اقمولالىق 200-دەن استام بولاشاق قولدانبالى باكالاۆرلار رەسپۋبليكاداعى ەلەكتروموبيلدەردى دياگنوستيكالاۋ جانە ولارعا قىزمەت كورسەتۋ جونىندەگى ءبىرىنشى ترەنينگ-ورتالىقتا بىلىكتىلىگىن ارتتىرادى.
كوكشەتاۋ قالاسىنىڭ جوعارى تەحنيكالىق كوللەدجى - وڭىردەگى سۇرانىسقا يە تەحنيكالىق ماماندىقتار بويىنشا كادرلار دايارلاۋدى جۇزەگە اسىراتىن جەتەكشى تەحنيكالىق جانە كاسىپتىك ءبىلىم بەرۋ ۇيىمدارىنىڭ ءبىرى.
كوللەدج باسشىلىعى ارقاشان بىرنەشە قادام الدا ويلايدى، وعان دالەل رەتىندە ەلەكتروموبيلدەر مەن گيبريدتى اۆتوموبيلدەردى دياگنوستيكالاۋ جانە ولارعا قىزمەت كورسەتۋ بويىنشا ەلىمىزدەگى بىرەگەي ترەنينگ-ورتالىقتىڭ اشىلۋى.
ترەنينگ-ورتالىق زاماناۋي تەحنولوگيالار مەن ۋاقىت شىندىعىنا سايكەس مامانداردى دايارلاۋ ماقساتىندا قۇرىلعان.
«مەن مۇندا وقىعاندى ۇناتامىن، وتە كەرەمەت سەزىمدەمىن. ەلەكتروموبيل مەن كادىمگى اۆتوموبيلدە ۇلكەن ايىرماشىلىق بار. جۇمىس ىستەپ تۇرعان ەلەكتروموبيلدەر قورشاعان ورتاعا زيان تيگىزبەيدى، بۇل وتە ماڭىزدى. بولاشاقتا ءوزىمدى ۇلكەن سۇرانىسقا يە جوعارى بىلىكتى مامان رەتىندە كورەمىن»، - دەيدى كوللەدجدىڭ 4 كۋرس ستۋدەنتى دامير حايرۋللوۆ.
ترەنينگ-ورتالىقتىڭ اشىلۋى - وڭتۇستىك كورەيانىڭ «WOOSONG» ءبىلىم بەرۋ قورىمەن مەموراندۋم شەڭبەرىندە جوعارى تەحنيكالىق كوللەدج بەن اقمولا وبلىسى اكىمدىگىنىڭ كوپ جىلعى ىنتىماقتاستىعىنىڭ ناتيجەسى.
«وڭتۇستىك كورەيانىڭ «WOOSONG» ءبىلىم بەرۋ قورىنىڭ ارقاسىندا اشىلعان ەلەكتروموبيلدەر زەرتحاناسىندا قازىر 200-دەن استام ستۋدەنت وقيدى. كوللەدج وقىتۋشىلارى الدىن الا كۋرستاردان ءوتىپ، ستۋدەنتتەرگە ساباق بەرۋ قۇقىعىنا يە بولدى. بۇل وقۋ بلوكتارى «اۆتوموبيل كولىگىنە تەحنيكالىق قىزمەت كورسەتۋ، جوندەۋ جانە پايدالانۋ» ماماندىقتارى بويىنشا، سونىڭ ىشىندە وسى ماماندىق بويىنشا قولدانبالى باكالاۆريات، «ماشينا جاساۋ» جانە ءبىزدىڭ كوللەدجدىڭ باسقا دا ماماندىقتارى بويىنشا وتەدى»، - دەپ ءبولىستى وقۋ ورنىنىڭ ارنايى پاندەرىنىڭ وقىتۋشىسى ۆيتالي ساۋليدي.
زاماناۋي ترەنينگ - ورتالىق كولىكتىڭ ەكولوگيالىق تازا تۇرىنە قىزمەت كورسەتۋ بويىنشا دامۋشى سالا ءۇشىن بىلىكتى كادرلار دايارلاۋعا مۇمكىندىك بەرەتىن قاجەتتى جوعارى تەحنولوگيالىق جابدىقتارمەن جابدىقتالعان.
ايتا كەتەيىك، كوللەدجدە قازىرگى كەزدە 2500 ارتىق ستۋدەنت ءبىلىم الۋدا، اۋىل شارۋاشىلىعى، ماشينا جاساۋ جانە قۇرىلىس سالالارىنا ارنالعان قۇرامداس بولىكتەر، توسەنىشتەر مەن تروتۋار پليتكالارى، كورپۋستىق جانە جۇمساق جيھازدار ءوندىرىسى دە جولعا قويىلعان. كوللەدج ستۋدەنتتەرى وبلىس كاسىپورىندارىنىڭ تاپسىرىسى بويىنشا 200-دەن استام ءونىم شىعارادى.
