قاراعاندى وبلىسىندا بيىل 1 ملن 300 مىڭ توننا استىق ءونىم جينالدى. بۇل رەكوردتىق كورسەتكىش. ال جالپى اۋىل شارۋاشىلىعى ونىمدەرىن ءوندىرۋ بويىنشا قاراعاندى وبلىسى ەلىمىزدە جەتىنشى ورىندا تۇر. جەرگىلىكتى فەرمەرلەر تەك وبلىستىڭ عانا ەمەس، استانانىڭ دا ازىق-تۇلىك قاۋىپسىزدىگىن قامتاماسىز ەتەدى.
اگرارلىق سالانىڭ الەۋەتىن ودان ءارى قالاي ارتتىرا تۇسەتىنىن وبلىس اكىمى ەرماعانبەت بولەكپاەۆ ورتالىق كوممۋنيكاتسيالار قىزمەتىندە وتكەن بريفينگتە ايتتى.
– اگرارلىق ونەركاسىپ كەشەنىنە جىل سوڭىنا دەيىن 23 ملرد تەڭگەدەن استام سوماعا 30 ينۆەستيتسيالىق جوبا ىسكە اسىرىلادى. اۋىلداردى دامىتۋ اياسىندا "اۋىل اماناتى"جوباسىن ەرەكشە اتاپ وتكەن ءجون. مەملەكەت باسشىسى حالىقتىڭ ءال-اۋقاتىن ارتتىرۋ جونىندە ناقتى تاپسىرمالار بەرىپ، وسى باعدارلامانىڭ تيىمدىلىگىن اتاپ ءوتتى. ءبىزدىڭ وبلىستا "اۋىل اماناتى" جوباسى بويىنشا 483 شاعىن نەسيەگە 4,4 ملرد تەڭگە ءبولىندى. ونىڭ جارتىسى مال شارۋاشىلىعىن دامىتۋعا، قالعان بولىگى اۋىل تۇرعىندارىنىڭ بيزنەس – جوبالارىنا باعىتتالعان. ناتيجەسىندە اۋىلدىق جەرلەردە 816 جۇمىس ورنى اشىلىپ، 60-تان استام اۋىل شارۋاشىلىعى وندىرىستىك كووپەراتيۆتەرى قۇرىلدى، – دەدى وبلىس اكىمى.
ول اۋىلشارۋاشىلىق كووپەراتسياسىن قولداۋدىڭ ءساتتى مىسالدارىن كەلتىردى. اكتوگاي اۋدانىنداعى «Saq NS» سك نەمىس تەحنولوگياسى بويىنشا بيە ءسۇتىن وندىرەتىن تسەح اشىپ، اي سايىن 30 توننا قىمىز وندىرەدى. قارقارالين اۋدانىنداعى «ءمادي-اگرو 7» سك ەت ءوندىرىسىن ارتتىرىپ، ونىمدەرىن Qarmet كومپانياسى تۇتىنىپ وتىر.
