Kúzetshini sabap óltirip, artynsha kólikpen birneshe ret basqan er adamǵa qatysty tergeý toqtatyldy, dep habarlaıdy “Adyrna” ulttyq portaly.
29 naýryz kúni eks-depýtattyń uly “Merkýr Taýn” turǵyn úı kesheniniń kúzetshisin ólimshi etip sabap, kólikpen birneshe ret basyp ketken degen aqparat taraǵan bolatyn.
Tengrinews.kz málimetinshe, Almaty qalasynyń prokýratýrasy tergeý jumystarynyń aıaqtalǵanyn habarlaǵan.
Vedomstvonyń málimetinshe, kisi óltirý deregi boıynsha sotqa deıingi tergeý 29 naýryz kúni bastalǵan. Biraq is toqtatylǵan.
“Qazirgi ýaqytta qylmystyq qýdalaý organy Qylmystyq is júrgizý kodeksiniń 45-babynyń 7-bóliginiń 4-tarmaǵy negizinde sotqa deıingi tergep-tekserýdi toqtatý týraly sheshim qabyldady”, – delingen habarlamada.
Kórsetilgen bapqa sáıkes, sotqa deıingi tergep-tekserý merzimi zańda belgilengen tártippen kýálandyrylǵan kúdiktiniń, aıyptalýshynyń psıhıkasynyń ýaqytsha buzylýy nemese ózge de aýyr syrqaty bolǵan jaǵdaıda toqtatylady.
Aıta keteıik, naýryzda kúzetshi qyzmetin atqanǵan Nurbol Qaıypbaev sol túni ashýǵa býlyqqan er adamdy ata-anasynyń ótinishi boıynsha kóshege shyǵarmaǵan bolýy múmkin. Er adam ony sabap, artynsha kóligimen janshyp ótken.
Marqum Nurbol Qaıypbaev otbasynyń jalǵyz asyrýshysy bolǵan. Atalǵan turǵyn úı kesheninde ol eki jyldan beri 165 myń teńge aılyqqa jumys istep kelgeni de belgili boldy.
