قاراعاندى وبلىسىندا "تازا قازاقستان" رەسپۋبليكالىق ەكولوگيالىق اكتسياسى جالعاسۋدا. ء"بولۋ! تاپسىرۋ! قايتا وڭدەۋ!" باستاماسى اياسىندا ءوڭىردىڭ 3 مىڭنان استام وقۋشىسى تانىمدىق دارىستەرگە قاتىسىپ، قوقىستى دۇرىس سۇرىپتاۋدى ۇيرەندى.
بۇگىن قاراعاندىداعى № 93 شاكارىم قۇدايبەرديەۆ اتىنداعى گيمنازيا وقۋشىلارىنا قالدىقتاردى سۇرىپتاۋ بويىنشا تانىمدىق ينتەراكتيۆتى ساباق ءوتتى.
وقۋشىلارعا قالدىقتاردى دۇرىس سۇرىپتاۋ جانە قايتا وڭدەۋ تابيعي رەسۋرستاردى ساقتاۋعا كومەكتەسەتىنى ءتۇسىندىرىلدى. ولار پلاستيكا تۋرالى كوپتەگەن جاڭا دەرەكتەردى ءبىلدى. مىسالى، پلاستيكالىق بوتەلكە شامامەن 500 جىل بويى شىرەيدى. بارلىق قاتىسۋشىلار سىيلىقتار الدى.
وسىعان ۇقساس ساباقتار ءبىر ۋاقىتتا تاعى 4 قالالىق مەكتەپتە ءوتتى. ولارعا 200-دەن استام وقۋشى قاتىستى.
سونىمەن قاتار، قاراعاندىدا "ەكوباتىر"ەكولوگيالىق بايقاۋى ۇيىمداستىرىلدى. 33 مەكتەپتىڭ وقۋشىلارى ءارتۇرلى اتالىمدار بويىنشا كوشباسشى اتاعى ءۇشىن باق سىناستى. "Instagram-داعى ەڭ بەلسەندى كوماندا"سياقتى قوسىمشا ماراپاتتار دا بار.
– بايقاۋدىڭ نەگىزگى ماقساتى-بالالار مەن جاسوسپىرىمدەرگە قالدىقتاردى سۇرىپتاۋ داعدىلارىن ۇيرەتۋ. ماكۋلاتۋرا مەن پلاستيكالىق بوتەلكەلەردى جيناۋعا باۋلۋ. بايقاۋ ەكى باعىتقا بولىنگەن: "ماكۋلاتۋرانى جينا-اعاشتى ساقتا!"جانە" پلاستيكتى قايتا وڭدەۋ – پلانەتاعا اۋا قاجەت!». قاراعاندىدان ءبىرىنشى سىنىپتان جەتىنشى سىنىپقا دەيىنگى وقۋشىلاردان قۇرالعان مەكتەپ كوماندالارى قاتىستى، – دەدى وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى باقتيار سانباەۆ.
كوماندالار بارلىعى 3573,52 كەلى ماكۋلاتۋرا مەن 540,75 كەلى پلاستيكالىق بوتەلكە تاپسىردى.
وقۋشىلار جيناعان قالدىقتاردى قايتا وڭدەۋگە تاپسىردى. جەڭىمپازدار ديپلومدار مەن باعالى سىيلىقتارعا يە بولادى. قازىر بايقاۋ قورىتىندىلانىپ، جەڭىمپازدار انىقتالاتىن بولادى.
بايقاۋدىڭ ۇيىمداستىرۋشىسى – قاراعاندى وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسى، سەرىكتەستەرى – قاراعاندى قالاسىنىڭ ءبىلىم ءبولىمى جانە "ۆتورسىرە كاراگاندا"جشس.
