بۇگىن بىشكەكتە وتكەن تۇركى مەملەكەتتەرى ۇيىمىنىڭ XI ءسامميتى اياقتالدى، دەپ حابارلايدى "ادىرنا" ۇلتتىق پورتالى.
سامميت «تۇركى الەمىن نىعايتۋ: ەكونوميكالىق ينتەگراتسيا، تۇراقتى دامۋ، تسيفرلىق بولاشاق جانە بارشاعا قاۋىپسىزدىك» تاقىرىبى اياسىندا بولدى.
قىرعىزستان پرەزيدەنتىنىڭ رەزيدەنتسياسىنا العاشقى بولىپ ازەربايجان، تۇركيا، وزبەكستان، قازاقستاننىڭ كوشباسشىلارى جانە ۆەنگريا پرەمەر-ءمينيسترى كەلدى. قىرعىزستان پرەزيدەنتى «ىنتىماك-وردو» عيماراتىنىڭ كىرەبەرىسىندە تۇركى تىلدەس مەملەكەتتەردىڭ ۇيىمى مۇشەلەرىن جەكە-جەكە قارسى الدى. ءىس-شارا قىرعىزستان پرەزيدەنتى سادىر جاپاروۆتىڭ توراعالىعىمەن ءوتتى. سامميت بارىسىندا بىشكەككە تۇركىتىلدەس مەملەكەتتەر ۇيىمىنىڭ تسيفرلىق استاناسى مارتەبەسى بەرىلدى. بۇل تۋرالى سادىر جاپاروۆ ايتتى.
قازاقستان پرەزيدەنتى قاسىم-جومارت توقاەۆ ۇيىم اياسىندا ساۋدا-ەكونوميكالىق، ەنەرگەتيكالىق، قارجىلىق جانە ينۆەستيتسيالىق سالالاردا بايلانىستار ورناتىلعانىن مالىمدەدى.
«تۇركى ينۆەستيتسيالىق قورىنىڭ ءتيىمدى قىزمەتى تۇركى ەلدەرىنىڭ ينتەگراتسياسىن تەرەڭدەتۋگە ىقپال ەتەتىن ناقتى قادام بولدى دەپ ەسەپتەيمىن. سوڭعى 10 جىلدا تتۇ مۇشەلەرى اراسىنداعى ەكونوميكالىق بايلانىستار ايتارلىقتاي نىعايدى. 2024 جىلى ءوزارا تاۋار اينالىمى 45 ميلليارد اقش دوللارىنان استى. بۇل كورسەتكىشتى ارتتىرۋعا بارلىق مۇمكىندىكتەرىمىز بار»، — دەدى قاسىم-جومارت توقاەۆ.
ونىڭ ايتۋىنشا، تۇركى مەملەكەتتەرى ۇيىمى اياسىندا باسىم مىندەت — كولىك-لوگيستيكالىق بايلانىستاردى نىعايتۋ.
تۇركى مەملەكەتتەرى ۇيىمىنىڭ ءسامميتىنىڭ قورىتىندىسى بويىنشا سەگىز قۇجاتقا قول قويىلدى:
تۇركى مەملەكەتتەرى ۇيىمىنىڭ 11-ءسامميتىنىڭ دەكلاراتسياسى;
«تۇركى الەمىنىڭ جاسىل كورىنىسى: تۇراقتى بولاشاق بىرلىگى» شەشىمى;
بىشكەكتى 2025 جىلعا تۇركى مەملەكەتتەرى ۇيىمىنىڭ تسيفرلىق استاناسى دەپ جاريالاۋ تۋرالى شەشىم;
ۆەنگريا پرەمەر-ءمينيسترى ۆيكتور ورباندى «تۇركى الەمىنىڭ جوعارى وردەنىمەن» ماراپاتتاۋ تۋرالى شەشىم;
تۇركى الەمىنىڭ حارتياسىن قابىلداۋ تۋرالى شەشىم;
تۇركى مەملەكەتتەرى ۇيىمى باس حاتشىسىنىڭ ورىنباسارلارىن تاعايىنداۋ تۋرالى شەشىم;
تۇركى مەملەكەتتەرى ۇيىمىنىڭ تۇراقتى وكىلدەرى تۋرالى ەرەجەنى بەكىتۋ تۋرالى شەشىم;
تۇركى ىنتىماقتاستىق ۇيىمدارىنىڭ تۋلارىن بەكىتۋ تۋرالى شەشىم.
