الماتىدا داۋلەت تۇرلىحانوۆتىڭ ۇلى نۇراسىل بولاتقا قاتىستى سوت وتىرىسى كەيىنگە شەگەرىلدى، دەپ حابارلايدى «ادىرنا» ۇلتتىق پورتالى.
بۇعان دەيىن ول پروباتسيالىق باقىلاۋدى بۇزعانى ءۇشىن سوتتالعان ەدى. جازانى باس بوستاندىعىن شەكتەۋدەن باس بوستاندىعىنان ايىرۋعا اۋىستىرۋ ماسەلەسىن شەشۋ ءۇشىن الماتى قالاسى قىلمىستىق ىزدەستىرۋ باسقارماسىنان سوتقا ماتەريالدار كەلىپ ءتۇستى. ءىستى №2 مەدەۋ اۋداندىق سوتىنىڭ سۋدياسى قانات ارينوۆ قارايدى.
«سوتتالعان بولات نۇراسىل داۋلەتۇلىنا قاتىستى سوتتىڭ باس بوستاندىعىن شەكتەۋ تۇرىندەگى جازانى باس بوستاندىعىنان ايىرۋ جازاسىنا اۋىستىرۋ تۋرالى الماتى قالاسى بويىنشا قىلمىستىق-تۇزەتۋ مەكەمەسىنىڭ مەدەۋ اۋداندىق پروباتسيا قىزمەتىنىڭ ۇسىنىسىن قاراستىرىپ جاتىرمىز»، – دەدى سۋديا.
الايدا نۇراسىل بولاتتىڭ ادۆوكاتى پروتسەسكە قاتىسا الماعاندىقتان، وتىرىس كەيىنگە شەگەرىلدى. ادۆوكات قۇسايىنوۆا سوت وتىرىسىن باسقا كۇنگە اۋىستىرۋ تۋرالى ءوتىنىش بەردى. قورعاۋشى سوتقا دايىندالۋ ءۇشىن ۋاقىت سۇرادى.
«سوت تاراپتاردىڭ پىكىرىن تىڭداپ، سوت وتىرىسىن باسقا كۇنگە قالدىردى. ويتكەنى ءبىز ادۆوكاتسىز سوت وتىرىسىن وتكىزە المايمىز. قورعاۋ قۇقىعى زاڭ تالاپتارىن بۇزباۋ ءۇشىن قازىر ەشقانداي ءوتىنىشتى قاراي المايمىز»، - دەدى سۋديا قانات ءارىنوۆ.
سوت وتىرىسى 21 قازان ساعات 15:00-گە شەگەرىلدى.
2024 جىلدىڭ مامىر ايىندا نۇراسىل بولات ادۆوكات ولەگ چەرنوۆ پەن ونىڭ ايەلى اننانى ۇرىپ-سوققانى ءۇشىن ەكى جىلعا باس بوستاندىعىنان ايىرىلعان ەدى. نۇراسىل بولات باس بوستاندىعىن شەكتەۋ جازاسىن وتەپ، الماتى پروباتسيا قىزمەتىنىڭ ەسەبىندە تۇردى. وعان تۇنگى ۋاقىتتا شىعۋعا شەكتەۋ قويىلدى. الايدا، بىرەر كۇن بۇرىن نۇراسىل بولاتتىڭ تويدا جۇرگەنى تۋرالى اقپارات تارادى. پروباتسيالىق باقىلاۋدى بۇزۋ فاكتىسى بويىنشا سوتتالۋشىعا ەسكەرتۋلەر بەرىلىپ، جازانى باس بوستاندىعىنان ايىرۋ جازاسىنا اۋىستىرۋ ماسەلەسىن شەشۋ ءۇشىن سوتقا ماتەريالدار دايىندالدى.
ەستەرىڭىزگە سالا كەتەيىك، 2023 جىلدىڭ 11 اقپانىنا قاراعان ءتۇنى الماتىدا نۇراسىل بولات ەرلى-زايىپتى ادۆوكاتتار چەرنوۆا مەن دميتريەۆيچتى ۇرىپ-سوققان بولاتىن. كەيىنىرەك تۇرلىحانوۆتىڭ ۇلى مەرزىمدى قىزمەتتىڭ قاتارداعى جاۋىنگەرى ەكەنى بەلگىلى بولدى جانە ول زاڭگەرلەردى ۇرعان جەردە بولماۋى كەرەك ەدى.
نۇراسىل بولاتقا قاتىستى ءىستى اسكەري سوت قك-ءنىڭ 107-بابى 2-بولىگىنىڭ 1 جانە 5-تارماقتارى «بۇزاقىلىق نيەتپەن ەكى ادامعا اۋىرلىعى ورتاشا دەنساۋلىققا قاساقانا زيان كەلتىرۋ» بويىنشا قارادى.
9 قازاندا سوت بولاتتى وزىنە تيەسىلى قىلمىس جاساعانى ءۇشىن كىنالى دەپ تاۋىپ، 1 ميلليون 700 مىڭ تەڭگە ايىپپۇل تۇرىندە جازا تاعايىندادى.
2024 جىلعى 14 مامىردا جوعارعى سوت ءىستى كاسساتسيادا قاراپ، نۇراسىل بولات ءۇشىن ۇكىمدى وزگەرتتى. ول ەكى جىلعا باس بوستاندىعىنان ايىرىلدى جانە وتەماقى مولشەرى ۇلعايتىلدى.
