كوكشەتاۋدا اقمولا وبلىسىنىڭ ونكولوگيالىق قىزمەتىنىڭ نەگىزىن قالاۋشى ومىربەك بايكەنوۆتىڭ 90 جىلدىعىنا وراي ەلىمىزدىڭ جەتەكشى حيرۋرگتارىنىڭ قاتىسۋىمەن كۇردەلى حيرۋرگيالىق وتا، شەبەرلىك سىنىبى، ونكولوگيالىق اۋرۋلاردى ەمدەۋدىڭ جاڭا ادىستەرى بويىنشا عىلىمي-پراكتيكالىق كونفەرەنتسيا ءوتتى.
ءوڭىردىڭ ونكولوگيالىق قىزمەتىن 40 جىلدان استام باسقارعان دارىندى دارىگەرگە قۇرمەت كورسەتە وتىرىپ، اقمولا كوپسالالى وبلىستىق اۋرۋحاناسىنىڭ ونكولوگيالىق ورتالىعىنىڭ عيماراتىندا ومىربەك بايكەنوۆتىڭ مەموريالدىق تاقتاسى ورناتىلدى. بىرنەشە ادامنىڭ ءومىرىن ساقتاپ قالعان دارىگەردىڭ ەسىمى قازاقستاننىڭ مەديتسينالىق قاۋىمداستىعىنا عانا بەلگىلى ەمەس، ومىربەك كاكىمۇلى وبلىستىق جانە قالالىق حالىق كەڭەسىنىڭ دەپۋتاتى بولىپ سايلاندى، كوكشەتاۋ قالاسىنىڭ قۇرمەتتى ازاماتى اتاعىنا يە بولدى.
ەسكەرتكىش تاقتانى اشۋ قۇرمەتىنە ومىربەك كاكىمۇلىنىڭ ارىپتەسى جانە شاكىرتى، بەلگىلى ونكولوگ، عىلىم دوكتورى اباي ماقىشەۆ يە بولدى.
وبلىستىق ارداگەرلەر كەڭەسىنىڭ توراعاسى ەرمەك نۇعىمانوۆ ءوز سوزىندە ومىربەك بايكەنوۆتىڭ ەڭبەگىنە توقتالدى. ونىڭ ايتۋىنشا، ومىربەك كاكىمۇلىنىڭ ارقاسىندا 1963 جىلى وبلىستىق اۋرۋحانانىڭ جانىنان ونكوپوليكلينيكا، العاشقى راديويزوتوپتىق زەرتحانا، ال وبلىستىڭ بارلىق اۋداندىق اۋرۋحانالارىندا ونكولوگيالىق كابينەتتەر اشىلعان. سونىمەن بىرگە، جيىندا مەديتسينا عىلىمدارىنىڭ دوكتورى، پروفەسسور سەرىك اياعانوۆ، عىلىم دوكتورى، «استانا مەديتسينا ۋنيۆەرسيتەتى» ونكولوگيا كافەدراسىنىڭ مەڭگەرۋشىسى اباي ماقىشەۆ، اقمولا كوپسالالى وبلىستىق اۋرۋحاناسىنىڭ ديرەكتورى نۇرلان جاروۆ جانە ومىربەك بايكەنوۆتىڭ باسقا دا وقۋشىلارى مەن ارىپتەستەرى ول تۋرالى ەستەلىكتەرىمەن ءبولىستى.
«ومەكەڭنىڭ دۇنيەدەن وتكەنىنە بيىل توعىز بولدى. بۇگىن ونى ەسىمى مەن ەڭبەگى ارىپتەستەرىنىڭ، ناۋقاستارىنىڭ جانىندا ماڭگى ساقتالعانىنا كوزىم جەتىپ، قۋانىپ وتىرمىن. بۇل ديسپانسەردىڭ قۇرىلىسىندا مەنىڭ جۇبايىمنىڭ ەڭبەگى زور دەپ بىلەمىن. عيماراتتىڭ قابىرعاسىنا ورناتىلىپ وتىرعان مەموريالدىق تاقتا ونىڭ رياسىز قىزمەتىن ەسكە تۇسىرەدى، – دەدى ومىربەك كاكىمۇلىنىڭ جەسىرى راۋزا بايكەنوۆا.
