6 qazan, Astana qalasynda respublikalyq «Zerdelı» oqu ortalyǧy qūrylǧanyna 10 jyl tolǧan mereitoiyn atap öttı. Saltanatty şarada ortalyqtyŋ negızın qalauşy aǧaiyndy Yrysbek jäne Öjet Mäuıt üzdık pedagogterge päter sertifikaty men Dubaiǧa joldama syilady.
«Zerdelınıŋ 10 jyldyǧymen qatar kelgen ūstazdar künınde 7 mūǧalımge baspana aluǧa qoldau körsettık. Būǧan deiın de 25 ūstazymyzdyŋ üilı boluyna qoldau körsetken edık. Būl ürdıs älı de jalǧasa bermek. Ūstazdyq etıp, jas örennıŋ ösıp, önuıne ǧūmyryn sarp etken jandar üşın qandai qoldau körsetsek te laiyqty. Taǧy bır tosyn syi ol - 15 adamǧa Dubaiǧa demalys joldamasyn berdım. Tek ötken oqu jylynda Zerdelıde qyzmet jasaǧan 100-ge jaqyn ūstazdarymyz osyndai joldamamen Dubaida demalyp kelgen eken», - dedı Yrysbek Mäuıt.
Bügınde elımızdıŋ 18 oblysynda Zerdelınıŋ 41 ortalyǧy, 7 mektebı, 50-ge jaqyn bölımşesı bar. Bır ǧana Astananyŋ özınde 500-ge juyq pedagog qyzmet atqarady.
«Merekede sapaly ärı adal qyzmetterı üşın aqşalai syiaqy, aifonnyŋ soŋǧy ülgısı de qyzmetkerlerımızge tabystaldy. Prezidentımızdıŋ «Pedagog märtebesın köteru – memlekettık saiasattyŋ maŋyzdy bölıgı» degen sözın eske ala otyryp, ūstazdarymyzǧa qūrmet pen materialdyq qoldaudyŋ qatar jüruı qajet dep sanaimyz», - dedı käsıpker-pedagog.
Aita ketetını, merekelık keşke elımızdıŋ mädeniet jäne öner qairatkerlerı kelıp, än men jyrdan şaşu şaşty. Qūrmettı qonaqtardyŋ qatarynda dästürlı änşı Erlan Rysqali men aqyn Qalqaman Sarin boldy.
Aita keteiık, «Zerdelı» ortalyǧy – elımızdegı daryndy oquşylarǧa baǧyttalǧan bılım beru ortalyqtarynyŋ bırı. 10 jyl ışınde ol elımızdıŋ eŋ ırı oqu oryndarynyŋ bırıne ainaldy.
