مۇعالىمدەردى ولاردىڭ جۇمىسىنا قاتىسى جوق شارالارعا كۇشتەپ تارتقاندارعا جانە ولاردان باسىارتىق ەسەپ تالاپ ەتكەندەرگە 303 مىڭ تەڭگەگە دەيىن ايىپپۇل سالىنادى. پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا «پەداگوگ مارتەبەسى تۋرالى» جانە وعان ىلەسپە زاڭ جوبالارىنىڭ اقىرعى نۇسقالارى قۇپتالدى. ەندى بۇل قۇجاتتار پارلامەنتكە ەنگىزىلەدى. ۇكىمەت باسشىسى «پەداگوگ مارتەبەسى تۋرالى» زاڭ جوباسى ەلباسى ن.نازارباەۆتىڭ باستاماسى بويىنشا ءازىرلەنگەنىن ەسكە سالدى.
ول سونداي-اق مەملەكەت باسشىسى ق.توقاەۆتىڭ ورتا ءبىلىم بەرۋ جۇيەسىن دامىتۋ جانە ءبىلىم ساپاسىن ارتتىرۋ جونىندەگى العا قويعان مىندەتتەرىنە جاۋاپ بەرەدى. بۇل زاڭ جوباسىن ازىرلەۋدىڭ نەگىزگى ماقسات-يدەياسى – مۇعالىمدەردىڭ جۇكتەمەسىن ازايتۋ، ولاردى وزدەرىنە ءتان ەمەس جۇمىستاردى ورىنداۋدان بوساتۋ، سول ارقىلى ۇستازدارعا ءوزىن-ءوزى دامىتۋعا جانە شىعارماشىلىقپەن اينالىسۋىنا ءمۇمكىندىك بەرۋ. بۇعان قوسا، وسى ابزال ماماندىق يەلەرىنىڭ جالاقىسىن ارتتىرۋعا، ەڭبەك دەمالىسىن ۇلعايتۋعا، پەداگوگتىك شەبەرلىگى مەن ءتالىمگەرلىگى ءۇشىن قوسىمشا اقى تولەۋگە باعىتتالعان شارالار كوزدەلۋدە.
ايتا كەتۋ كەرەك، بۇل زاڭ جوباسى ءوڭىر اكىمدەرىنە جەرگىلىكتى بيۋدجەت مۇمكىندىگىنە قاراي مۇعالىمدەرگە قوسىمشا ماتەريالدىق كومەك كورسەتۋىنە مۇمكىندىك بەرەدى. تيىسىنشە، قاي ءوڭىر ۇستازعا كوبىرەك قۇرمەت-قوشەمەت كورسەتسە، ءبىلىم سالاسىنىڭ ەڭ ۇزدىك، بىلىكتى ماماندارى دا سولارعا اعىلادى.
– مۇعالىمدەردىڭ كاسىبي تۇرعىدان دامۋىنا جانە ءباسەكەگە قابىلەتتىلىگىن ارتتىرۋعا جاعداي جاساۋ جوسپارلانعان. پەداگوگ مارتەبەسىن ارتتىرۋ، ولاردى ىنتالاندىرۋ مىندەتى دە كوزدەلەدى. جالپى، زاڭ جوباسىن ىسكە اسىرۋ مۇعالىم ماماندىعىنىڭ مارتەبەسىن ارتتىرۋعا، ولاردىڭ ار-نامىسى مەن قادىر-قاسيەتىن قورعاۋعا، پەداگوگتار ءۇشىن الەۋمەتتىك كەپىلدىكتەر جۇيەسىن جاساۋعا جول اشادى، – دەدى اسقار مامين. ماسەلەنى قاراۋ قورىتىندىسىندا ۇكىمەت جەتەكشىسى «پەداگوگ مارتەبەسى تۋرالى» جانە «پەداگوگ مارتەبەسى، وقۋشى مەن مۇعالىم جۇكتەمەسىن تومەندەتۋ ماسەلەلەرى ءجونىندەگى كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن ماجىلىسكە 2019 جىلدىڭ 1 قىركۇيەگىنە قاراي، وسى اپتا ىشىندە ەنگىزۋدى تاپسىردى. قولدانىستاعى شەكتەۋلەردەن باسقا، پسيحيكالىق جانە مىنەز-قۇلىقتىق اۋىتقۋى بار، ارەكەتكە جارامسىزدىعىنا بايلانىستى دارىگەر باقىلاۋىندا تۇرعان ادامداردىڭ پەداگوگ قىزمەتىمەن اينالىسۋىنا تىيىم سالىنباق. جۇمىس توبىنا مۇعالىمدەردەن 18 مىڭنان استام ۇسىنىس كەلىپ ءتۇسىپتى. ناتيجەسىندە، «پەداگوگ مارتەبەسى تۋرالى» زاڭنىڭ اقىرعى جوباسىنا 19 باپ كىرىپ وتىر.