سەميناردىڭ پراكتيكالىق بولىمىندە ادام ءومىرى ءۇشىن كۇرەسۋ بويىنشا شەبەرلىك سىنىپتارى وتكىزىلدى.
«كوكشەتاۋعا ەكىنشى رەت كەلىپ وتىرمىن، ناۋقاسقا بۇيرەك ىسىگىنىڭ رەزەكتسياسىن از ءينۆازيۆتى ادىسپەن جۇرگىزەمىن. حيرۋرگيالىق ارالاسۋدىڭ ماقساتى-ۇلكەن ىسىكتى الىپ تاستاۋ ارقىلى ناۋقاستىڭ بۇيرەگىن ساقتاپ قالۋ. مۇنداي وتالاردى ءبىز وزىمىزدە ينستيتۋتتا جاسايمىز، بۇرىن ولار تەك جولاقتى تۇردە جاسالدى، ال بۇگىن كىشكەنە پۋنكتسيا ارقىلى. بۇل ءادىس تەز قالپىنا كەلۋگە كەپىلدىك بەرەدى، وتادان كەيىن ناۋقاس كەلەسى كۇنى تۇرىپ، وزدىگىنەن قوزعالا الادى، ال ۋاقىت وتە كەلە وتادان كىشكەنتاي تىرتىقتار عانا قالادى»، – دەدى قازاق ونكولوگيا جانە راديولوگيا عزي ونكوۋرولوگيالىق ورتالىعىنىڭ جەتەكشىسى حۋسان ومىرزاقوۆ.
ول جەرگىلىكتى ونكولوگ-حيرۋرگتاردىڭ جوعارى دەڭگەيىن اتاپ ءوتتى. ونىڭ سوزىنشە، ەلوردالىق دارىگەرلەردىڭ ماقساتى-اقمولا ماماندارىنىڭ داعدىلارىن جەتىلدىرۋ. ايتا كەتەيىك، وبلىستىق اۋرۋحانانىڭ حيرۋرگتارى ونكولوگيا جانە راديولوگيا عزي بازاسىندا ۇنەمى بىلىكتىلىگىن ارتتىرۋدان وتەدى، ال ەگەر كۇردەلى جاعدايلار بويىنشا كەڭەس قاجەت بولسا، ونى قاشىقتان الادى.
«ەلوردالىق ۋنيۆەرسيتەت رەسپۋبليكا ءۇشىن دارىگەرلىك قۇرامدى دايىنداۋدا جەتەكشى ورىن الادى. تۇلەكتەرىمىزدىڭ ەداۋىر بولىگى اقمولا وبلىسىندا جۇمىس ىستەيدى. وڭىرلىك ۋنيۆەرسيتەتتەرمەن كەلىسىمشارتتار جاسالدى، وعان سايكەس ءبىزدىڭ ماماندار پاتسيەنتتەردى ەمدەۋدى ۇيىمداستىرۋعا كومەك كورسەتەدى جانە شەبەرلىك سىنىپتارىن بەرەدى. ءبىز ەمحانالاردا جۇمىس ىستەيتىن ونكولوگتارمەن جانە تەراپەۆتتەرمەن دارىستەر وتكىزۋگە نيەتتىمىز، ويتكەنى ولار ونكولوگيانى ەرتە دياگنوستيكالاۋ جانە العاشقى دياگنوز قويۋ ءۇشىن قاجەتتى دايىندىققا يە بولۋى ءتيىس»، – دەدى استانا مەديتسينا ۋنيۆەرسيتەتىنىڭ كافەدرا مەڭگەرۋشىسى، مەديتسينا عىلىمدارىنىڭ دوكتورى اباي ماقىشەۆ.
