ەلىمىزدە مەملەكەت باسشىسىنىڭ باستاماسىمەن قولعا الىنعان «جايلى مەكتەپ» ۇلتتىق جوباسى بەلسەندى تۇردە جۇزەگە اسىرىلۋدا. بۇگىن تسەلينوگراد اۋدانىنداعى اقمول اۋىلىندا تاعى ءبىر ءبىلىم ۇيىمى ەسىگىن ايقارا اشتى.
اشىلۋ سالتاناتىنا اقمولا وبلىسىنىڭ اكىمى مارات احمەتجانوۆ پەن قازاقستان رەسپۋبليكاسىنىڭ وقۋ-اعارتۋ ءمينيسترى عاني بەيسەمباەۆ قاتىستى.
مەكتەپ اۋىسىمىنا 1200 بالا قابىلداي الادى. مۇندا 93 كابينەت، ونىڭ ىشىندە 4 ينفورماتيكا كابينەتى، 7 مامانداندىرىلعان كابينەت، 2 سپورت زالى، اسحانا، كىتاپحانا، حورەوگرافيا كابينەتتەرى بار.
اقمولا وبلىسىنىڭ اكىمى مارات احمەتجانوۆ مەكتەپتىڭ اشىلۋىمەن قۇتتىقتاپ، جاڭا وقۋ جىلىندا وبلىستا 5 مەكتەپ اشىلعانىن، ونىڭ تورتەۋى «جايلى مەكتەپ» ۇلتتىق جوباسى بويىنشا سالىنعانىن اتاپ ءوتتى.
«جوبا مەكتەپتەردەگى ورىن تاپشىلىعى ماسەلەسىن شەشىپ، وقۋشىلار مەن مۇعالىمدەرگە قولايلى جاعداي جاسايدى. بەلگىلى بولعانداي، ەلوردادان الىس ەمەس جەردە ورنالاسقان تسەلينوگراد اۋدانىندا حالىقتىڭ كوشى-قونى ماسەلەسى بۇرىننان ورىن الىپ، دەموگرافيالىق كورسەتكىشتەردىڭ وسۋىنە بايلانىستى مەكتەپتەردە وقۋشى ورىندارىنىڭ تاپشىلىعى تۋىنداپ وتىر. سوندىقتان قۇرىلىستى جوسپارلاۋ كەزىندە وسى سالاعا كوپ كوڭىل ءبولىندى. قابىلدانعان «ءبىرتۇتاس تاربيە» باعدارلاماسى اياسىندا اتا-انالارمەن بىرلەسىپ ءتيىمدى پروفيلاكتيكالىق جانە اقپاراتتىق جۇمىستاردى جالعاستىرۋمەن قاتار، بالالاردى وقىتۋ مەن تاربيەلەۋگە قولايلى جاعداي جاساۋ ماڭىزدى»، - دەپ اتاپ ءوتتى م.احمەتجانوۆ.
وقۋشىلار مەن ۇستازدار الدىندا ءسوز سويلەگەن ءبىلىم ءمينيسترى عاني بەيسەمباەۆ مەملەكەت باسشىسىنىڭ باستاماسىمەن قولعا الىنعان «جايلى مەكتەپ» ۇلتتىق جوباسىنىڭ ءبىلىم ساپاسىن ارتتىرۋ، قالا مەن اۋىل مەكتەپتەرىنىڭ ايىرماشىلىعىن تەڭەستىرۋدەگى ماڭىزدىلىعىن اتاپ ءوتتى.
«ءبىلىم ساپاسىن ارتتىرۋدا باستى ءرول پەداگوگيكالىق ۇجىمعا تيەسىلى. بىلتىردان بەرى ەلىمىزدە «ءبىلىم بەرۋدەگى وزگەرىستەردىڭ 1000 كوشباسشىسى» اتتى جاڭا فورماتتاعى ۇستازداردى ىرىكتەۋ جانە دايارلاۋ باعدارلاماسى جۇزەگە اسىرىلۋدا. بۇگىنگى تاڭدا 130-دان استام تالاپكەر جايلى مەكتەپتەرگە ديرەكتور بولىپ تاعايىندالدى. تاربيە جۇمىسى باسىم باعىت بولىپ قالا بەرەدى»، - دەدى مينيستر.
ساپار بارىسىندا وبلىس اكىمى مەن وقۋ-اعارتۋ ءمينيسترى مەكتەپ وقۋشىلارىنىڭ تاماقتانۋىن ۇيىمداستىرۋ مەن بالالاردىڭ قاۋىپسىزدىگىن قامتاماسىز ەتۋدى تەكسەردى. سونىمەن قاتار، «ءبىرتۇتاس تاربيە» باعدارلاماسى اياسىندا جۇزەگە اسىرىلىپ جاتقان اتا-انالارعا پەداگوگيكالىق قولداۋ كورسەتۋ ورتالىعى، اكەلەر كەڭەسىنىڭ كلۋبى جانە «دانالىق مەكتەبى» تانىستىرىلدى. ولاردىڭ اشىلۋى، ەڭ الدىمەن، وڭ اتا-انا تاربيەسىن دامىتۋعا، بالا تاربيەسىندە مەكتەپ پەن وتباسىنىڭ ءوزارا ارەكەتتەسۋىن نىعايتۋعا، پاتريوتيزمگە باعىتتالعان.
