قىرعىزستاننىڭ «كوكبورى» فەدەراتسياسى قازاقستانعا قارىمتا ويىن وتكىزۋدى ۇسىنعان ەدى، دەپ حابارلايدى "ادىرنا" ءتىلشىسى.
قىرعىز كوكپارشىلارى ىستىقكول جاعاسىندا 1 قاراشادا قارىمتا ماتچ وتكىزۋدى ۇسىنىپ، قازاقستان قۇراماسىن شاقىرعان. الايدا، قازاقستاننىڭ كوكپار قۇراماسى بۇل ماتچقا قاتىسا المايتىنىن مالىمدەدى.
قازاقستان فەدەراتسياسىنىڭ مالىمەتىنشە ول ۋاقىتتا كوكپارشىلار باسقا جارىسقا قاتىسادى.
«ءبىزدىڭ كوكپارشىلار ىستىقكول جاعاسىنداعى كەلىسىم كۋبوگىنا قاتىسا المايدى، ويتكەنى كورسەتىلگەن كۇندەردە باسقا ماڭىزدى جارىستار جوسپارلانعان. قازىرگى ۋاقىتتا كوكپارشىلار سول ويىندارعا دايىندالىپ جاتىر»، – دەلىنگەن حابارلامادا.
ەسكە سالا كەتەيىك، 12 قىركۇيەك كۇنى استانادا كوكپاردان قازاقستان جانە قىرعىزستان قۇرامالارى كوشپەندىلەر ويىندارىنىڭ اقتىق كەزەڭىندە جولدارى ءتۇيىسىپ، قازاق كوكپارشىلارى 5:4 ەسەبىمەن ۇتقان بولاتىن.
فينالدىق ويىن بارىسىندا ەكى ەلدىڭ كوكپارشىلارى اراسىندا قاقتىعىس ورىن العان. ارتىنشا ەكىنشى ورىن العان قىرعىز سپورتشىلارى ماراپاتتاۋ ءراسىمى اياقتالماي جاتىپ، تريبۋنادان كەتىپ قالعان.
