«ونەر ءبىلىم بار جۇرتتار
تاستان ساراي سالعىزدى.
ايشىلىق الىس جەرلەردەن,
كوزىڭدى اشىپ جۇمعانشا,
جىلدام حابار العىزدى.
اتى جوق قۇر اربانى
مىڭ شاقىرىم جەرلەرگە,
كۇن جارىمدا بارعىزدى» - دەپ ۇلى اعارتۋشى ىبىراي التىنسارين ايتىپ كەتكەندەي، الەمنىڭ وسىنداي دارەجەگە كوتەرىلىپ، كوپ نارسەگە قول جەتكىزۋى عىلىم مەن ءبىلىمنىڭ قارىشتاپ دامۋىنىڭ ارقاسىندا. سول ءتارىزدى قازاق ەلىنىڭ بولاشاعى، الەمگە وركەنيەتى وزىق ەل بولىپ تانىلۋى كوزى اشىق، كوكىرەگى وياۋ ءبىلىمدى دە سانالى ۇرپاقتىڭ قولىندا! وسى جولدا عىلىم مەن ءبىلىمدى دامىتۋ ءۇشىن ەلىمىزدە ءتيىستى شارالار قابىلدانۋدا.
«ءبىلىمدى ۇلت – ساپالى ءبىلىم» ۇلتتىق جوباسى
بۇل جوبا – قازاقستاننىڭ ءبىلىم بەرۋ سالاسىن دامىتۋعا باعىتتالعان مەملەكەتتىك باعدارلامالاردىڭ ءبىرى. بۇل جوبا ەلىمىزدىڭ ءبىلىم بەرۋ جۇيەسىن جاڭعىرتىپ، حالىقارالىق ستاندارتتارعا ساي ءبىلىم بەرۋ ساپاسىن جاقسارتۋدى ماقسات ەتەدى. جوبا 2021 جىلى قابىلدانعان جانە 2025 جىلعا دەيىن جۇزەگە اسىرىلماق. جوبانىڭ نەگىزگى ماقساتىن اتاپ ايتار بولساق, «بءىلىمدى ۇلت» جوباسىنىڭ باستى ماقساتى – ساپالى جانە قولجەتىمدى ءبىلىم بەرۋ ارقىلى باسەكەگە قابىلەتتى، ءبىلىمدى، كاسىبي شەبەر ازاماتتاردى تاربيەلەۋ. سونىمەن قاتار، بۇل جوبا قازاقستاننىڭ ءبىلىم بەرۋ جۇيەسىنىڭ حالىقارالىق دەڭگەيگە ساي بولۋىنا، ينكليۋزيۆتى ءبىلىم بەرۋدى دامىتۋعا، جانە تسيفرلىق تەحنولوگيالاردى ەنگىزۋگە باعىتتالعان.
جوبا بىرنەشە ماڭىزدى باعىتتاردى قامتيدى:
جوبا اياسىندا بالالاردىڭ مەكتەپكە دەيىنگى بىلىمگە قولجەتىمدىلىگىن قامتاماسىز ەتۋ ماقساتىندا مەكتەپكە دەيىنگى مەكەمەلەردىڭ سانىن ارتتىرۋ، ولاردىڭ ساپاسىن كوتەرۋ كوزدەلەدى. ەرتە جاستان ءبىلىم الۋعا قولايلى جاعداي جاساۋ ارقىلى بالالاردىڭ تانىمدىق جانە شىعارماشىلىق قابىلەتتەرىن دامىتۋعا نازار اۋدارىلماق.
ورتا ءبىلىم بەرۋ جۇيەسىن جاڭعىرتۋ، ءبىلىم بەرۋدىڭ ساپاسىن ارتتىرۋ جانە ءبىلىم الۋشىلاردىڭ ناتيجەلەرىن جاقسارتۋ – جوبانىڭ باستى باسىمدىقتارىنىڭ ءبىرى. بۇل باعىتتا مەكتەپتەردى مودەرنيزاتسيالاۋ، زاماناۋي جابدىقتارمەن قامتاماسىز ەتۋ، ءبىلىم بەرۋ باعدارلامالارىن جاڭارتۋ جانە مۇعالىمدەردىڭ بىلىكتىلىگىن ارتتىرۋ شارالارى قاراستىرىلعان.
• تسيفرلىق ءبىلىم بەرۋ جانە اقپاراتتىق تەحنولوگيالار
جوبا تسيفرلىق ءبىلىم بەرۋ تەحنولوگيالارىن ەنگىزۋگە ەرەكشە كوڭىل بولەدى. بارلىق ءبىلىم بەرۋ دەڭگەيلەرىندە ونلاين جانە قاشىقتىقتان وقىتۋ جۇيەسىن دامىتۋ، ەلەكتروندى وقۋلىقتار مەن وقۋ-ادىستەمەلىك قۇرالداردى قولدانۋ، مەكتەپتەر مەن جوعارى وقۋ ورىندارىن جوعارى جىلدامدىقتى ينتەرنەتپەن قامتاماسىز ەتۋ جوسپارلانعان.
