بالقاشتا جەدەل مەديتسينالىق جاردەم قوسالقى ستانتسياسى 30 جىل ىشىندە العاش رەت ءوز عيماراتىنا يە بولدى.
ونى قايتا قۇرۋ كەزىندە ينجەنەرلىك جۇيەلەر جاڭارتىلىپ، توبەسى اۋىستىرىلدى. سونداي-اق، ورتكە قارسى قاۋىپسىزدىك جانە بەينەباقىلاۋ جۇيەلەرى ورناتىلعان.
– بۇرىن بالقاشتىڭ جەدەل مەديتسينالىق جاردەم بريگادالارى ستاتسيونار جانىنداعى جەكە بولىنگەن ءۇي-جايلارعا ورنالاستىرىلعان بولاتىن. كەيىندە جەدەل جاردەم بريگادالارىنىڭ ەڭبەك جاعدايلارىن جاقسارتۋ قاجەتتىلىگى ەرەكشە بايقالدى. وسىعان بايلانىستى ەسكى عيماراتتى قايتا قۇرۋ تۋرالى شەشىم قابىلداندى. قوسالقى ستانتسيادا التى جەدەل جاردەم بريگاداسى بار، ولار ءبىر جىل ارالىعىندا 30 مىڭعا دەيىن شاقىرۋعا شىعىپ، مەديتسينالىق قىزمەت كورسەتەدى.
تاۋلىك بويى جۇمىس ىستەيتىن ەكى ديسپەتچەرلىك بەكەت بار. دەمالىس بولمەلەرى، كولىكتەرگە ارنالعان جۋ، تۇراق جانە جوندەۋ سەكىلدى ءۇش بوكس قاراستىرىلعان، – دەدى وبلىستىق جەدەل مەديتسينالىق جاردەم ستانتسياسى ديرەكتورىنىڭ م. ا. اقىلبەك سارباەۆ.
بالقاشقا جۇمىس ساپارى بارىسىندا قاراعاندى وبلىسىنىڭ اكىمى ەرماعانبەت بولەكپاەۆ بۇل شەشىمدەر بالقاش ءوڭىرىنىڭ 80 مىڭ تۇرعىنىنا مەديتسينالىق كومەك كورسەتۋ ساپاسىن جاقسارتاتىنىن اتاپ ءوتتى.
سونداي-اق، بالقاشتىقتار وبلىس ورتالىعىنا بارماي-اق ۋاقتىلى مەديتسينالىق كومەك الۋى ءۇشىن اۋدانارالىق اۋرۋحاناعا 25 جاس مامان تارتىلدى: انەستەزيولوگ-رەانيماتولوگ، تراۆماتولوگتار، نەۆروپاتولوگتار، اكۋشەر-گينەكولوگتار، نەوناتولوگتار، پەدياترلار، جالپى تاجىريبە دارىگەرلەرى جانە ت. ب. تاعى 12 دارىگەر رەزيدەنتۋرادا وقيدى جانە كەلەسى جىلى بالقاشقا جۇمىسقا كەلەدى.
ماماندار جۇمىسپەن قامتاماسىز ەتىلىپ، تۇرعىن ءۇي ماسەلەسى شەشىلدى. قالالىق اۋرۋحانا اۋماعىندا 30 پاتەرلى ءۇش قاباتتى عيمارات جوندەلدى. ولاردىڭ بارلىعى جيھاز جانە تۇرمىستىق تەحنيكامەن جابدىقتالعان.
– مەن پريوزەرسك قالاسىنىڭ تۋماسىمىن. الماتىدا وقىپ، بالقاشقا جۇمىسقا كەلدىم. ماعان ەكى بولمەلى پاتەر بەردى. تولىق جابدىقتالعان، بارلىق جاعدايلار بار. بارلىعى ۇنايدى، – دەپ ءبولىستى جالپى تاجىريبە دارىگەرى جادىرا سەتەنوۆا.
30 جاس مامان جاڭا قونىستانۋشى اتاندى.
وبلىس بويىنشا بيىل بارلىعى 130 پاتەر بەرىلدى.
ال قالالار مەن اۋداندارعا دارىگەرلەردى تارتۋ ءۇشىن كوتەرمە سوماسى 1,5 ملن تەڭگەدەن 8 ملن تەڭگەگە دەيىن ۇلعايتىلدى.
