جاڭاوزەن نەگە كوتەرىلدى؟

1487

كەشەدەن بەرى تەڭىزدە تاعى دا داۋىل كوتەرىلدى. جەرگىلىكتى حالىق ەكى تالاپپەن كوشەگە شىقتى. ءبىرىنشىسى قىتايدىڭ 55 زاۋىتىنىڭ قازاق جەرىنە كىرۋىنە تيىم سالۋ. ەكىنشى تالاپ جەردى ساتپايمىز. وسى ەكى تالاپپەن جاڭاوزەن كەشەدەن شەرۋلەتىپ جاتىر.  حالىق قىركۇيەكتىڭ 11-12 كۇندەرىنە جوسپارلانعان ەل پرەزيدەنتى قاسىم-جومارت توقاەۆتىڭ قىتايعا ساپارىنان باس تارتۋعا شاقىردى.

كەشە شەرۋگە شىققان جاڭاوزەندىكتەر بۇگىن تاعى دا جەرگىلىكتى اكىمدىك الدىنا جينالدى. قالا اكىمى ادىلبەك داۋىلباەۆ پەن پروكۋراتۋرا، پوليتسيا وكىلدەرى تۇرعىندارعا شەرۋدى زاڭ اياسىندا وتكىزۋدى ۇسىندى. جاڭاوزەنگە بارعان ماڭعىستاۋ وبلىسىنىڭ اكىمى سەرىكباي تۇرىموۆ قازاقستاندا قىتاي زاۋىتتارى سالىنبايتىنىن ايتقانىمەن جەرگىلىكتى تۇرعىندار اكىمدى تىڭدامادى.

بىزگە حابارلاسىپ، اتى-ءجونىن ايتۋدان باس تارتقان جاڭاوزەندىك تۇرعىننىڭ ايتۋىنشا، جاڭاوزەندەگى ءبىر كومپانيانى قىتايلار ساتىپ الىپتى. جاڭاوزەندە قىتايلار بار ما؟ دەگەن ساۋالىمىزعا "بىزدە ازىرگە قىتايلار جوق. ولار بۇگىن كەلمەسە دە ەرتەڭ كەلەدى. سول ءۇشىن جۇرت كوشەگە شىقتى" دەپ جاۋاپ بەردى.

بۇگىن نۇر-سۇلتان، شىمكەنت پەن اقتوبە قالالارىندا  جاڭاوزەندىكتەردى  قولداۋ اكتسيالارى ءوتتى. شىمكەنتتە 20 شاقتى ادام ماڭعىستاۋلىقتارمەن بىرگە ەكەنىن ايتىپ، ورداباسى الاڭىنا شىقتى. سونداي-اق شىمكەنتتىكتەر بيلىكتى قىتايدان الىنعان كرەديت پەن ەكىجاقتى جاسالعان كەلىسىم جايلى اقپاراتتى جاريالاۋعا شاقىردى.

"ازاتتىقتىڭ" حابارلاۋىنشا بۇگىن نۇر-سۇلتاندا دا جاڭاوزەندىكتەردى قولداۋ اكتسياسى ءوتتى. جەرگىلىكتى تۇرعىندار اننا شوكەەۆا، ءاليا جاكۋپوۆا مەن قالدىحان قوزىباەۆا اقورداعا باراتىن جول بويىنا "قىتاي ەكسپانسياسىنا جول جوق", ء"بىز جاڭاوزەنمەن بىرگەمىز", "مەن جاڭاوزەندىكتەردى قولدايمىن! ال سەن شە؟" دەگەن جازۋى بار پلاكاتتار ۇستاپ شىقتى. ولاردى سول ماڭنان ءوتىپ بارا جاتقان كەي ادامدار دا قولداپ، پىكىرلەرىن ايتىپ جاتتى.

- جاڭاوزەن ارقاشان قازاقستاننىڭ جان جاراسى بولىپ قالادى. سوندىقتان دا ءبىز ولاردىڭ بەيبىت نارازىلىعىنا قولداۋ ءبىلدىرىپ شىعىپ تۇرمىز. 2011 جىلعى جەلتوقساندا بولعان جاعدايدى ەشكىم دە قايتالاعىسى كەلمەيدى دەپ ويلايمىن، - دەدى ءاليا جاكۋپوۆا 2011 جىلى جەلتوقساندا بىرنەشە ايعا سوزىلعان مۇنايشىلار ەرەۋىلىنە پوليتسيانىڭ وق اتىپ، قانتوگىسكە ۇلاسقانىن ەسكە الىپ دەپ حابارلايدى "ازاتتىق" راديوسى.

ەلباسى نۇرسۇلتان نازارباەۆ  قىتاي باسىلىمدارىنا بەرگەن  سۇحباتىندا قىتايدىڭ قازاقستانداعى 55 ءىرى جوباسىنىڭ 15-ءى جۇمىسىن باستاعانىن، 11 نىسان بيىل پايدالانۋعا بەرىلەتىنىن ايتقان بولاتىن.

"ادىرنا" ۇلتتىق پورتالى

 

پىكىرلەر