كوكشەتاۋ قالاسىندا جازعى وليمپيادا جانە پاراليمپيادا ويىندارىنان ورالعان اقمولا سپورتشىلارىن قۇرمەتتەۋگە ارنالعان سالتاناتتى ءىس-شارا ءوتتى.
جينالعاندار الدىندا ءسوز سويلەگەن اقمولا وبلىسىنىڭ اكىمى بيىلعى جىلى جازعى سپورت تۇرلەرىنەن پاراليمپيادالىق ويىندارعا قاتىسۋ ءبىزدىڭ وبلىسىمىز ءۇشىن تاريحي وقيعا بولعانىن اتاپ ءوتتى.
«سىزدەردىڭ جەڭىستەرىڭىز - باتىلدىق پەن شەكسىز ادامي مۇمكىندىكتەردىڭ ايقىن كورىنىسى. ول كوپ جىلعى ەڭبەكتىڭ، ەرىك-جىگەردىڭ جانە ومىرلىك قيىندىقتاردان باس تارتپاۋ قابىلەتىنىڭ ناتيجەسى. مەملەكەت وسى ماڭىزدى سالاعا جان-جاقتى قولداۋ كورسەتەدى. ەل پرەزيدەنتى قاسىم-جومارت توقاەۆ وليمپيادا ويىندارىنا قاتىسۋشىلارمەن كەزدەسۋدە سپورت سالاسىنداعى نەگىزگى مىندەتتەر مەن باسىمدىقتاردى تۇجىرىمدادى. بولاشاقتا ءبىز العا قويعان ماقساتتارعا جەتۋ ءۇشىن جۇمىس ىستەيتىن بولامىز. قازاقستاندىق سپورتتىڭ بولاشاعى سىزدەردىڭ ارقايسىلارىڭىزعا بايلانىستى»، - دەدى م.احمەتجانوۆ.
ءىس-شارا بارىسىندا پاراليمپيادانىڭ ەكى دۇركىن چەمپيونى داۆيد دەگتيارەۆكە 3 بولمەلى پاتەرگە جانە اقشالاي سىياقىعا، كۇمىس مەدال يەگەرى ەركىن عابباسوۆقا 2 بولمەلى پاتەرگە جانە اقشالاي سىياقىعا سەرتيفيكاتتار تابىس ەتىلدى. سونداي-اق، جاتتىقتىرۋشىلار يۋري كولەسنيكوۆ پەن مۋسليم سارسەمبەكوۆكە اقشالاي سەرتيفيكاتتار بەرىلدى.
ءوز كەزەگىندە سپورتشىلار كورسەتىلگەن قولداۋعا العىس ايتىپ، جوعارى جەتىستىكتەرگە جەتۋگە ۋادە بەردى.
ەستەرىڭىزگە سالا كەتەيىك، داۆيد دەگتيارەۆ 54 كەلىگە دەيىنگى ساناتتاعى پاۋەرليفتينگ بويىنشا پاريجدەگى 2024 جىلعى پاراليمپيادا ويىندارىنىڭ جەڭىمپازى اتاندى. ەركىن عابباسوۆ 10 مەتر قاشىقتىققا پنەۆماتيكالىق مىلتىقتان وق اتۋدان جارىستىڭ فينالىندا كۇمىس مەدال جەڭىپ الدى.