– نەگىزگى ماتەريالدىق ىنتالاندىرۋلار قاتارىندا سىنىپ جەتەكشىلىگى مەن داپتەر تەكسەرگەنى ءۇشىن اقىنى ەكى ەسەگە ءوسىرۋ، پەداگوگيكالىق شەبەرلىگى ءۇشىن قوسىمشا اقى تولەۋ، بارلىق پەداگوگتىڭ جىل سايىنعى دەمالىسىن 56 كۇنگە دەيىن ۇلعايتۋ، ماگيستر دارەجەسى ءۇشىن جانە تالىمگەر بولعانى ءۇشىن قوسىمشا اقى تولەۋ كىرەدى، – دەدى ءبىلىم جانە عىلىم ءمينيسترى اسحات ايماعامبەتوۆ. مۇنىڭ سىرتىندا ماتەريالدىق ەمەس ىنتالاندىرۋلار دا كوزدەلمەك. اتاپ ايتقاندا، مۇعالىمدەردىڭ جۇكتەمەسى ءتومەندەتىلەدى. ولاردىڭ ار-نامىسى مەن قادىر-قاسيەتىن قورعاۋ كەپىلدىگى قامتاماسىز ەتىلەدى. مۇعالىمدەردىڭ بالالارىنا بالاباقشادا ءبىرىنشى كەزەكتە ورىن بەرىلەدى. تەك پەداگوگتەرگە ارنالعان «قازاقستاننىڭ ەڭبەك سىڭىرگەن ۇستازى» مەملەكەتتىك ناگراداسى تاعايىندالادى.
– مۇعالىمنىڭ كاسىبي فۋنكتسياسىنا كىرمەيتىن مىندەتتەردى جۇكتەۋگە، شامادان تىس ەسەپ بەرۋگە، نەگىزسىز تەكسەرۋلەر جۇرگىزۋگە تىيىم سالۋ ارقىلى پەداگوگتىڭ جۇكتەمەسىن قىسقارتۋ بويىنشا جەكە نورمالار كوزدەلگەن. مۇعالىمگە ءتان ەمەس فۋنكتسيالارعا جانە ارتىق ەسەپ بەرۋگە تارتقانى ءۇشىن 20-دان 120 ايلىق ەسەپتىك كورسەتكىشكە دەيىن ايىپپۇل سالۋ قاراستىرىلعان، – دەدى بعم باسشىسى. قولدانىستاعى شەكتەۋلەردەن باسقا، پسيحيكالىق جانە مىنەز-قۇلىقتىق اۋىتقۋى بار، ارەكەتكە جارامسىزدىعىنا بايلانىستى دارىگەر باقىلاۋىندا تۇرعان ادامداردىڭ پەداگوگ قىزمەتىمەن اينالىسۋىنا تىيىم سالىنباق. «اتالعان زاڭدار سىنىپ جەتەكشىلىگى ءۇشىن 173 مىڭ مۇعالىمنىڭ، ال داپتەر تەكسەرگەنى ءۇشىن 165 مىڭ مۇعالىمنىڭ قوسىمشا اقىسىن ەكى ەسەگە كوبەيتۋگە مۇمكىندىك بەرەدى. 212 مىڭنان استام قىزمەتكەر بىلىكتىلىك ساناتى ءۇشىن ايلىق جالاقىدان 30-دان 50%-عا دەيىنگى مولشەردە قوسىمشا اقى الادى. 7 مىڭ قىزمەتكەر ماگيستر دارەجەسى ءۇشىن 10 اەك مولشەرىندە، ياعني 25 250 تەڭگە، 18 مىڭ قىزمەتكەر تالىمگەرلىك ءۇشىن 1 بازالىق لاۋازىمدىق جالاقى مولشەرىندە، ياعني 17 697 تەڭگە قوسىمشا اقى الاتىن بولادى»، – دەدى ا.ايماعامبەتوۆ.
دەرەككوز: aikyn.kz
"ادىرنا" ۇلتتىق پورتالى