Elimizde Memleket basshysynyń bastamasymen qolǵa alynǵan «Jaıly mektep» ulttyq jobasy belsendi túrde júzege asyrylýda. Búgin elınograd aýdanyndaǵy Aqmol aýylynda taǵy bir bilim uıymy esigin aıqara ashty.
Ashylý saltanatyna Aqmola oblysynyń ákimi Marat Ahmetjanov pen Qazaqstan Respýblıkasynyń oqý-aǵartý mınıstri Ǵanı Beısembaev qatysty.
Mektep aýysymyna 1200 bala qabyldaı alady. Munda 93 kabınet, onyń ishinde 4 ınformatıka kabıneti, 7 mamandandyrylǵan kabınet, 2 sport zaly, ashana, kitaphana, horeografııa kabınetteri bar.
Aqmola oblysynyń ákimi Marat Ahmetjanov mekteptiń ashylýymen quttyqtap, jańa oqý jylynda oblysta 5 mektep ashylǵanyn, onyń tórteýi «Jaıly mektep» ulttyq jobasy boıynsha salynǵanyn atap ótti.
«Joba mektepterdegi oryn tapshylyǵy máselesin sheship, oqýshylar men muǵalimderge qolaıly jaǵdaı jasaıdy. Belgili bolǵandaı, elordadan alys emes jerde ornalasqan elınograd aýdanynda halyqtyń kóshi-qony máselesi burynnan oryn alyp, demografııalyq kórsetkishterdiń ósýine baılanysty mektepterde oqýshy oryndarynyń tapshylyǵy týyndap otyr. Sondyqtan qurylysty josparlaý kezinde osy salaǵa kóp kóńil bólindi. Qabyldanǵan «Birtutas tárbıe» baǵdarlamasy aıasynda ata-analarmen birlesip tıimdi profılaktıkalyq jáne aqparattyq jumystardy jalǵastyrýmen qatar, balalardy oqytý men tárbıeleýge qolaıly jaǵdaı jasaý mańyzdy», - dep atap ótti M.Ahmetjanov.
Oqýshylar men ustazdar aldynda sóz sóılegen Bilim mınıstri Ǵanı Beısembaev Memleket basshysynyń bastamasymen qolǵa alynǵan «Jaıly mektep» ulttyq jobasynyń bilim sapasyn arttyrý, qala men aýyl mektepteriniń aıyrmashylyǵyn teńestirýdegi mańyzdylyǵyn atap ótti.
«Bilim sapasyn arttyrýda basty ról pedagogıkalyq ujymǵa tıesili. Byltyrdan beri elimizde «Bilim berýdegi ózgeristerdiń 1000 kóshbasshysy» atty jańa formattaǵy ustazdardy irikteý jáne daıarlaý baǵdarlamasy júzege asyrylýda. Búgingi tańda 130-dan astam talapker jaıly mektepterge dırektor bolyp taǵaıyndaldy. Tárbıe jumysy basym baǵyt bolyp qala beredi», - dedi mınıstr.
Sapar barysynda oblys ákimi men oqý-aǵartý mınıstri mektep oqýshylarynyń tamaqtanýyn uıymdastyrý men balalardyń qaýipsizdigin qamtamasyz etýdi tekserdi. Sonymen qatar, «Birtutas tárbıe» baǵdarlamasy aıasynda júzege asyrylyp jatqan ata-analarǵa pedagogıkalyq qoldaý kórsetý ortalyǵy, Ákeler keńesiniń klýby jáne «Danalyq mektebi» tanystyryldy. Olardyń ashylýy, eń aldymen, oń ata-ana tárbıesin damytýǵa, bala tárbıesinde mektep pen otbasynyń ózara árekettesýin nyǵaıtýǵa, patrıotızmge baǵyttalǵan.
