Kisi qolynan qaza tapqan Sherzat Bolattyń úıi senbige qaraǵan túni órtengen. Marqumnyń týǵan-týystary oqıǵanyń qalaı bolǵanyn aıtty, dep habarlaıdy “Adyrna” ulttyq portaly.
Ulysmedıa jarııalaǵan aqparatta órt shamamen túngi 00.30 ýaqytynda bolǵany kórsetilgen. Qyzyl jalyn sharpyǵanda úıde eshkim bolmaǵan.
Marqumnyń týǵan-týystary Sherzattyń qazasynan soń qara shańyraqta bolǵan. Órtten mal aman qalǵan. Al ıtti kúıik shalypty.
Ulysmedıaǵa oqıǵanyń mán-jaıyn Qarjaýbaı Nurymovtyń qaryndasy aıtyp bergen.
“Qarjaýbaıdyń ózi birdeńe deıtindeı jaǵdaıda emes.
Sońǵy úsh kúnde Sherzattyń synyptastary “kóshelerińizde nómiri joq kólikter júr” dedi. Órt bolmaı bir kún buryn kórshiler “sizdiń úılerińizge nómiri joq kólikpen kelgender kirip shyqty, biz shýlap, bárimiz jaryqty jaqtyq, aıǵaılap edik, toqtamastan qashyp ketti” dep habar berdi. Mektep balalarynyń bári de bir aýyldan bolǵan soń kimniń qandaı kólikti aıdaıtynyn bilemiz dep otyr. Balalar “ishindegi adamdar da beıtanys, amandasaıyq dep qasyna baryp edik, terezeni jaýyp alyp, toqtamaı ótip ketti” dedi. Sońǵy úsh kúnde “kólikter júr” degendi estidik. IIM-ge baryp, kelgennen beri osylaı bolyp jatyr, – deıdi qaryndasy.
Marqumnyń týys ápkesi Perızat Nurymova resmı organdar óz jumysyn durys atqarmaǵanyn aıtqan.
“Qarastyryp jatyr. Sonyń “arqasy”. IIM-niń, Talǵar, oblys ákimdiginiń “qarastyryp, kúshti jumys atqaryp jatqandarynyń arqasy”. Úıden aıyrylyp qaldyq. Úıdi qoıshy, janymyz aman. Buǵan deıin kúzet qoıylǵan joq. Úıge qoımaı-aq qoısyn, joq degende aýyldyń basyna qoıyp bersin. Kimniń kirip shyǵyp jatqanyn bilsin. Qarapaıym halyq bolyp, joldan ótken kólikti toqtatyp, “kimsiń” dep suraı bersek, esi durys emes dep oılaıdy ǵoı. Ustalǵan adamdardyń, sol jaqtan shyqqan adamdardyń bárine kólik qoıyp berip qoıypty. Aýylǵa kire beriste kólik qoıypty. Sonda biz janymyz shyǵyp otyrǵanda bireýdiń janyn alýǵa shamamyz jete me? Mamamyzdyń ózi bir qulap, bir esin jıyp otyr. Zań ókilderine oılanýǵa bolady ǵoı. Búgin topyrlap bári júr. Júrgennen ne paıda? Bári bitken soń! Qalǵanymyzdyń janymyzdy alyp ketkenin kútemiz be? Sóıtip, bir tóbe bolyp, úıip qoıaıyn degen shyǵar? Zań ókilderi jumys istese bulaı bolmaıdy! Bizdiń prezıdent Qasym-Jomart Kemeluly zań ókilderi qalaı jumys isteıtinin kórsin! Sol kisiniń qol astynda basshy bolyp, jumysshylarynyń is-áreketi osy!” – deıdi ol.
Sherzattyń ákesi aýyl mańyna kúzet qoıýdy suraǵan. Alaıda quzyrly organ bul jaǵdaıdy eskermegeni de aıtyldy.
“Jylap-syqtap boldyq. Endi qoıa salmaımyz. Aqyryna deıin baramyz”, – deıdi Perızat Nurymova.
