قاراعاندى وبلىسىندا قازاقستان ۇلتتىق عىلىم اكادەمياسىنىڭ كوشپەلى وتىرىسى ءوتتى. جيىن بارىسىندا ەلدە مەديتسينانى قالاي قول جەتىمدى جانە زاماناۋي ەتۋ جولدارى تالقىلاندى.
وبلىس اكىمى ەرماعانبەت بولەكپاەۆ ءوڭىردىڭ كەزدەسۋ ءۇشىن كەزدەيسوق تاڭدالماعانىن اتاپ ءوتتى: مۇندا تەلەمەديتسينا بەلسەندى دامىپ، زاماناۋي تەحنولوگيالار ەنگىزىلۋدە. جەرگىلىكتى تۇرعىندار، مىسالى، كەزدەسۋگە جازىلۋ نەمەسە ۇيدەن شىقپاي-اق تەست ناتيجەلەرىن الۋ ءۇشىن "دامۋمەد" قوسىمشاسىن قولدانادى.
– ءبىز يننوۆاتسيالاردى ەنگىزۋ ارقىلى مەديتسينالىق ءبىلىمدى، عىلىم مەن پراكتيكانى بىرىكتىرۋگە ۇلكەن ءمان بەرەمىز. تەلەمەديتسينانىڭ بەلسەندى دامۋى شالعايداعى ەلدى مەكەندەردە دە بىلىكتى مەديتسينالىق كومەكتىڭ قولجەتىمدىلىگىن جاقسارتۋعا مۇمكىندىك بەردى، – دەدى ءوڭىر باسشىسى.
قر ۇعا پرەزيدەنتى اقىلبەك كۇرىشباەۆ پروبلەمالىق ماسەلەلەردى دە اينالىپ وتپەدى: قارجىلاندىرۋدىڭ جەتىسپەۋشىلىگى، مامانداردىڭ تاپشىلىعى، مەديتسينانىڭ قولجەتىمدىلىك دەڭگەيى. الدىن الۋ، دياگنوستيكانى جاقسارتۋ جانە ەمدەۋ ءۇشىن تەحنولوگيانى قالاي پايدالانۋ كەرەكتىگى تۋرالى شەشىمدەردى تابۋعا باسا نازار اۋدارىلدى. سونداي-اق، دارىلىك زاتتار مەن تسيفرلىق مەديتسينانىڭ وتاندىق ءوندىرىسىن دامىتۋ باسىمدىققا يە بولۋعا ءتيىس.
– ءبىز قازىرگى زاماننىڭ جاھاندىق سىن-تەگەۋرىندەرىنىڭ ىقپالىن ەسكەرە وتىرىپ، مەديتسينا مەن دەنساۋلىق ساقتاۋداعى عىلىمي زەرتتەۋلەردىڭ باسىم باعىتتارىن دۇرىس ايقىنداۋعا ءتيىسپىز. حالىق اراسىندا سالاۋاتتى ءومىر سالتىن ناسيحاتتاۋ جۇيەسىن قۇرۋ دا اسا ماڭىزدى، – دەپ اتاپ ءوتتى اقىلبەك كۇرىشباەۆ.
كەزدەسۋدە ونكولوگيا، بالالار مەديتسيناسىنداعى يننوۆاتسيالار، ميكروبيولوگيانى دامىتۋ، ءمامس رەفورماسى تالقىلاندى.
قاراعاندىلىق عالىمدار عىلىمي-يننوۆاتسيالىق كورمەدە ءوز ازىرلەمەلەرىن ۇسىندى.
تالقىلاۋعا قازاقستاننىڭ دەنساۋلىق ساقتاۋ، عىلىم جانە جوعارى ءبىلىم مينيسترلەرى، پارلامەنت سەناتىنىڭ دەپۋتاتتارى، قازاقستان پرەزيدەنتى جانىنداعى قر ۇعا اكادەميكتەرى، جوعارى وقۋ ورىندارى مەن عىلىمي-زەرتتەۋ ينستيتۋتتارىنىڭ، مەديتسينالىق جانە قوعامدىق ۇيىمداردىڭ باسشىلارى قاتىستى.
ۇعا اكادەميگى ۆياچەسلاۆ لوكشين رەپرودۋكتيۆتى مەديتسينادا جي قولدانۋ تاجىريبەسىن ارىپتەستەرىمەن ءبولىستى.
– بۇگىندە ءاربىر سالادا جاساندى ينتەللەكتتى قولدانۋ مۇمكىندىكتەرىن قاراستىرۋ قاجەت، ال بۇل باعىتتى تەك جاقسى ينۆەستيتسيالىق قورمەن كوپ ورتالىقتى بايىپتى زەرتتەۋلەر ارقىلى دامىتۋعا بولادى. سودان كەيىن ءبىز ساپادا دا، شىعىنداردى ازايتۋدا دا كوپ پايدا كورەمىز. جاساندى ينتەللەكت بۇگىندە مامانداردى ءساتتى الماستىرا الادى. ال دارىگەرلەر ولاردىڭ كومەگىنە وتە مۇقتاج پاتسيەنتتەرمەن تىعىز قارىم-قاتىناس جاسايدى، – دەيدى ۆياچەسلاۆ لوكشين.
وتىرىس قورىتىندىسى بويىنشا قازاقستاندا مەديتسينا عىلىمىن دامىتۋ بويىنشا قارار قابىلداندى
