«زەرەندى-استىق» جشس جانە ونىڭ ينۆەستورى – «قازاقستان استىق كونسورتسيۋمى» جشس باسشىلارى ءباسپاسوز ماجىلىسىندە بيىلعى ەگىن ناۋقانىنىڭ بارىسى جايىندا بايانداپ، جۋرناليستەردىڭ ساۋالدارىنا جاۋاپ بەردى.
«قازاقستان استىق كونسورتسيۋمى» جشس باس ديرەكتورى باقتيار وسپانوۆتىڭ ايتۋىنشا، بيىل «زەرەندى-استىق» جشس مول ءونىم بەرىپ، كونسورتسيۋم سەرىكتەستىككە ينۆەستور بولىپ كەلگەننەن بەرگى رەكوردتى كورسەتكىشكە يە بولعان. قازىرگى تاڭدا كومپانيا پايشىلارعا تولەماقى بەرۋ جۇمىستارى باستالدى. ايتا كەتۋ كەرەك، قازاقستان استىق كونسورتسيۋمىنا كىرەتىن شارۋاشىلىقتار اراسىندا «زەرەندى-استىق» جشس العاشقى بولىپ پاي بويىنشا تولەماقى بەرىپ جاتىر.
«قازاقستان استىق كونسورتسيۋمى 2021 جىلى «زەرەندى-استىق» سەرىكتەستىگىنە ونىڭ قارىزدارىن وتەپ، جۇمىستى جولعا قويۋ ماقساتىندا كەلگەن بولاتىن. بۇرىنعى اكتسيونەردىڭ كەزىندە كومپانيا قۇلدىراپ، ونىڭ ءتۇرلى بانكتە قارىزدارى بار بولدى. «زەرەندى-استىقتىڭ» ءوزى پروبلەمالىق كرەديتتەر قورىنا كەپىلگە بەرىلگەن. كومپانيا بانكروت بولۋدىڭ الدىندا عانا تۇرعان ەدى. ءبىز ينۆەستور رەتىندە كەلۋ ارقىلى ارقىلى كەپىلدە تۇرعان جەرلەردىڭ ساتىلىپ كەتۋىنىڭ الدىن الدىق. ارينە، مەملەكەت بىزگە كومپانيانىڭ بارلىق قارىزىن وتەۋ مىندەتىن قويدى. قازىر بۇل ماسەلەنى بىرتىندەپ شەشىپ جاتىرمىز»، – دەدى باقتيار وسپانوۆ.
الايدا، ونىڭ تۇسىندىرۋىنشە، «زەرەندى-استىق» جشس قۇرامىنا كىرەتىن پايشىلاردىڭ زاڭسىز جولمەن حاتتاما جاساۋ ارقىلى سەرىكتەستىكتەن شىعۋى كومپانيانىڭ دامۋىنا ۇلكەن كەدەرگى كەلتىرىپ وتىر. بۇرىن 36 مىڭ گەكتار جەرگە يە بولعان سەرىكتەستىك بۇگىندە 18 مىڭعا جۋىق گەكتاردان ايىرىلعان. بۇل جەرلەردىڭ يەلەرى باسقا كومپانيالارعا ءوتىپ كەتكەن.
«ءبىز بۇل تۇرعىدا ينۆەستور رەتىندە وتە قيىن جاعدايدا قالىپ وتىرمىز. ويتكەنى، ءبىز بۇرىنعى اكتسيونەردىڭ قارىزى تولىق وتەۋ مىندەتىن موينىمىزعا الدىق، الايدا ەگىن ەگەتىن جەر كولەمى ايتارلىقتاي ازايىپ كەتتى. قازىر سەرىكتەستىك پەن پايشىلار اراسىندا ۇزاققا سوزىلعان سوت پروتسەسى ءجۇرىپ جاتىر. اتالعان حاتتامالاردىڭ جالعان ەكەنىن راستايتىن سوت شەشىمدەرى شىقتى. دەگەنمەن، قازىر بىزگە شارتتى تۇردە پايشىلارمەن بەيبىت كەلىسىمگە كەلۋ ءۇشىن ۋاقىت بەرىلىپ وتىر. وسىعان وراي، ءبىز پايشىلاردى سەرىكتەستىككە قايتا ورالۋعا، بىرگە جۇمىس ىستەۋگە، سايكەسىنشە ديۆيدەندتەرىن الۋعا شاقىرامىز»، – دەدى باقتيار وسپانوۆ.
