Qazaqstan 2025 jyldyń sáýir aıyna deıin Syrdarııa ózeni arqyly shamamen 11 mlrd tekshe metr sý alady. Bul týraly búgin, 11 qarashada Sý resýrstary jáne ırrıgaııa mınıstrliginiń baspasóz qyzmeti aıtty, dep habarlaıdy «Adyrna» tilshisi.
«Ortalyq Azııa elderiniń ókilderimen kelissózder barysynda osyndaı kelisimge qol jetkizilip otyr. Sý resýrstary jáne ırrıgaııa mınıstri Nurjan Nurjigitov elimizdiń atynan Túrkimenstannyń Ashhabad qalasynda ótken Memleketaralyq sý sharýashylyǵyn úılestirý komıssııasynyń otyrysyna qatysty. Bas qosýǵa Ózbekstannyń, Tájikstannyń jáne Túrkimenstannyń sý sharýashylyǵy basshylary keldi. Qyrǵyzstan atalmysh komıssııaǵa baqylaýshy retinde qatysyp otyr»,—delingen habarlamada.
Nátıjesinde 1 sáýirge deıin elimizdegi Shardara sý qoımasyna 11 mlrd tekshe metr sý keledi dep kútilýde. Bul 2025 jylǵy sýarý maýsymynda elimizdiń ońtústik aımaqtaryna qajet sý kólemin jınaqtaýǵa múmkindik beredi.
Aıta ketý kerek, otyrysqa qatysýshylar Syrdarııa jáne Amýdarııa ózenderi basseınderindegi sý qoımalarynyń boljamdy jumys kestesin bekitti, sonymen qatar 2024-2025 jyldardyń kúzgi-qysqy kezeńine Ortalyq Azııa elderine sý berý kólemin aıqyndady.
«Bıyl kelissózder men birlesken jumystyń nátıjesinde biz Syrdarııa ózeni basseıninde sýdy tıimdi bólýge qol jetkizdik. Sondaı-aq, 86-shy otyrys qorytyndysy boıynsha birlesip atqarylǵan jumysqa oń baǵamdy bergim keledi. Atap aıtqanda, Qyrǵyzstanmen sý-energetıkalyq yntymaqtastyq týraly kelisimder júzege asyryldy, sondaı-aq bıyl sýarý maýsymynda «Bahrı-Tochık» sý qoımasynyń jumys kestesin úılestirý boıynsha is-sharalar qabyldandy»,– dedi Sý resýrstary jáne ırrıgaııa mınıstri Nurjan Nurjigitov.
