تاۋەلسىزدىكتىڭ تۇنىق اۋاسىمەن تىنىس العان جىلدارى باتىس قازاقستان وبلىسىنا قاراستى ءبورلى اۋدانىنىڭ ەكونوميكاسى دا ءوسىپ-وركەندەۋ جولىنا قادام باستى. مەملەكەت باسشىسىنىڭ جىل سايىنعى قازاقستان حالقىنا ارنالعان جولداۋلارى بولاشاعىمىزدىڭ باعدارشامىنا اينالدى. اتقارىلار اۋقىمدى ىستەرگە تىڭ سەرپىن بەردى. ءاربىر سالاعا ارنالعان مەملەكەتتىك باعدارلامالار اياسىندا حالىق مۇددەسى، يگىلىگى ءۇشىن ورەلى ىستەر كەڭگە قانات جايدى. العا قويعان مىندەتتەردى جۇزەگە اسىرۋ باعىتىندا بيىلعى جىل باسىنان بەرى ناتيجەلى ىستەردىڭ جۇزەگە اسقانىنا ەل كۋا.
بۇگىندە اۋداندا 19 178 وتباسى بار، ادام سانى 57 868 قۇرايدى.
ءبورلى اۋدانىنىڭ اكىمى ەركەبۇلان يحسانوۆتىڭ ايتۋىنشا، اعىمداعى جىلدىڭ سەگىز ايىنىڭ قورىتىندىسى بويىنشا اۋدان بيۋدجەتى 14,7 ملرد تەڭگەنى قۇرادى. بۇگىنگى تاڭدا اۋداندا اۋماعىندا 91 بيۋدجەتتىك جوبا جۇزەگە اسۋدا.
اۋدان ەكونوميكاسىنا جەكە ينۆەستيتسيالار ءوسىمىنىڭ وڭ سەرپىنى بايقالۋدا. وتكەن جىلى 1,8 ملرد تەڭگەگە سەگىز جوبا اياقتالىپ، ىسكە قوسىلعان.
ءبورلى اۋدانى بويىنشا تىركەلگەن شاعىن جانە ورتا بيزنەس سۋبەكتىلەرىنىڭ سانى – 5136.
ءۇش ينۆەستيتسيالىق جوبا جۇزەگە اسۋدا
بۇگىندە اۋداندا اۋىلشارۋاشىلىق باعىتىندا 465 شارۋا قوجالىعى، 22 جاۋاپكەرشىلىگى شەكتەۋلى سەرىكتەستىك جانە 27 اۋىلشارۋاشىلىعى وندىرىستىك كووپەراتيۆى تىركەۋدە. جىل باسىنان باستاپ اۋىل شارۋاشىلىعىنىڭ ءونىمى 3 ملرد 270 ملن تەڭگەنى قۇرادى. ەگىستىك القابى 63 807 گەكتاردى قۇرايدى.
