اقمولا ءوڭىرى جاتىر موينى وبىرىنىڭ نەگىزگى قوزدىرعىشى – ادام پاپيللوماۆيرۋسىنا قارسى ۆاكتسينانىڭ العاشقى پارتيالارى كەلىپ تۇسكەن ەلدىڭ سەگىز وبلىسىنىڭ قاتارىنا كىردى.
اقمولا وبلىسىنىڭ سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى ايناگۇل مۋسينانىڭ ايتۋىنشا، يممۋنداۋدان كەيىن كەرى اسەرى تىركەلگەن جوق.
«ادام پاپيللوماۆيرۋسىنا قارسى ۆاكتسيناتسيا قازاقستان رەسپۋبليكاسىنىڭ ۇلتتىق ەگۋ كۇنتىزبەسىنە ەنگىزىلدى. ۆاكتسينا 11 جاستاعى قىزدارعا سالىنادى، التى ايلىق ارالىقپەن پروتسەدۋرا قايتالانادى. اقمولا وبلىسىندا ناۋقان ءار اۋداندا باستالدى، ءتورت ۆالەنتتى «گارداسيل» ۆاكتسيناسىنىڭ ءبىرىنشى پارتياسى الىندى. بارلىعى 6 مىڭنان استام دوزا، كەيىنگى جەتكىزۋ كەستەسى بەكىتىلدى. ون ءتورت جاسار قىزداردى قامتيتىن ۆاكتسيناتسيا جۇرگىزۋ ماسەلەسى قاراستىرىلۋدا»، - دەدى ايناگۇل مۋسينا.
اتا-انالار ۆاكتسيناتسياعا تۇسىنىستىكپەن قاراۋدا. ۆاكتسيناتسيا الدىندا، كەز كەلگەن باسقا ەگۋ الدىنداعى سياقتى، ىقتيمال قارسى كورسەتىلىمدەردى انىقتاۋ ءۇشىن دارىگەرلىك تەكسەرۋ جۇرگىزىلەدى. وسىدان كەيىن عانا ۆاكتسينا ەنگىزىلەدى.
جالپى، الەمنىڭ كوپتەگەن ەلدەرىندە ادام پاپيللوماۆيرۋسىنا قارسى ۆاكتسيناتسيا 2007 جىلدان باستاپ، دالىرەك ايتساق، 130-دان استام مەملەكەتتە ەنگىزىلدى. مىسالى، ەۋروپادا قىزدار عانا ەمەس، ۇلدار دا ۆاكتسيناتسيالانادى.
«2013 جىلى قازاقستاندا 7 مىڭعا جۋىق قىز ەگىلدى. بىردە ءبىر كەرى اسەرى تىركەلمەدى. رەپرودۋكتيۆتى جۇيەنىڭ بۇزىلۋىنا قاتىستى الاڭداۋشىلىق نەگىزسىز. ون ءبىر جىل بۇرىن ەگىلگەن قىزدار ءوسىپ، تۇرمىسقا شىقتى، بالالارى بار. ءبىز اتا-انالارمەن، پەداگوگتارمەن ءتۇسىندىرۋ جۇمىستارىن جۇرگىزىپ جاتىرمىز. اتا-انالار بالالارىن وسى قاۋىپتى اۋرۋدان وسىلاي عانا قورعاۋعا بولاتىندىعىن تۇسىنەدى. جاتىر موينى وبىرى ايەلدەردەگى ونكولوگيالىق اۋرۋلار اراسىندا ەكىنشى ورىندا. وتكەن جىلى اقمولا وبلىسىندا 136 جاڭا جاعداي انىقتالدى. سوندىقتان، ادام پاپيللوماۆيرۋسىنا قارسى ەكپە الۋ قاجەت ەكەنى ايتپاسا دا تۇسىنىكتى»، - دەپ تولىقتىردى اقمولا وبلىسىنىڭ باس سانيتارلىق دارىگەرى.
ۆاكتسيناتسيا جانە يممۋنوپروفيلاكتيكا بويىنشا بارلىق قاجەتتى اقپاراتتى egu.kz سايتتىنان، الەۋمەتتىك جەلىلەردەگى سانيتارلىق-ەپيدەميولوگيالىق باقىلاۋ دەپارتامەنتىنىڭ رەسمي پاراقشاسىنان الۋعا بولادى. سونداي-اق دەپارتامەنتتىڭ سايتىندا «سۇراق-جاۋاپ» ايدارى بار، وندا ماماندار ۆاكتسيناتسياعا قاتىستى كەز كەلگەن سۇراققا جاۋاپ بەرەدى.
