قازاقستانعا بۇرشاق جانە بۇرىش دەگەن جالعان اتپەن 200 مىڭ قوراپ تەمەكى اكەلمەك بولعاندار انىقتالدى، دەپ حابارلايدى "ادىرنا" ۇلتتىق پورتالى قر قارجى مينيسترلىگى مەملەكەتتىك كىرىستەر كوميتەتىنىڭ ءباسپاسوز قىزمەتىنە سىلتەپ.
«قاراسۋ باقىلاۋ-وتكىزۋ بەكەتىندە جۇك قۇجاتتارىنا سايكەس بولگار بۇرىشى تاسىمالدانادى دەلىنگەن توڭازىتقىشتان تەمەكى تابىلدى. تەكسەرۋ بارىسىندا دەكلاراتسيالانباعان 180 مىڭنان استام قوراپ Oris, Parlament, Zumerret تەمەكىلەرى تابىلدى. «ايشا ءبيبى» باقىلاۋ-وتكىزۋ بەكەتىندە جۇك تاسىمالداۋ قۇجاتتارىنا سايكەس بۇرشاق تاسيتىن جۇك كولىگىنەن دەكلاراتسيالانباعان 15 مىڭ قوراپ Oris تەمەكىسى تابىلدى»، - دەلىنگەن حابارلامادا.
زاڭسىز جونەلتىلىمدەردى 2024 جىلدىڭ 26 قىركۇيەگىندە مەملەكەتتىك كىرىستەر مەن شەكارا قىزمەتىنىڭ قىزمەتكەرلەرى ۇستاعانى حابارلاندى.
مالىمەتتەرگە سايكەس، بارلىق تەمەكى بۇيىمدارىندا اكتسيزدەلەتىن ونىمدەرگە ارنالعان سايكەستەندىرۋ قۇرالدارى جوق.
