداندى»،– دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
