Búgin QR Premer-mınıstri Oljas Bektenovtiń tóraǵalyǵymen Úkimet otyrysy ótti. Kún tártibinde mashına jasaýdy damytý máseleleri qaralyp, óńdeý ónerkásibiniń ekonomıkadaǵy úlesi taý-ken salasynan asyp, turaqty ósim kórsetkeni aıtyldy. Jıynǵa oblys ákimi Nurlybek Nálibaev selektorlyq rejımde qatysty.
Úkimet otyrysynan keıin aımaq basshysy arnaıy májilis ótkizip, jaýapty sala mamandaryna shaǵyn jáne orta kásipkerlikti damytý, ataýly áleýmettik kómek kórsetý men bıýdjettiń ıgerilýi boıynsha tapsyrmalar júktedi.
«Bıyl jeke kásipkerlerdiń 3 myńǵa jýyq jobasyna 42 mlrd. 500 mln. teńge kóleminde qarjylaı qoldaý kórsetildi. Degenmen, aımaqta dara kásipkerler sanynyń ósý qarqyny ótken jylmen salystyrǵanda tómendegen. Árbir ákim ózi basqaratyn eldi mekendegi jumyssyzdar sanyn azaıtý, jańa jumys oryndaryn ashý, halyqtyń tabys kózin arttyrý sekildi negizgi sharalarǵa basa nazar aýdarýy kerek. Meniń tapsyrmammen jyl basynda áleýmettik kómek alýshylar sanyn 30 paıyzǵa tómendetý týraly tıisti basqarmanyń, Qyzylorda qalasy men aýdan ákimdikteriniń jospary bekitildi. Shynaıy tabysyn jasyryp, jalǵan aqparat usynyp, masyldyq oımen kómek alý úshin turǵyndar túrli áreketterge barýda. Ataýly áleýmettik kómek tek shyn muqtaj otbasylarǵa ǵana berilýi qajet. Qala jáne aýdan ákimderine ýchaskelik komıssııalardyń jumysyn kúsheıtip, jyl sońyna deıin belgilengen jospardy oryndaýdy tapsyramyn», – dedi N.Nálibaev.
Aıta keteıik, ótken jyldyń qorytyndysymen jastardyń kásipkerlik bastamasyna shaǵyn nesıe alý boıynsha Qyzylorda oblysy respýblıkada ekinshi oryndy ıelenip, 492 azamat kásibin bastaǵan.
Sonymen qatar, Qyzylorda óńirlik ınvestıııalyq ortalyǵynyń nesıelendirý jumysyn jandandyryp, aýyl sharýashylyǵy ónimderin óńdeý salasyn damytýǵa 1 mlrd. 500 mln. teńge qarjy bólindi.
Osylaısha shaǵyn jáne orta kásipkerliktiń ónim shyǵarylymy 33,6 paıyzǵa ulǵaıyp, oblys respýblıkadaǵy alǵashqy úshtikten kórindi.Bıyl ataýly kómekke 5 mlrd. 900 mln. teńge qarjy bólinip, 9 aıdyń qorytyndysymen 31 869 adamǵa 2 mlrd. 100 mln. teńge tólendi.
