تالعاردا كىسى قولىنان قازا بولعان 16 جاستاعى ءجاسوسپىرىم شەرزات بولاتتىڭ اكەسى ەشقانداي كوتەرىلىسكە شىقپاۋعا شاقىردى، دەپ حابارلايدى “ادىرنا” ۇلتتىق پورتالى.
شەرزاتتىڭ اكەسى قارجاۋباي نۇرىموۆ پەن مارقۇم سالتانات نۇكەنوۆانىڭ باۋىرى ايتبەك امانگەلدى ۆيدەوۇندەۋ ارقىلى ميتينگكە شىقپاۋدى سۇرادى.
"قازاق ەلى، تاعى ايتا كەتەتىنىم، 14 قازاندا ەشقانداي ميتينگ، قانتوگىس بولمايدى. ادىلەتتى سوت ۇكىمىن كۇتەمىن. تەرگەۋ جۇرگىزىلەدى. ەلدەر كەلىپ جاتىر. استانادان دا كەلىپ جاتىر. ادۆوكاتتار دا بار. مارقۇم سالتاناتتىڭ باۋىرى دا بار. وسى جىگىتتەر كومەكتەسىپ جاتىر. حالىققا ايتارىم، قولداۋ كورسەتىپ جاتىرسىزدار، اللا رازى بولسىن! كوپ راقمەت! قازىر قانتوگىس، ميتينگ، شوعىرلانۋ بالامنىڭ ءىسىنىڭ جۇرۋىنە توقتاۋ بولادى. سول سەبەپتى ءوتىنىپ سۇرايتىنىم، اقىلدى، سالانى ەل بولۋىمىز كەرەك. بۇگىنگى كۇندى عانا ەمەس ەرتەڭگى كۇندى دە ويلاۋىمىز كەرەك قوي. قانتوگىسپەن ەشتەڭە شەشىلمەيدى... مەنىڭ قالاۋىم – بالام ءۇشىن ءادىل سوت. اشىق، ءادىل سوت بولعانشا، سوڭىنا دەيىن بارامىن. مەنىڭ ماقساتىم سوڭىنا دەيىن بارامىن دەپ، بىرەۋدى اتىپ، بىرەۋمەن توبەلەسۋ ەمەس، جامان ادامدار جامان پيعىلىن جاساي بەرسىن. ودان كەيىن ايتاتانىم، كوڭىلدەرىڭىزگە راقمەت، بىراق اقشا جيناۋدىڭ كەرەگى جوق. بۇگىن بالامنىڭ جەتىسى ەدى. قارالى كۇندە اقشا جاسايىن دەپ جۇرگەن ازامات ەمەسپىن", - دەپ مالىمدەدى ول.
ايتبەك امانگەلدى دە بۇگىن ءورت بولعان جەرگە بارعانىن حابارلادى. ول قوعام بەلسەندىلەرى ىشكى ىستەر مينيسترلىگىمەن جانە باس پروكۋراتۋرا وكىلدەرىمەن سويلەسكەنىن اتاپ ءوتتى. سونداي-اق ول دا 14 قازاندا ميتينگ بولادى دەگەن اقپاراتتى جوققا شىعارىپ، حالىقتى جالعان اقپاراتتىڭ جەتەگىندە كەتپەۋگە شاقىردى.
