كۇزەتشىنى ساباپ ءولتىرىپ، ارتىنشا كولىكپەن بىرنەشە رەت باسقان ەر ادامعا قاتىستى تەرگەۋ توقتاتىلدى، دەپ حابارلايدى “ادىرنا” ۇلتتىق پورتالى.
29 ناۋرىز كۇنى ەكس-دەپۋتاتتىڭ ۇلى “مەركۋر تاۋن” تۇرعىن ءۇي كەشەنىنىڭ كۇزەتشىسىن ءولىمشى ەتىپ ساباپ، كولىكپەن بىرنەشە رەت باسىپ كەتكەن دەگەن اقپارات تاراعان بولاتىن.
Tengrinews.kz مالىمەتىنشە، الماتى قالاسىنىڭ پروكۋراتۋراسى تەرگەۋ جۇمىستارىنىڭ اياقتالعانىن حابارلاعان.
ۆەدومستۆونىڭ مالىمەتىنشە، كىسى ءولتىرۋ دەرەگى بويىنشا سوتقا دەيىنگى تەرگەۋ 29 ناۋرىز كۇنى باستالعان. بىراق ءىس توقتاتىلعان.
“قازىرگى ۋاقىتتا قىلمىستىق قۋدالاۋ ورگانى قىلمىستىق ءىس جۇرگىزۋ كودەكسىنىڭ 45-بابىنىڭ 7-بولىگىنىڭ 4-تارماعى نەگىزىندە سوتقا دەيىنگى تەرگەپ-تەكسەرۋدى توقتاتۋ تۋرالى شەشىم قابىلدادى”، – دەلىنگەن حابارلامادا.
كورسەتىلگەن باپقا سايكەس، سوتقا دەيىنگى تەرگەپ-تەكسەرۋ مەرزىمى زاڭدا بەلگىلەنگەن تارتىپپەن كۋالاندىرىلعان كۇدىكتىنىڭ، ايىپتالۋشىنىڭ پسيحيكاسىنىڭ ۋاقىتشا بۇزىلۋى نەمەسە وزگە دە اۋىر سىرقاتى بولعان جاعدايدا توقتاتىلادى.
ايتا كەتەيىك، ناۋرىزدا كۇزەتشى قىزمەتىن اتقانعان نۇربول قايىپباەۆ سول ءتۇنى اشۋعا بۋلىققان ەر ادامدى اتا-اناسىنىڭ ءوتىنىشى بويىنشا كوشەگە شىعارماعان بولۋى مۇمكىن. ەر ادام ونى ساباپ، ارتىنشا كولىگىمەن جانشىپ وتكەن.
مارقۇم نۇربول قايىپباەۆ وتباسىنىڭ جالعىز اسىرۋشىسى بولعان. اتالعان تۇرعىن ءۇي كەشەنىندە ول ەكى جىلدان بەرى 165 مىڭ تەڭگە ايلىققا جۇمىس ىستەپ كەلگەنى دە بەلگىلى بولدى.
