Aqmolalyq 200-den astam bolashaq qoldanbaly bakalavrlar respýblıkadaǵy elektromobılderdi dıagnostıkalaý jáne olarǵa qyzmet kórsetý jónindegi birinshi trenıng-ortalyqta biliktiligin arttyrady.
Kókshetaý qalasynyń joǵary tehnıkalyq kolledji - óńirdegi suranysqa ıe tehnıkalyq mamandyqtar boıynsha kadrlar daıarlaýdy júzege asyratyn jetekshi tehnıkalyq jáne kásiptik bilim berý uıymdarynyń biri.
Kolledj basshylyǵy árqashan birneshe qadam alda oılaıdy, oǵan dálel retinde elektromobılder men gıbrıdti avtomobılderdi dıagnostıkalaý jáne olarǵa qyzmet kórsetý boıynsha elimizdegi biregeı trenıng-ortalyqtyń ashylýy.
Trenıng-ortalyq zamanaýı tehnologııalar men ýaqyt shyndyǵyna sáıkes mamandardy daıarlaý maqsatynda qurylǵan.
«Men munda oqyǵandy unatamyn, óte keremet sezimdemin. Elektromobıl men kádimgi avtomobılde úlken aıyrmashylyq bar. Jumys istep turǵan elektromobılder qorshaǵan ortaǵa zııan tıgizbeıdi, bul óte mańyzdy. Bolashaqta ózimdi úlken suranysqa ıe joǵary bilikti maman retinde kóremin», - deıdi kolledjdiń 4 kýrs stýdenti Damır Haırýllov.
Trenıng-ortalyqtyń ashylýy - Ońtústik Koreıanyń «WOOSONG» bilim berý qorymen memorandým sheńberinde joǵary tehnıkalyq kolledj ben Aqmola oblysy ákimdiginiń kóp jylǵy yntymaqtastyǵynyń nátıjesi.
«Ońtústik Koreıanyń «WOOSONG» bilim berý qorynyń arqasynda ashylǵan elektromobılder zerthanasynda qazir 200-den astam stýdent oqıdy. Kolledj oqytýshylary aldyn ala kýrstardan ótip, stýdentterge sabaq berý quqyǵyna ıe boldy. Bul oqý bloktary «Avtomobıl kóligine tehnıkalyq qyzmet kórsetý, jóndeý jáne paıdalaný» mamandyqtary boıynsha, sonyń ishinde osy mamandyq boıynsha qoldanbaly bakalavrıat, «Mashına jasaý» jáne bizdiń kolledjdiń basqa da mamandyqtary boıynsha ótedi», - dep bólisti oqý ornynyń arnaıy pánderiniń oqytýshysy Vıtalıı Saýlıdı.
Zamanaýı trenıng - ortalyq kóliktiń ekologııalyq taza túrine qyzmet kórsetý boıynsha damýshy sala úshin bilikti kadrlar daıarlaýǵa múmkindik beretin qajetti joǵary tehnologııalyq jabdyqtarmen jabdyqtalǵan.
Aıta keteıik, kolledjde qazirgi kezde 2500 artyq stýdent bilim alýda, aýyl sharýashylyǵy, mashına jasaý jáne qurylys salalaryna arnalǵan quramdas bólikter, tósenishter men trotýar plıtkalary, korpýstyq jáne jumsaq jıhazdar óndirisi de jolǵa qoıylǵan. Kolledj stýdentteri oblys kásiporyndarynyń tapsyrysy boıynsha 200-den astam ónim shyǵarady.
