رەسەي قازاقستاندى ترانزيت ءتاريفى بويىنشا ەۋرازيالىق ەكونوميكالىق وداق (ەاەو) تۋرالى شارتتىڭ بازالىق قاعيداتىن بۇزدى دەپ ايىپتادى، دەپ حابارلايدى «ادىرنا» ۇلتتىق پورتالى.
«كوميسسيا قازاقستان رەسپۋبليكاسىنىڭ اۋماعىندا جۇك تاسىمالداۋعا ارنالعان تەمىرجول تاريفتەرىنىڭ كوتەرىلۋى سەبەپتى تاسىمال كولەمدەرىنىڭ قىسقارۋىن نازارعا الدى. رەسەي تاراپىنىڭ پىكىرىنشە، ءوز شەشىمىمەن قازاقستاندىق تاراپ ترانزيتتىك تاسىمالدارعا بىرىزدەندىرىلگەن تاريفتەردى قولدانۋ بولىگىندە ەاەو تۋرالى شارتتىڭ بازالىق قاعيداتىن بۇزدى»، - دەلىنگەن قازاقستان مەن رەسەي اراسىنداعى ىنتىماقتاستىق جونىندەگى ۇكىمەتارالىق كوميسسيانىڭ 25-ءشى وتىرىسىنىڭ حاتتاماسىندا.
ايتا كەتەيىك، حاتتاماعا ءالى قول قويىلعان جوق.
جاعدايدى رەتتەۋ ءۇشىن، ۇزاق مەرزىمدى ارەكەت ەتەتىن بوس ۆاگونداردى تاسىمالداۋعا قاتىستى كونۆەنتسيالىق شەكتەۋلەرگە بايلانىستى، رجد جانە "قتج-جۇك تاسىمالى" كومپانيالارى 2024 جىلعى 21 ماۋسىمدا كەلىسىلگەن ءوتىنىم بويىنشا بوس ۆاگونداردىڭ قوزعالىسى تۋرالى كەلىسىمگە قول قويدى. بۇل كەلىسىمنىڭ ىسكە اسىرىلۋى كونۆەنتسيالىق تىيىمداردىڭ سانىن ازايتۋعا كومەكتەسەدى. تاراپتار اتالعان كەلىسىمنىڭ ەرەجەلەرىن تاراپتاردىڭ اقپاراتتىق جۇيەلەرىندە تەحنيكالىق ىسكە اسىرۋ بويىنشا جۇمىستى جالعاستىرۋعا ۋاعدالاستى.
قازاقستاندىق تاراپتىڭ اقپاراتى بويىنشا، قتج ۇك اق تاريفتىك تالاپتارىنىڭ وزگەرۋى ەكونوميكالىق نەگىزدەلگەن شىعىنداردى جابۋ جانە تەمىرجول ينفراقۇرىلىمىن دامىتۋ قاجەتتىلىگىنە بايلانىستى ەاەو تۋرالى شارتتىڭ نورمالارىنا، سونداي-اق، قر ۇلتتىق زاڭناماسىنا قايشى كەلمەيدى.
«قر ۇلتتىق زاڭناماسىنا سايكەس «قتج»ۇك» اق جۇك تاسىمالدارى ءۇشىن شەكارالىق ستانتسيالارداعى ينفراقۇرىلىم تاريفتەرىن وزگەرتۋ قۇقىعىنا يە. ينفراقۇرىلىم تاريفتەرىنىڭ وزگەرۋى قر «تابيعي مونوپوليالار تۋرالى» زاڭىنا سايكەس جۇزەگە اسىرىلادى. سونىمەن قاتار، 2024 جىلدىڭ 16 ساۋىرىنەن باستاپ «قتج»ۇك» اق ينفراقۇرىلىم تاريفتەرىنىڭ كەيبىر جۇك تۇرلەرىنە قاتىستى دەڭگەيى «رجد» ااق تاريفتەرىنەن اسپايدى، وسىلايشا قر اۋماعى ارقىلى ترانزيتتىك كولەمدەردىڭ جوعالۋ تاۋەكەلدەرىن ازايتادى»، - دەلىنگەن حاتتامادا.
رەسەي تاراپى ەاەو كەلىسىمىنىڭ تاريفتىك جۇيەلەر اراسىنداعى مىندەتتى سايكەستىك قاراستىرىلمايتىنىن اتاپ ءوتتى.
«ەاەو تۋرالى شارتقا سايكەس ءاربىر مۇشە مەملەكەتتىڭ اۋماعى بويىنشا تاسىمالداۋدى جۇزەگە اسىرۋ كەزىندە وسى شارتقا مۇشە مەملەكەتتەردىڭ تۇتىنۋشىلارىنىڭ تەمىرجول كولىگى قىزمەتتەرىنە قولجەتىمدىلىگىن قامتاماسىز ەتۋ تۇتىنۋشىلارعا ارنالعان قولايلى شارتتاردان كەم بولماۋى ءتيىس. «قتج «ۇك» اق-نىڭ تاريفتەردى كوتەرۋ تۋرالى شەشىمى ەاەو مەملەكەتتەرىنىڭ تەمىرجول تاسىمالدارىن قر اۋماعى ارقىلى ترانزيتپەن جۇزەگە اسىرۋ كەزىندە قازاقستان تۇتىنۋشىلارىمەن سالىستىرعاندا تەڭسىز تاريفتىك شارتتار تۋىنداتتى، سەبەبى ولار تومەنگى ىشكى تاريفتەرمەن تاسىمالداردى جۇزەگە اسىرادى»، - دەپ مالىمدەدى ماسكەۋ.
وسى ماسەلەنى تالقىلاۋ ناتيجەسىندە ەەك-ءتىڭ ىشكى نارىقتاردى فۋنكتسيونالداۋ دەپارتامەنتى قازاقستان تاراپىنان تەمىرجول تاريفتەرىنە قاتىستى باعا شەكتەرىن قولدانۋ جونىندە ەاەو كەلىسىمىنىڭ نورمالارىن بۇزۋلار انىقتالماعانىن اتاپ ءوتتى.