«زەرەندى-استىق» جشس مالىمەتىنشە، سەرىكتەستىك قۇرامىنان شىعىپ كەتكەن شامامەن 70 پايشى 2023 جىلى قايتا ورالعان. قازىرگى تاڭدا تاعى 30-دان استام پايشى قايتا سەرىكتەستىك قۇرامىنا ءوتۋ بويىنشا دايىندىق جۇمىستارىن جۇرگىزىپ جاتىر.
«قازاقستان استىق كونسورتسيۋمى» جشس باس ديرەكتورى باقتيار وسپانوۆ بۇل رەتتە پايشىلارعا تولەنەتىن ديۆيدەند مولشەرى دە ۇلعايعانىن ەسكە سالدى. ەگەر «قازەكسپورتاستىق» كومپانياسى ينۆەستور بولعان تۇستا پايشىلار ءونىمنىڭ 5 پايىزى مولشەرىندە تولەماقى السا، بۇگىندە ول 7,5 پايىزدى قۇرايدى.
قۇرامىنا 23 شارۋاشىلىق كىرەتىن قازاقستان استىق كونسورتسيۋمى باسشىسى كومپانيانىڭ الەۋمەتتىك جاۋاپكەرشىلىك جانە كومپانيانى تەحنيكالىق جاراقتاندىرۋ باعىتىنداعى جۇمىستار تۋرالى دا باياندادى. كومپانيا بيىل 43 جاڭا كومباين (10-ى – يمپورتتىق ءونىم) ساتىپ السا، 2025 جىلعى كوكتەمدە اۋىل شارۋاشىلىعى تەحنيكالارىنىڭ قاتارى 32 ەگىن ەگۋ كەشەنىمەن تولىعادى. كومپانيا الەۋمەتتىك جاۋاپكەرشىلىك اياسىندا جىل سايىن اۋىلدار اراسىنداعى جولدى قاردان تازالاۋ جۇمىستارىن ءوز كۇشىمەن جۇزەگە اسىرادى. سونداي-اق، «زەرەندى-استىق» جشس پايشىلارى تۇراتىن، ەڭبەك ەتەتىن اۋىلداردا مادەنيەت ءۇيىن، مەديتسينالىق پۋنكتىن جوندەۋ جۇمىستارىن جۇزەگە اسىرىپ جاتىر.
«وكىنىشكە قاراي، بيىلعا دەيىن «زەرەندى-استىق» جشس كورسەتكىشتەرى تومەن بولدى. وعان قوسا، پايشىلاردىڭ سەرىكتەستىكتەن كەتۋى كومپانيانىڭ جوعارى دامۋىنا مۇمكىندىك بەرمەي كەلدى. سوعان قاراماستان، كومپانيا الەۋمەتتىك جاۋاپكەرشىلىك اياسىنداعى ءوز مىندەتتەمەلەرىن ورىنداپ كەلەدى. ءبىز تەك ءتورتىنشى جىل دەگەندە سەرىكتەستىك تابىسقا شىعادى دەپ بولجاپ وتىرمىز. تابىستىڭ ارتۋىنا قاراي وبلىستا الەۋمەتتىك باعىتتاعى جۇمىستاردى كوبىرەك ورىنداۋعا كۇش سالامىز»، – دەدى باقتيار وسپانوۆ.
