جەزقازعاندا قايتا قۇرىلىپ جاتقان نىساننىڭ جالپى اۋدانى 900 شارشى مەتردى قۇرايدى. وزگە وڭىرلەردەگى ارنايى عيماراتى بار شاحمات اكادەميالارىنىڭ اۋماعىمەن سالىستىرعاندا بۇل ەكى ەسە كەڭ كولەمدى بولماق. قۇرىلىس جۇمىستارى بيىل قازان ايىندا اياقتالۋى ءتيىس. ول جايىندا ۇلىتاۋ وبلىسى اكىمى بەرىك ابدىعاليۇلىنىڭ جۇمىس ساپارىمەن باقىلاۋى بارىسىندا «قازاقمىس» كورپوراتسياسىنىڭ باسقارما توراعاسى نۇراحمەت نۇريەۆ ايتتى.
انىقتاما ءۇشىن: «قازاقمىس» كورپوراتسياسىنىڭ قولداۋىمەن جەزقازعان قالاسى، مومىشۇلى 16 مەكەنجايىنداعى اياقسىز قالعان ءۇش قاباتتى نىسان ساتىپ الىنىپ، باستان اياق قايتا جاڭارتىلۋدا.
جانسايا ابدىمالىك شاحمات اكادەمياسى بولۋى ءتيىس ءۇش قاباتتى عيماراتتىڭ قازىرگى تاڭدا ديزاين جوباسى دايىندالدى. تەحنيكالىق تەكسەرۋدەن وتكەننەن كەيىن ىرگەتاسىن بەرىك قىلۋ ماقساتىندا كۇردەلى جۇمىستار جۇرگىزىلدى. قازىرگى تاڭدا قاسبەتى مەن توبەسى، نىساننىڭ ءىشى قاتار جوندەلۋدە جانە ارنايى جيھازدارمەن تولىقتىرىلادى.
اكادەميانىڭ ديزاين جوباسىنا سايكەس ارنايى زالدار، جاتتىقتىرۋشىلارعا ارنالعان كابينەتتەر، اتا-انالارعا ارنالعان كۇتۋ زالى، اكىمشىلىك، كيىم اۋىستىرۋ بولمەسى، دەمالۋعا ارنالعان ورىن قاراستىرىلعان.
ايتا كەتەيىك، بولاشاق اكادەميا 700 بالانى دايارلاۋعا قاۋقارلى بولماق.