وزگەرىستەر بالقاش كوپسالالى اۋرۋحاناسى ەمحاناسىنىڭ بازاسىندا دا ورىن الىپ، العاشقى ۇزدىك تاجىريبەلەر ورتالىعى اشىلدى. مەديتسينالىق مەكەمە زاماناۋي دياگنوستيكالىق جابدىقتارمەن جابدىقتالعان.
ورتالىقتا كەشەندى مەديتسينالىق، الەۋمەتتىك جانە پسيحولوگيالىق كومەك الۋعا بولادى. سونداي-اق، "حالىق كەڭەسى" قوعامدىق قابىلداۋ بولمەسى جۇمىس ىستەيدى، وندا تۇرعىندار ءوز وتىنىشتەرىن قالدىرا الادى. سالاۋاتتى ءومىر سالتى كابينەتى جانە بارلىق تىلەك بىلدىرۋشىلەر ءۇشىن دەنساۋلىق مەكتەبى اشىلدى.
– مۇندا مەديتسينالىق، الەۋمەتتىك جانە پسيحولوگيالىق قىزمەتتەردىڭ سيمبيوزى – وتباسىلىق مەديتسينا ءپرينتسيپى قاراستىرىلعان. وتباسىلىق دارىگەر، قامقورشى مەدبيكە، اكۋشەر، پسيحولوگ جانە الەۋمەتتىك قىزمەتكەردەن تۇراتىن كوپسالالى توپ بەلگىلى ءبىر وتباسىمەن اينالىسادى، اۋرۋلارعا اكەلەتىن سەبەپتەردى انىقتايدى. ورتالىق "ناۋقاستىڭ 5 مينۋتتا بايقاعانى" قاعيداتى بويىنشا جۇمىس ىستەيتىن بولادى. تىركەۋدەن باستاپ-اق پاتسيەنت 5 مينۋت ىشىندە وزىنە قاجەتتى اقپاراتتى الۋى كەرەك. كىرە بەرىستە ەكى ينفوتابلو بار، سۇراقتارعا جاۋاپ بەرەتىن جۇيەلىك اكىمشى بار. بيىل ءبىزدىڭ مەملەكەتىمىز قازاقستاننىڭ ءتۇرلى جوعارى وقۋ ورىندارىنىڭ بەس وتباسىلىق دارىگەرلەرىمەن تولىقتى، – دەيدى بالقاش كوپسالالى اۋرۋحاناسىنىڭ ديرەكتورى سەرىكبول تۇسىپبەكوۆ.
– سىزدەر مەملەكەت باسشىسىنىڭ مەديتسينانى قولداۋ، وسى باعىتتى جاڭعىرتۋ جانە حالىققا ساپالى مەديتسينالىق قىزمەت كورسەتۋ جونىندەگى باستاماسى تۋرالى بىلەسىزدەر. ءبىز وسى تاپسىرما اياسىندا مەديتسينالىق نىسانداردى اشىپ، يننوۆاتسيالار ەنگىزىپ جاتىرمىز – مۇنىڭ ءبارى حالىققا ساپالى قىزمەت كورسەتۋ ءۇشىن. ءبىز ءوز تاراپىمىزدان وسىنداي باستامالاردى قارجىلاي قولدايمىز. ءبىز ءۇشىن ءبىرىنشى كەزەكتەگى مىندەت – وسىنداي نىسانداردى مۇمكىندىگىنشە اشۋ. ول ءۇشىن ءبىز تۇرعىن ءۇي سالامىز، ماماندارعا وسى مەديتسينالىق مەكەمەلەردە جۇمىس ىستەۋ ءۇشىن كوتەرمە جاردەماقى بەرەمىز، – دەپ اتاپ ءوتتى ەرماعانبەت بولەكپاەۆ.
بۇل قاراعاندى وبلىسىنداعى ۇزدىك تاجىريبەلەردىڭ بەسىنشى ورتالىعى. ونىڭ باستى ماقساتى – مەديتسينالىق كومەكتىڭ قولجەتىمدىلىگىن ارتتىرۋ، شاعىمداردىڭ سانىن ازايتۋ جانە حالىقتىڭ مەديتسينالىق ساۋاتتىلىعىن جاقسارتۋ.
