ءماجىلىس دەپۋتاتتارى قازاقستان ازاماتتارىنا سوعىس جاعدايى كەزىندە جانە سوعىس ۋاقىتىندا اسكەردە ەرىكتى بولۋعا مۇمكىندىك بەرەتىن زاڭ جوباسىن قابىلدادى، دەپ حابارلايدى «ادىرنا» ۇلتتىق پورتالى.
قۇجاتقا سايكەس، ەندى زاڭنامادا «ەرىكتى» ۇعىمى پايدا بولادى.
«قۇرامىنا ەرىكتىلەر كىرەتىن ءوزىن-ءوزى قورعاۋ قۇرامالارى جەرگىلىكتى اسكەري باسقارۋ ورگاندارىنىڭ نەگىزىندە قۇرىلادى جانە ولارعا تىكەلەي باعىناتىن بولادى. بەيبىت ۋاقىتتا دايىندىق بىرقاتار ءىس-شارالاردى، سونىڭ ىشىندە ەرىكتىلەردى وقىتۋدى قامتيدى»، - دەدى قورعانىس ءمينيسترىنىڭ ورىنباسارى سۇلتان كامالەتدينوۆ ماجىلىستە.
زاڭ جوباسىنىڭ قورىتىندىسىنا سايكەس، قازاقستان ازاماتتارىنىڭ موبيليزاتسيا، سوعىس جاعدايى مەن سوعىس ۋاقىتىندا ءوزىن-ءوزى قورعاۋ قۇرىلىمدارىنا ەرىكتى تۇردە قوسىلۋ مۇمكىندىگى قاراستىرىلادى.
