دەموكراتيا تۇرعىسىنان الساق، رەفەرەندۋم – حالىقپەن ساناسۋدىڭ ەڭ بيىك كورىنىسى. مۇنداي پىكىردى بەلدى وزبەكستاندىق ساياساتتانۋشى، «ءبىلىم كەرۋەنى» مەملەكەتتىك ەمەس عىلىمي ءبىلىم بەرۋ مەكەمەسىنىڭ ديرەكتورى فارحود توليپوۆ ءبىلدىردى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
فارحود توليپوۆ اتاپ وتكەندەي، تەك اەس ەمەس، جالپى كەز كەلگەن وڭىردە بوي كوتەرەتىن وندىرىستىك نىسان سول ايماقتىڭ دامۋىنا ءسوزسىز ىقپال ەتەدى. بۇل رەتتە ۇسىنىسقا بىرجاقتى قاراۋعا بولمايدى، ياعني يدەيا تولىق زەردەلەنىپ، اق-قاراسى ءادىل ساراپقا سالىنعانى ءجون.
«ەگەر قازىرگى تاڭدا ايتىلىپ جۇرگەن اتوم ەلەكتر ستانتسيالارىنىڭ قاۋىپسىزدىگىنە قاتىستى پىكىرلەردى ەسكەرمەي، ماسەلەگە بىرجاقتى قاراساق، وندا ول دا حالىقتىڭ ءومىرىن جاقسارتۋعا اسەر ەتەتىنىن كورۋگە بولادى. ويتكەنى، ءبىرىنشى كەزەكتە اەس - ەلەكتر ەنەرگياسىمەن قامتاماسىز ەتۋگە باعىتتالعان جوبا. تيىسىنشە، ول سول وبلىستاعى نەمەسە وزگە دە وڭىرلەردەگى مەملەكەتتىك نىسانداردى، جەكە سەكتوردى جارىقپەن قامتاماسىز ەتەدى. دەگەنمەن بۇل رەتتە اەس قۇرىلىسىنا بىرجاقتى باعا بەرۋگە بولمايدى. سەبەبى، ول - وتە ماڭىزدى ستراتەگيالىق نىسان. سوندىقتان ونىڭ پايداسىمەن قاتار، وزگە دە ەرەكشەلىكتەرىن تولىق ەسكەرىپ بارىپ شەشىم قابىلداۋ ورىندى بولماق»، - دەپ پىكىر قوستى ساياساتتانۋ عىلىمدارىنىڭ كانديداتى.
ونىڭ پايىمداۋىنشا، اەس سالىناتىن ءوڭىردىڭ بارلىق ەرەكشەلىكتەرى ەسكەرىلۋى ءتيىس. ويتكەنى، الەم ەلدەرىندە بوي كوتەرىپ جاتقان ەنەرگوبلوكتاردىڭ بارلىعى تەك ءبىر عانا تەحنولوگيامەن سالىنبايدى. سوندىقتان اەس-ءتى ايماقتىڭ گەوگرافيالىق، گيدرولوگيالىق جانە سەيسمولوگيالىق جاعدايىنا بەيىمدەپ قۇرۋ قاعيداسى ءبىرىنشى ورىندا بولۋى قاجەت.
«ءار اەس سالىنعان نەمەسە سالىناتىن ەلىنە، جەرىنە بايلانىستى ەرەكشەلەنەدى. اتوم ەنەرگەتيكاسى سالاسىندا ىلگەرى دامىعان اقش، فرانتسيا، قىتاي جانە جاپونيا سياقتى ەلدەردە بوي كوتەرگەن اەس-تەر سول مەملەكەتتىڭ كليماتىنا، بولۋى مۇمكىن قاۋىپ-قاتەرىنە بەيىمدەلگەن. بۇل رەتتە جۇيەلەنگەن ءبىر عانا تەحنولوگيا بار دەپ ايتۋ قيىن. ماسەلەن، ءبىزدىڭ وڭىردە جەر سىلكىنىستەرى بولىپ تۇرادى، سونداي-اق سۋ تاپشىلىعى بايقالادى. بۇلاردىڭ بارلىعى اەس-ءتىڭ قۇرىلىسى تۋرالى يدەيانى تالقىلاۋ كەزىندە جان-جاقتى ەسكەرىلۋى ءتيىس»، - دەيدى فارحود توليپوۆ.
وسى ورايدا ساراپشىنىڭ ويى اەس حالىق ءۇشىن سالىناتىنىن ەسكەرە وتىرىپ، ونىڭ بارلىق تەحنولوگيالىق پروتسەسى تۇرعىندارعا اشىق ءارى شىنايى فاكتىمەن ءتۇسىندىرىلۋى كەرەك دەگەنگە سايادى.
«اەس-ءتىڭ قۇرىلىسىنا قاتىستى كەيبىر سۇراقتار جابىق كۇيىندە قالىپ قويادى. بۇل نىسان حالىق يگىلىگى ءۇشىن سالىناتىن بولعاندىقتان، ءبىز ونىڭ پايداسى مەن تەرىس تۇستارىن جانە جالپى اتوم ەنەرگياسىنىڭ بولاشاعىنان تولىق حاباردار بولۋىمىز ءتيىس. اتاپ ايتقاندا، تۇرعىندار اتوم ەلەكتر ستانتسياسىنىڭ قۇرىلىسىنان باستاپ، تەحنولوگيالىق پروتسەسىنە دەيىنگى اقپاراتتارمەن قامتاماسىز ەتىلۋى قاجەت»، - دەگەن پىكىردە ساراپشى.
سونداي-اق، فارحود توليپوۆ قازاقستاندا وتەتىن اەس قۇرىلىسى جونىندەگى رەفەرەندۋمعا قاتىستى پىكىر ءبىلدىردى. ول اتاپ وتكەندەي، ستراتەگيالىق ماڭىزدى نىساننىڭ قۇرىلىسىنا قاتىستى سۇراقتى حالىقپەن اقىلداسىپ شەشكەن ورىندى باستاما. دەگەنمەن وعان دەيىن اشىق ءارى ءادىل تالقىلاۋ ءوتۋى كەرەك، سايكەسىنشە تۇرعىنداردىڭ ويىندا اەس تۋرالى تۇسىنىك قالىپتاسادى.
«دەموكراتيا تۇرعىسىنان الساق، رەفەرەندۋم – حالىق پىكىرىمەن ساناسۋدىڭ ەڭ بيىك كورىنىسى. اەس قۇرىلىسى رەفەرەندۋمعا شىعارۋعا تۇرارلىق ماسەلە. ۇلتتىق دەڭگەيدە بۇدان دا ماڭىزدى سۇراقتار ءجيى كەزدەسە بەرمەيدى دەپ ەسەپتەيمىن. مەنىڭ ويىمشا، حالىق ساناسىمەن ۇعىنىپ، جۇيەلى ساراپتاپ بارىپ داۋىس بەرەدى. كەيبىر كەزدەردە ازاماتتار كوتەرىلىپ وتىرعان سۇراقتىڭ بايىبىنا بارماي، تاڭداۋ جاساپ جاتادى. سوندىقتان رەفەرەندۋمعا دەيىن اشىق تالقىلاۋلار ءوتىپ، بىلىكتى مامانداردىڭ پىكىرلەرى ەسكەرىلۋى ءتيىس. وسىنىڭ ناتيجەسىندە حالىقتا اەس تۋرالى تۇسىنىك قالىپتاسادى»، - دەپ تۇيىندەدى فارحود توليپوۆ.
