ۇلىتاۋ وبلىسىنىڭ ورتالىعىنداعى «مەتاللۋرگ» ستاديونىنىڭ الاڭى زاماناۋي تالاپتارعا ساي جاڭارتىلىپ، فۋتبولسۇيەر قاۋىمنىڭ يگىلىگىنە ۇسىنىلدى. قر فۋتبول فەدەراتسياسىنىڭ «ALAN» جوباسى اياسىندا جوندەلگەن الاڭ ەندى الەمدىك ستاندارتتارعا تولىق سايكەس كەلەدى. ستاديوننىڭ اشىلۋ سالتاناتىندا ۇلىتاۋ وبلىسىنىڭ اكىمى داستان رىسپەكوۆ فۋتبول فەدەراتسياسىنىڭ پرەزيدەنتى ادىلەت بارمەنقۇلوۆقا العىسىن ءبىلدىردى.
«بۇل الاڭ ءوڭىرىمىز ءۇشىن ەرەكشە ماڭىزعا يە. 60 جىلدىق تاريحى بار، ءوڭىردىڭ سپورتتىق سيمۆولىنا اينالعان ورىن. ەندى ءبىزدىڭ «Ulytau» فۋتبول كلۋبىنىڭ ويىنشىلارى FIFA ستاندارتتارىنا ساي الاڭدا ماتچتار وتكىزىپ، دايىندالۋعا مۇمكىندىك الادى»، - دەدى اكىم ءوز سوزىندە.
جاڭارتىلعان الاڭدا جوعارى دەڭگەيدەگى قالالىق، وبلىستىق، رەسپۋبليكالىق جارىستار مەن پرەمەر-ليگا ويىندارىن وتكىزۋ ءۇشىن بارلىق قاجەتتى زاماناۋي جابدىقتار ورناتىلعان. جاڭا جاساندى جابىننىڭ ساپاسى مەن قاۋىپسىزدىگى فۋتبولشىلاردىڭ جاراقات الۋ قاۋپىن ازايتۋعا مۇمكىندىك بەرەدى. سونىمەن قاتار، ستاديوندا كورەرمەندەرگە ارنالعان جايلى ورىندار مەن قاجەتتى ينفراقۇرىلىم جاڭارتىلدى، بۇل سپورتتىق ءىس-شارالاردى تاماشالاۋعا قولايلى جاعداي جاسايدى.
اشىلۋ سالتاناتىندا قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ، ۇلىتاۋ وبلىستىق فۋتبول فەدەراتسياسىنىڭ باسشىسى عالىم نۇرجانوۆ، «ALAN» جوباسىنىڭ برەند امباسسادورى سامات سماقوۆ، فەدەراتسيا پرەزيدەنتىنىڭ كەڭەسشىسى ەرمۇحامەد ماۋلەن، سونداي-اق «ۇلىتاۋ» فك پرەزيدەنتى تالعات بايسۋفينوۆ قاتىستى.
سالتاناتتى شارادان كەيىن قوناقتاردىڭ قاتىسۋىمەن قاقپاعا گول سوعۋ ءراسىمى ۇيىمداستىرىلدى. سونىمەن قاتار، ستاديوننىڭ تاريحى مەن دامۋ جولىنا ارنالعان ارنايى كورمە وتكىزىلىپ، قوناقتار وتكەن جىلدارداعى ماڭىزدى وقيعالاردى ەسكە الدى.
