ەستونيا ۋكراينا ناتو-عا كىرۋىن قولدايدى، دەپ حابارلايدى “ادىرنا” ۇلتتىق پورتالى.
ەستونيا ۋكراينا ناتو-عا قوسىلۋ پروتسەسىندە ناقتى قادامداردى كورگىسى كەلەتىنىن مالىمدەدى. بۇل تۋرالى ەلدىڭ قورعانىس ءمينيسترى حاننو پەۆكۋر حابارلادى.
«ەستونيا ارقاشان ۋكراينا ءۇشىن قاۋىپسىزدىكتىڭ ناقتى كەپىلى ناتو-عا مۇشە بولۋ ەكەنىن ايتىپ كەلگەن»، – دەدى پەۆكۋر بريۋسسەلدەگى ناتو ەلدەرىنىڭ قورعانىس مينيسترلەرىنىڭ كەزدەسۋىندە.
17 قازاندا بريۋسسەلدە ۋكراينا-ناتو كەڭەسىنىڭ وتىرىسى وتەدى. جيىنعا ۋكراينا پرەزيدەنتى ۆلاديمير زەلەنسكي دە قاتىسپاق. ول وسى وتىرىستا «جەڭىس جوسپارىن» تانىستىرىپ، ەۋروپا وداعىنىڭ باسشىلارىمەن كەزدەسەدى.
ناتو باسشىسى مارك ريۋتتە بەيسەنبى كۇنى ۋكراينا پرەزيدەنتى ۆلاديمير زەلەنسكي مەن ونىڭ ەلى رەسەيمەن كەلىسسوزدەردى كۇشەيتىلگەن پوزيتسيادان باستاۋى كەرەكتىگىن ايتتى. ريۋتتەنىڭ ايتۋىنشا، سولتۇستىك اتلانتيكالىق اليانس كيەۆتى تولىق قولداپ وتىر.
«ەگەر قاجەت بولسا، ءبىز بۇل جاعدايعا ۇزاق ۋاقىتتان بەرى دايىنبىز. ۋكراينا رەسەيمەن كۇشتى پوزيتسيادان كەلىسسوزدەر باستاۋى ءۇشىن ءبىز قولايلى جاعداي جاساعىمىز كەلەدى، بىراق بۇل ءسات ءالى كەلگەن جوق. ۋكراينا ءبىزدىڭ تۇراقتى قولداۋىمىزعا سەنىم ارتا الادى»، – دەدى ريۋتتە.
