پاكىستاندا سودىرلاردىڭ جەكەمەنشىك كومىر شاحتاسىنا جاساعان شابۋىلىنان 20 كەنشى قازا تاۋىپ، تاعى 7-ەۋى جاراقات الدى. بۇل تۋرالى Reuters اگەنتتىگى جازدى، دەپ حابارلايدى “ادىرنا” ۇلتتىق پورتالى.
وقيعا پاكىستاننىڭ وڭتۇستىك-باتىسىنداعى بەلۋدجيستان پروۆينتسياسىندا بولعان.
اقپاراتقا سايكەس، شابۋىل تاڭەرتەڭ ەرتە اۋعانستان مەن يرانمەن شەكتەسەتىن مينەرالعا باي بەلۋدجيستان پروۆينتسياسىندا بولدى.
«ءبىر توپ ادام تاڭعى ساعاتتا دۋكي اۋدانىنداعى «دجۋنايد» كومىر كومپانياسىنىڭ شاحتالارىنا اۋىر قارۋمەن شابۋىل جاسادى»، - دەدى پوليتسيا بولىمشەسىنىڭ وفيتسەرى حۋمايۋن حان.
Reuters سودىرلار شاحتا جۇمىسشىلارىن ءبىر جەرگە جيناپ، كەيىن ولارعا وق جاۋدىرعانىن مالىمدەدى. سونداي-اق، شابۋىلشىلار تاۋ-كەن جابدىقتارىن ورتەپ جىبەرگەن.
ساراپشىلاردىڭ پىكىرىنشە، بۇل شابۋىل – كەيىنگى اپتالارداعى ەڭ سوراقىسى جانە ول ەلدە شانحاي ىنتىماقتاستىق ۇيىمى ەۋرازيالىق توبىنىڭ ءسامميتىن وتكىزۋگە بىرنەشە كۇن قالعاندا جاسالعان.
جەرگىلىكتى باق يسلاماباد ەكونوميكالىق داعدارىستان شىعۋعا تىرىسىپ جاتقان وڭتۇستىك ازيا ەلىندەگى تاۋ-كەن ءوندىرۋ كەلىسىمدەرىن زەرتتەگەن ساۋد ارابياسىنىڭ دەلەگاتسياسىن قابىلداپ جاتقانىن جاريالاۋدا.
سونداي-اق، بەلۋدجيستان بىرنەشە ونداعان جىلدار بويى بەلۋدجدىك بۇلىكشى توپتارىنىڭ مەملەكەتكە قارسى سوعىسىپ جاتقانىنا الاڭداپ كەلەدى. بىرنەشە شابۋىل ەڭبەك ميگرانتتارىنا باعىتتالعان، ولاردىڭ كوپشىلىگى، سونىڭ ىشىندە اۋعانستاننان كەلگەندەر شاعىن جەكەمەنشىك شاحتالاردا جۇمىس ىستەپ جاتىر.
