تالعاردا كىسى قولىنان قازا تاپقان 16 جاستاعى ءجاسوسپىرىم شەرزات بولاتتىڭ ورتەنىپ كەتكەن ۇيىنەە كانيستر مەن رەزەڭكە قولعاپ تابىلدى. پوليتسيادا ورتكە قاتىستى ناقتى كۇدىكتىلەر ازىرگە جوق، دەپ حابارلايدى “ادىرنا” ۇلتتىق پورتالى.
«ءبىز زارداپ شەككەندەردىڭ ۇيىندەگى ءورتتىڭ سەبەبىن بەلسەندى تۇردە زەرتتەپ جاتىرمىز. ءورت ورنىندا ماڭىزدى ايعاقتار جينالىپ، 600-دەن استام ادام سۇرالدى. ناقتى نە بولعانىن انىقتاۋعا كومەكتەسۋ ءۇشىن بىرنەشە ساراپتاما تاعايىندالدى. ماماندار ءورتتىڭ ءۇي سىرتىنان شىققانى تۋرالى العاشقى قورىتىندى جاساپ ۇلگەردى. بوتەن ءورت كوزى پايدالانىلعان بولۋى مۇمكىن»، - دەدى الماتى وبلىسىنىڭ پروكۋرورى بەرىك اداموۆ.
قازىر ماماندار وقيعا ورنىنان تابىلعان كانيستر مەن رەزەڭكە قولعاپتى قاراپ جاتىر. كەلتىرىلگەن شىعىن كولەمى دە انىقتالادى.
ايتا كەتەيىك، 4 قازان كۇنى تالعاردا ونىنشى سىنىپ وقۋشىسى شەرزات بولات ايۋاندىقپەن ءولتىرىلدى.
12 قازانعا قاراعان ءتۇنى ازات اۋىلىندا ولتىرىلگەن 16 جاستاعى شەرزات بولاتتىڭ وتباسىنىڭ ءۇيى ورتەنىپ كەتتى. تۋىستارى كۇزەتكە الىندى، ال تالعاردى قازىر ۇلتتىق ۇلان كۇزەتەدى. مەكتەپ وقۋشىسىنىڭ اكەسى قارجاۋباي نۇرىموۆ ادىلدىككە سەنىمىن جوعالتىپ، وتباسىن الماتى وبلىسىنان الىپ كەتكىسى كەلەتىنىن ايتتى.
