پاۆلوداردا داۋىل سالدارىنان لەنيننىڭ ەسكەرتكىشى قۇلاپ، ۇساق بولشەكتەرگە ءبولىنىپ كەتتى، دەپ حابارلايدى “ادىرنا” ۇلتتىق پورتالى.
PavlodarNews سايتىنىڭ مالىمەتىنشە، «بالالىق شاق» ساياباعىندا 7 قاراشادان 8 قاراشاعا قاراعان ءتۇنى قاتتى داۋىل سالدارىنان شىرشا قۇلاپ، لەنين ەسكەرتكىشىن قيراتقان. ەندى ول قالپىنا كەلتىرۋگە جارامايدى.
لەنيننىڭ بۇل ەسكەرتكىشى 1928 جىلى 1 شىلدەدە بۇرىن كازاك الاڭى دەپ اتالعان جەردە اشىلعان ەدى.
“ەسكەرتكىشتىڭ تۇرعانىنا 100 جىل تاقاپ قالعان بولاتىن. ونىڭ قاسىندا 67 جىل وسكەن اعاش بۇرىندارى وتىرعىزىلعان ءتورت شىرشادان امان قالعان جالعىز شىرشا بولاتىن. قازىرگى ۋاقىتتا قۇلاعان اعاشتى كەسۋ جانە تازالاۋ جۇمىستارى اياقتالدى. كەلەسى اپتادا تۇعىر بولشەكتەلەدى. 1928 جىلى اراب ارپىمەن جازىلعان بىرەگەي جازۋى بار تاقتا ساقتالادى. الداعى ۋاقىتتا جۇرتشىلىقپەن جان-جاقتى تالقىلانىپ، بۇل جەردە نە ورنالاساتىنى تۋرالى شەشىم قابىلداناتىن بولادى”،– دەدى قالا اكىمىنىڭ ورىنباسارى سۆەتلانا گلادىشەۆا.
ونىڭ ايتۋىنشا، سوڭعى رەت ەسكەرتكىشتى قايتا قۇرۋ 2022 جىلى جەكە ينۆەستورلاردىڭ ەسەبىنەن جۇرگىزىلدى.
“قازىردىڭ وزىندە، ءبىز سول جەردە ىرگەتاستىڭ جويىلعانىن كوردىك. ياعني نەگىزگى مەتالل كورپۋستىڭ بىرنەشە اقاۋلارى بولعان. سوندىقتان قۇرىلىم اۋا رايىنا توتەپ بەرە الماي، مۇنداي جاعداي ورىن الدى”،– دەدى سۆەتلانا گلادىشەۆا.
كونە ەسكەرتكىش مادەني مۇرالار مەن ەسكەرتكىشتەر تىزىلىمىندە كورسەتىلمەگەن.
1917 جىلى 7 قاراشادا ۆلاديمير لەنين باستاعان بولشەۆيكتەردىڭ اسكەري-رەۆوليۋتسيالىق كوميتەتى ۋاقىتشا ۇكىمەتتى قۇلاتىپ، رەسەي بيلىگىن قولعا الدى. رەسەي تاريحىنداعى، ادامزات تاريحىنداعى قاندى رەپرەسسيا، ساياسي قۋعىن-سۇرگىن جانە بىرنەشە اشارشىلىعىمەن جانە ميلليونداعان ادامداردىڭ شىعىنىمەن ەستە قالعان كوممۋنيستىك پارتيا باستاتقان بولشەۆيكتەر بيلىگى 74 جىلدان سوڭ، 1991 جىلى جەلتوقساندا كۇيرەپ تىندى. كومپارتيا ەكونوميكانىڭ قۇلدىراۋى سالدارىنان ءوز-وزىنەن ىدىرادى. سودان كەيىن لەنين ەسكەرتكىشتەرى قالالاردىڭ ورتالىق الاڭدارىنان الىنىپ تاستالدى.