ءوڭىرىمىزدىڭ اگرووندىرىستىك كەشەنىن دامىتۋ ماقساتىندا الەۋمەتتىك ماڭىزى بار ءۇش ينۆەستيتسيالىق جوبا ىسكە اسىرىلۋ ساتىسىندا. ەركەبۇلان نۇرەتدينۇلىنىڭ مالىمەتىنشە، «دوستىق-قونىس» جشس ەتتى مال شارۋاشىلىعىن دامىتۋ باعىتىندا اسىل تۇقىمدى مالدى ءوسىرۋ جانە بورداقىلاۋ جونىندەگى اۋىل شارۋاشىلىعى كەشەنىن سالۋدا. جوبانىڭ قۋاتتىلىعى – 2 مىڭ باس. قۇرىلىس وتكەن جىلدارى باستالىپ، 2026 جىلى پايدالانۋعا بەرىلەدى دەپ جوسپارلانعان. ءوڭىرىمىزدىڭ اگرووندىرىستىك كەشەنىن دامىتۋ جوباسى اياسىندا «Amanat» شارۋا قوجالىعىنا 1 ملرد 64 ملن تەڭگە ارزانداتىلعان نەسيە ءبولىنىپ، اۋىلشارۋاشىلىق تەحنيكاسى، 80 گا. سۋارمالى ايماققا ارنالعان جاڭبىرلاتىپ سۋارۋ كەشەنى، ءسۇت فەرماسىنىڭ قاجەتتى جابدىقتارى ساتىپ الىنعان. سونداي-اق اعىمداعى جىلدىڭ اياعىنا دەيىن ۆەنگريا مەملەكەتىنەن گولشتين سۇرىپتى 408 باس اسىل تۇقىمدى مالىن ساتىپ الادى. بۇگىندە 630 باس سيىرعا ارنالعان ەكى قورا جانە سيىر ساۋ ورنى، ءسۇت بلوگى جانە ءسۇت سالقىنداتقىشتارى بار. «Amanat» شارۋا قوجالىعى 2025 جىلى قوسىمشا قۋاتتىلىعى 80 گا. جاڭبىرلاتىپ سۋارۋ كەشەنىن ساتىپ الۋدى جوسپارلاۋدا. ناتيجەسىندە، كۇنىنە 8800 ليتر ءسۇت ءوندىرۋ ارقىلى اۋدان جانە وبلىس تۇرعىندارىنا ساپالى ءونىم ۇسىناتىن بولادى.
«جارسۋات» جشس-نىڭ 950 گەكتار سۋارمالى جەرى بار، بۇگىنگى تاڭدا 222 گەكتارى يگەرىلىپ وتىر، ونىڭ ىشىندە 128 گەكتارعا كارتوپ، 84,5 گەكتارعا كوكونىس جانە 9,5 گەكتارعا باقشا داقىلدارى ەگىلگەن. 2025 جىلى ءۇش جاڭبىرلاتىپ سۋارۋ كەشەنىن ساتىپ الۋدى جوسپارلاپ وتىر. سۋارمالى القاپتى تولىق پايدالانۋ 2028 جىلعا جوسپارلانۋدا. بۇدان بولەك، 2025 جىلى سىيىمدىلىعى 12 مىڭ توننا كارتوپ جانە كوكونىس ساقتاۋعا ارنالعان قويما قۇرىلىسى جوسپارلانعان. سەرىكتەستىك 200 باسقا ارنالعان بورداقىلاۋ الاڭىن سالدى. وسى ماقساتتا شاعىن قۇراما جەم وندىرەتىن تسەح جابدىقتالدى.
680 ازاماتقا جەر تەلىمى بەرىلەدى
قازىرگى تاڭدا اۋدان بويىنشا 2783 ادام تۇرعىن ءۇي كەزەگىنە تىركەلگەن.
«نۇرلى جەر» باعدارلاماسى اياسىندا 10 شاعىناۋداندا 9 قاباتتى 198 پاتەرلى تۇرعىن ءۇيدىڭ قۇرىلىسى جۇزەگە اسۋدا. قۇرىلىس جۇمىستارىن اعىمداعى جىلدىڭ سوڭىنا دەيىن اياقتاپ، كەزەكتە تۇرعان ازاماتتارعا «وتباسى بانكى» ارقىلى بەرۋ كوزدەلىپ وتىر. باعدارلاما بويىنشا اقساي قالاسىنىڭ 10 شاعىناۋدانىندا 9 قاباتتى 126 پاتەرلى ەكى تۇرعىن ءۇيدىڭ قۇرىلىسى جالعاسۋدا. تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023-2029 جىلدارعا ارنالعان تۇجىرىمداماسى اياسىندا اۋىلدىق ەلدىمەكەندەرگە 132 تۇرعىن ءۇي ساتىپ الۋ جوسپارلانۋدا. اۋدان بويىنشا 15506 ادام جەر تەلىمىنىڭ تىزىمىندە تۇر. جەر كەزەگىندە تۇرعان ازاماتتار ءۇشىن ءبورلى اۋىلىندا جەكە تۇرعىن ءۇي قۇرىلىسىن دامىتۋعا ارنالعان، سۋمەن، گازبەن جانە ەلەكترمەنجابدىقتاۋدىڭ ينجەنەرلىك جەلىلەرىن سالۋ جوباسى ىسكە اسىرىلۋدا. قۇرىلىس نىسانىنىڭ اياقتالۋى 2025 جىلدىڭ I جارتىجىلدىعىنا جوسپارلانىپ وتىر. قۇرىلىس جۇمىستارى اياقتالعان سوڭ 680 ازاماتقا جەر تەلىمى بەرىلەتىن بولادى.