• ينكليۋزيۆتى ءبىلىم بەرۋ
ءبىلىم بەرۋ جۇيەسىنىڭ ينكليۋزيۆتى بولۋىن قامتاماسىز ەتۋ، ياعني ەرەكشە قاجەتتىلىكتەرى بار بالالار مەن جاستار ءۇشىن قولجەتىمدى ءبىلىم بەرۋ مۇمكىندىكتەرىن جاساۋ – جوبانىڭ ماڭىزدى مىندەتتەرىنىڭ ءبىرى. بۇل باعىتتا ارنايى وقۋ باعدارلامالارى مەن ادىستەمەلەر ازىرلەنەدى، سونداي-اق، وقۋ ورىندارىن ارنايى قۇرال-جابدىقتارمەن قامتاماسىز ەتۋ جوسپارلانعان.
• پەداگوگتاردىڭ مارتەبەسىن ارتتىرۋ
«ءبىلىمدى ۇلت» جوباسى اياسىندا مۇعالىمدەردىڭ مارتەبەسىن كوتەرۋ، ولاردىڭ ەڭبەكاقىسىن ارتتىرۋ جانە كاسىبي دامۋىن قامتاماسىز ەتۋ شارالارى قاراستىرىلعان. بۇل باعىتتا مۇعالىمدەردىڭ بىلىكتىلىگىن ارتتىرۋ كۋرستارى، تاجىريبە الماسۋ باعدارلامالارى، حالىقارالىق وقىتۋ ادىستەرىن ەنگىزۋ جۇمىستارى جۇرگىزىلۋدە.
• جوعارى ءبىلىم بەرۋ مەن عىلىمدى دامىتۋ
جوعارى وقۋ ورىندارى مەن عىلىمي-زەرتتەۋ ورتالىقتارىن دامىتۋ دا جوبا اياسىنداعى باسىم باعىتتاردىڭ ءبىرى. وقۋ ورىندارىنىڭ عىلىمي الەۋەتىن كوتەرۋ، ولاردىڭ الەمدىك ۋنيۆەرسيتەتتەر رەيتينگىسىندە جوعارى ورىندارعا يە بولۋىن قامتاماسىز ەتۋ، شەتەلدىك ۋنيۆەرسيتەتتەرمەن جانە عىلىمي ورتالىقتارمەن ىنتىماقتاستىق ورناتۋ جوسپارلانعان.
• تەحنيكالىق جانە كاسىپتىك ءبىلىم بەرۋ جۇيەسىن دامىتۋ
تەحنيكالىق جانە كاسىپتىك ءبىلىم بەرۋ جۇيەسىن جاڭعىرتۋ ارقىلى قازاقستان ەكونوميكاسىنىڭ سۇرانىسىنا سايكەس ماماندار دايارلاۋ كوزدەلەدى. بۇل باعىتتا دۋالدى وقىتۋ جۇيەسىن دامىتۋ، كوللەدجدەر مەن كاسىپتىك ءبىلىم بەرۋ مەكەمەلەرىن زاماناۋي قۇرال-جابدىقتارمەن قامتاماسىز ەتۋ جۇمىستارى جۇرگىزىلەدى.
جوبانىڭ ناتيجەلەرىنە توقتالار بولساق:
2025 جىلعا دەيىن «ءبىلىمدى ۇلت – ساپالى ءبىلىم» ۇلتتىق جوباسى اياسىندا كەلەسى ناتيجەلەرگە قول جەتكىزۋ جوسپارلانعان:
- مەكتەپكە دەيىنگى بىلىممەن قامتىلعان بالالاردىڭ سانىن 100%-عا جەتكىزۋ;
- مەكتەپتەردىڭ 90%-ىن زاماناۋي قۇرال-جابدىقتارمەن قامتاماسىز ەتۋ;
- جوعارى ءبىلىم بەرۋ ساپاسىن ارتتىرىپ، الەمدىك رەيتينگتەردە قازاقستاندىق ۋنيۆەرسيتەتتەردى جوعارى ورىندارعا شىعارۋ;
- پەداگوگتاردىڭ ەڭبەكاقىسىن 2 ەسە ارتتىرۋ;
- ەرەكشە قاجەتتىلىكتەرى بار بالالاردىڭ ءبىلىم الۋىنا قولايلى جاعداي جاساۋ.
«ءبىلىمدى ۇلت – ساپالى ءبىلىم» ۇلتتىق جوباسى قازاقستاننىڭ ءبىلىم بەرۋ جۇيەسىن جاڭا دەڭگەيگە كوتەرۋدى كوزدەيدى. بۇل جوبا جاستاردىڭ ءبىلىم الۋعا قولجەتىمدىلىگىن ارتتىرۋعا، ءبىلىم ساپاسىن جاقسارتۋعا جانە باسەكەگە قابىلەتتى مامانداردى دايارلاۋعا باعىتتالعان.
ايگۇل مۇراتقىزى