ول سونداي – اق كوكشەتاۋدا وڭەشتىڭ ونكولوگيالىق اۋرۋى بار ناۋقاسقا كۇردەلى وتا جاساۋ جوسپارلانعانىن اتاپ ءوتتى. ناۋقاس شامامەن 20 جىل بۇرىن كەۋدە قۋىسىنىڭ وق جاراقاتىن العان. تاعى ءبىر ەندوسكوپيالىق وتانى ەندوكرينولوگ دارىگەر، استانا قالاسىنىڭ كوپسالالى مەديتسينالىق ورتالىعىنىڭ ەندوسكوپيا بولىمشەسىنىڭ مەڭگەرۋشىسى الەكسەي زەلەنىي جۇرگىزدى.
«اۋىل حالقىنا ونكولوگيالىق كومەكتى دامىتۋ ماسەلەلەرى مەن پەرسپەكتيۆالارى» عىلىمي-پراكتيكالىق كونفەرەنتسياسىنا قازاقستاننىڭ تۇكپىر-تۇكپىرىنەن جەتەكشى دارىگەرلەر جينالدى. كونفەرەنتسيانىڭ اشىلۋىندا اقمولا وبلىسى اكىمىنىڭ ورىنباسارى التىناي امىرەنوۆا اتاپ وتكەندەي، ومىربەك كاكىمۇلىنىڭ كۇش – جىگەرىنىڭ ارقاسىندا ونكولوگيالىق قىزمەت ءوڭىرىمىزدىڭ ەڭ دامىعان دەنساۋلىق ساقتاۋ سالالارىنىڭ بىرىنە، ال ونكولوگيالىق ديسپانسەر-وزىق دياگنوستيكالىق جانە ەمدەۋ-الدىن الۋ ورتالىعىنا اينالدى.
«ومىربەك كاكىمۇلى وزىنەن كەيىنگى كەلەشەك ونكولوگيالىق دارىگەرلەردى تاربيەلەدى. اۋىلدىق جەرلەردەگى ناۋقاستارعا ەرەكشە نازار اۋداردى، اۋداندارعا ءجيى بارىپ، ناۋقاستارعا كەڭەس بەردى. بۇگىن ءبىز بۇل جۇمىستى قولجەتىمدى، زاماناۋي جانە جوعارى بىلىكتى مەديتسينالىق كومەك جۇيەسىن دامىتۋ اياسىندا جالعاستىرىپ جاتىرمىز»، - دەپ اتاپ ءوتتى التىناي امىرەنوۆا.
وتىرىستاردا اقمولا دارىگەرلەرى ەلىمىزدىڭ جەتەكشى ونكولوگتارىمەن كۇردەلى كلينيكالىق جاعدايلاردى تالقىلادى، ونكولوگيالىق اۋرۋلاردىڭ الدىن الۋ سالاسىنداعى جەتىستىكتەرمەن، قاتەرلى ىسىك دياگنوستيكاسىنىڭ زاماناۋي ادىستەرىمەن، سونداي-اق پاللياتيۆتىك كومەك پەن پاتسيەنتتەردى وڭالتۋمەن ءبولىستى. تاقىرىپتىق سەكتسيالاردا ەلىمىزدىڭ جەتەكشى ونكولوگ-دارىگەرلەرىنىڭ ۇزدىك تاجىريبەلەرى تۋرالى باياندامالار ۇسىنىلدى.
«وسى كونفەرەنتسيانى جوسپارلاي وتىرىپ، ءبىز ءوز وڭىرىمىزدەگى ونكولوگيا پروبلەمالارىنا مامانداردىڭ نازارىن اۋدارۋعا تىرىستىق، رەسپۋبليكالىق تاجىريبەنى ەسكەرە وتىرىپ، ولاردى شەشۋ جولدارىن قاراستىرۋ ماقساتىن قويدىق. مۇنىڭ ءبارى ءبىزدىڭ ونكولوگ-دارىگەرلەردىڭ بىلىكتىلىگىنىڭ وسۋىنە، ولاردىڭ كاسىبي داعدىلارىن جەتىلدىرۋگە اسەر ەتەتىنى ءسوزسىز»، – دەدى كونفەرەنتسيادا كوپسالالى وبلىستىق اۋرۋحانانىڭ ديرەكتورى نۇرلان جاروۆ.
