اتىراۋ قالاسىنىڭ تۇرعىنى باتۋمي قالاسىندا ادەپسىز قىلىق جاسادى. قازاقستاندىق تۋريست ايگىلى بوتانيكالىق باققا بارعان كەزدە سيرەك كەزدەسەتىن بامبۋك اعاشىنا زاقىم كەلتىرگەن، دەپ حابارلايدى “ادىرنا” ۇلتتىق پورتالى.
تۋريست ايەل باقتاعى وسىمدىكتىڭ ساباعىنا «ءوزىن ەستەلىك رەتىندە قالدىرۋدى» ويلاپ، عاشىقتاردىڭ ەسىمدەرىن ويىپ جازىپ كەتكەن. بۇل ارەكەت باققا كەلۋشىلەردىڭ نارازىلىعىن تۋدىردى.
«مەن ەسكەرتۋ جاسادىم، بىراق كورىپ وتىرعاندارىڭىزداي، قىز ەش الاڭداماي، ارەكەتىن جالعاستىرىپ جاتىر»، — دەپ جازدى وقيعانىڭ كۋاگەرى بولعان گرۋزين تۇرعىنى الەۋمەتتىك جەلىدە.
تۋريست ايەلدىڭ بۇل ارەكەتىنە باق اكىمشىلىگى دە رەنىش ءبىلدىردى. اكىمشىلىك باتۋميدەگى بوتانيكالىق باقتىڭ تەك تانىمال تۋريستىك ورىن عانا ەمەس، سيرەك كەزدەسەتىن وسىمدىكتەردى ساقتاۋ ورنى ەكەنىن ەسكە سالدى.
