باتىس قازاقستان وبلىسىندا «قالادان اۋىلعا» باعدارلاماسى جۇزەگە اسۋدا. باعدارلاما مەملەكەت باسشىسىنىڭ اۋىلدىق اۋماقتاردى دامىتۋدىڭ 2023-2027 جىلدارعا ارنالعان تۇجىرىمداماسى اياسىندا ىسكە قوسىلعان.
جوبانىڭ ماقساتى –قارا شاڭىراقتىڭ ءتۇتىنىن قايتا جاڭعىرتۋ، اۋىلدارىمىزدى يەسىز قالدىرماۋ جانە اۋىلدى گۇلدەندىرۋ.
2024 جىلدىڭ باسىنان بەرى بقو-نىڭ اۋىلدارىنا «قالادان اۋىلعا» باعدارلاماسى بويىنشا 66 وتباسى، ياعني 322 ادام كوشىپ كەلگەن.
اۋىلعا كەلگەن تۇرعىندار باسپانالى بولىپ، جۇمىسپەن قامتىلۋدا. ايات سيسەنوۆ ەسىمدى ازامات ءبىرتالاي جىل الماتىدا پاتەر جالداپ تۇرعان. تابىسىنىڭ ءبارى پاتەرىنەن اسپايتىن. ەندى ول كازتالوۆ اۋدانى جاڭاتاڭ اۋىلىنا قالادان اۋىلعا باعدارلاماسى ارقىلى كوشىپ، تۇرعىن ۇيمەن قامتاماسىز ەتىلدى. جۇمىسقا دا ورنالاستى.
«قالادان اۋىلعا» باعدارلاماسى ءۇشىن العىس ايتامىز. قالادا جۇرگەنىمىزدە جۇمىس بىردە تابا الماي قيىندىق كوردىك. ەندى مىنە وسى قالادان اۋىلعا باعدارلاماسىنىڭ ارقاسىندا اۋىلعا قونىس اۋدارىپ، ءۇيلى بولدىق.. پرەزيدەنتكە راقمەت، حالىققا وسىنداي جاعداي جاساپ جاتقانىنا»-دەدى ول.
بقو اكىمى ناريمان تورەعاليەۆ «قالادان اۋىلعا» باعدارلاماسى ارقىلى اۋىلعا كوشىپ بارامىن دەگەن ازاماتتارعا مەملەكەت تاراپىنان قولداۋ شارالارى جالعاساتىنىن ايتتى.
2024 جىلى اۋىلداردا ءۇي كەزەگىندە تۇرعان ازاماتتارعا سالىنىپ جاتقان 758 ءۇيدىڭ 312-ءسى تابىستالدى. قالعان ۇيلەر جىل سوڭىنا دەيىن بەرىلەدى.
