قازاقستان پرەزيدەنتى قاسىم-جومارت توقاەۆتىڭ موڭعولياعا مەملەكەتتىك ساپارى كەزىندە شىڭعىس حان مۋزەيىندەگى ەستەلىكتەر كىتابىنا نە جازعانى بەلگىلى بولدى دەپ حابارلايدى "ادىرنا" ۇلتتىق پورتالى.
موڭعوليا پرەزيدەنتى ۋحنااگين حۇرەلسۇحتىڭ شاقىرۋىمەن جۇزەگە اسقان بۇل ساپار بارىسىندا ەكى ەل اراسىنداعى ىنتىماقتاستىقتى «ستراتەگيالىق ارىپتەستىك» دەڭگەيىنە كوتەرۋگە ارنالعان بىرقاتار ماڭىزدى كەلىسىمدەرگە قول قويىلعان.
فولكلورتانۋشى عالىم، فيلولوگيا عىلىمدارىنىڭ كانديداتى اقەدىل تويشانۇلى جەلىدەگى پاراقشاسىندا جازبا جاريالادى.
"قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ «موڭعوليا ەلىنە مەملەكەتتىك ساپار جوشى ۇلىسىنىڭ 800 جىلدىعىنا تۇسپا-تۇس كەلۋى ۇلكەن سيمۆوليكالىق مانگە يە» دەپ تامىرلى تاريحىمىز، باۋىرلاستىق بايلانىسىمىز تەرەڭدە ەكەنىنە ماڭىز بەردى.
پرەزيدەنت شىڭعىسحان مۋزەيىنە ارنايى بارىپ، قۇرمەتتى قوناقتار كىتابىنا:
«شىڭعىس حان ۇلتتىق مۋزەيى – ۇلى تۇلعانىڭ جانە تۇتاس مەملەكەتتىڭ شەجىرەسى. رۋحانيات ورداسى ەل يگىلىگىنە قىزمەت ەتە بەرسىن. موڭعوليا حالقىنىڭ مەرەيى ۇستەم بولسىن!» دەپ جىلى لەبىزىن قالدىردى.
بۇل مۋزەي – مودە تاڭىرقۇت، بىلگە قاعان، كۇلتەگىن، شىڭعىس حان قۇرعان كوشپەلى يمپەريالاردىڭ قازىنالارى توپتاستىرىلعان بىرەگەي كەشەن. مۋزەيدىڭ التىن وردا مەملەكەتىنا ارنالعان سارايىنىڭ تورىندە تۇركى اكادەمياسىنىڭ شىڭعىس حان مۋزەيىنە تارتۋ ەتكەن جوشى حان كۇمبەزىنىڭ ماكەتى جايعاسقان.
بۇل تۋرالى مونتسامە اگەنتتىگى تاراتقان حاباردا «مۋزەي ديرەكتورى، اكادەميك س.چۋلۋن پرەزيدەنتكە مەملەكەتتىك ءداستۇر، تاريح، مادەني قازىنالاردى تاماشالاتتى.2021 جىلى حالىقارالىق تۇركى اكادەمياسى باسشىسى دارحان قىدىرالى ۇيىمداستىرۋىمەن سىيعا تارتقان جوشى حان مازارىنىڭ ماكەتى تانىستىرىلدى» دەپ حابارلادى مونتسامە اگەنتتىگى.
Басқалармен бөлісе отырыңыз