سونداي اق، اقساي قالاسى «جيلوي ماسسيۆ-2» پدپ-سى 800 جەر ۋچاسكەلەرىن سۋمەن جابدىقتاۋ جۇمىستارى اياقتالدى.ەندىگى كەزەكتە ەلەكتر جانە گازبەن قامتاماسىز ەتۋ جۇمىستارى بيىلعى جىلى اياقتالىپ، كەزەكتە تۇرعان ازاماتتارىمىز ءۇشىن جەر ۋچاسكەلەرىن ۇلەستىرىلەتىن بولادى.
– مەملەكەت باسشىسىنىڭ الدىمىزعا قويعان مىندەتتەرىنىڭ ءبىرى –تۇرعىنداردىڭ ءومىر ساپاسىن جاقسارتۋ جانە وعان قولايلى جاعداي جاساۋ بولىپ تابىلادى. بۇل باعىتتا بيىلعى جىلى بۋماكول جانە پريۋرال اۋىلدارىندا ەلەكتر جەلىلەرىن قايتا جاڭارتۋعا رەسپۋبليكالىق بيۋدجەتتەن قاراجات ءبولىنىپ، جۇمىستار جۇرگىزىلۋدە. اقسايداعى ەلەكتر جەلىسىنىڭ توزۋىن تومەندەتۋ ءۇشىن قالانىڭ وڭتۇستىك بولىگىندەگى شاعىناۋدانىندا جانە 7-شاعىناۋدان مەن 4-ءشى قۇرىلىسشى شاعىن اۋداندار اراسىنداعى ەلەكتر جەلىلەرىن قايتا جاڭارتۋ ءۇشىن جوبالىق سمەتالىق قۇجاتتاما جاساقتالىپ، مەملەكەتتىك ساراپتامانىڭ وڭ قورىتىندىسى الىندى. «بقو ءبورلى اۋدانى اقسۋ اۋىلدىق وكرۋگىنىڭ اقسۋ جانە جاڭاقونىس اۋىلدارىنداعى ەلەكتر جەلىلەرىن قايتا جاڭارتۋ» نىسانى بويىنشا جوبالىق سمەتالىق قۇجاتتاماسى جاساقتالۋدا. ساراپتامانىڭ وڭ قورىتىندىسىن الۋ وسى ايعا جوسپارلاندى. قالانىڭ سۋ قۇبىرى جەلىلەرىنىڭ توزۋىنا بايلانىستى ءجيى اپاتتى جاعدايلار ورىن الىپ، تۇرعىندار ءۇشىن قولايسىزدىقتار تۋدىرۋدا، – دەگەن اۋدان باسشىسى اتالعان ماسەلەنى شەشۋ ماقساتىندا اقساي قالاسىنىڭ 4,5 جانە 10-شى شاعىن اۋداندانىنداعى سۋ قۇبىرلارىن قايتا جاڭعىرتۋ جۇمىستارى جۇرگىزىلۋدە ەكەنىن، اتالعان جوبالار قازان ايىنىڭ سوڭىندا اياقتالاتىنىن جەتكىزدى.
كاۋسار بايعاليەۆا
