قازاقستاننىڭ ەڭ جارقىن ءارى ەڭ بەدەلدى وپەرا انشىلەرىنىڭ ءبىرى مايرا مۇحامەدقىزى ساحناداعى 30 جىلدىق مەرەيتويىن كەرەمەت كونتسەرتپەن اتاپ ءوتتى. كونتسەرت قر مادەنيەت جانە اقپارات مينيسترلىگىنىڭ قولداۋىمەن ءوتتى. قۇرمەتتى قوناقتاردىڭ قاتارىندا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا بولدى.
مايرا مۇحامەدقىزى كورەرمەندەرگە الەمدىك جانە ۇلتتىق رەپەرتۋارداعى تۋىندىلاردان تۇراتىن بىرەگەي باعدارلاما ۇسىندى. وپەرا ساڭلاعىنىڭ ورىنداۋىندا ريحارد شتراۋس، فەرەنتس ليست، پەتر يليچ چايكوۆسكي سىندى ۇلى كومپوزيتورلاردىڭ وپەرالارىنان اريالار، سونداي-اق كونتسەرتكە ەرەكشە ۇلتتىق بوياۋ بەرگەن قازاق اۆتورلارىنىڭ شىعارمالارى شىرقالدى. ديريجەرلەر ابزال مۇحيتدين جانە ءمادي ومىرزاقتىڭ جەتەكشىلىگىندەگى «استانا وپەرا» سيمفونيالىق وركەسترىنىڭ جانە حورىنىڭ سۇيەمەلدەۋىمەن وتكەن كونتسەرت ونىڭ كوپ جىلدىق شىعارماشىلىعىنىڭ جاندى كورىنىسىنە اينالدى.
ايرىقشا اتاپ وتەتىن ءنومىر — مايرا مۇحامەدقىزىنىڭ اقش-تاعى ەسكى دوسى تەمىرجان ەرجانوۆپەن بىرگە ورىنداعان «Olieb, solang duliebenkannst» كومپوزيتسياسى كورەرمەندەردىڭ زور ىقىلاسىنا بولەندى. مايرا مۇحامەدقىزىنىڭ جورج بيزە، شارل گۋنو جانە دجۋزەپپە ۆەرديدىڭ وپەرالارىنان اريالاردى تەبىرەنە ورىنداۋى ونىڭ ەموتسيالىق تەرەڭدىگىن جانە ارتىستىك شەبەرلىگىن ايقىن كورسەتتى. سونداي-اق سيمفونيالىق وركەستر مەن حوردىڭ سۇيەمەلدەۋىمەن ورىندالعان كارل ورفتىڭ «كارمينا بۋرانا» شىعارماسىنىڭ «O Fortuna» ۇزىندىسىنەن كەيىن دە كورەرمەندەر دۋ قول شاپالاق جاۋدىردى.
مايرا مۇحامەدقىزىنىڭ مانساپ جولى — بۇل تەك ساحناداعى 30 جىل عانا ەمەس، بۇل ونەرگە دەگەن ادالدىقتىڭ 30 جىلى. قازاقستان رەسپۋبليكاسىنىڭ ەڭبەك سىڭىرگەن ءارتىسى، كوپتەگەن سىيلىقتاردىڭ لاۋرەاتى جانە بەدەلدى ماراپاتتاردىڭ يەگەرى رەتىندە ول بىرنەشە جىل بويى قازاق وپەرا ونەرىن الەمدىك ارەنادا تانىستىردى. ول ايرىقشا شەبەرلىگى، جارقىن حاريزماسى جانە ءوز ىسىنە دەگەن ادالدىعىنىڭ ارقاسىندا قازاقستاندا عانا ەمەس، ودان تىس جەرلەردە دە كورەرمەندەردىڭ ماحابباتى مەن ىقىلاسىنا يە بولدى.
رەجيسسەرى ميحايل پاندجاۆيدزە بولعان كونتسەرتكە تەاتردىڭ بالالار حورى، «استانا وپەرانىڭ» جەتەكشى بالەت سوليستەرى انەل رۇستەموۆا، ولجاس تارلانوۆ، دياس قۇرمانعازى، ايگىلى قازاقستاندىق ارتىستەر وراز مۇحامەديار (تەنور), جۇمابەك قاڭتارباەۆ (تەنور), ايبەك قاناتبەك (باريتون), رامينا ساتىبالدى جانە تاعى باسقالارى قاتىستى.
