قاراعاندى وبلىسىنىڭ تۇرعىندارى "تازا قازاقستان" رەسپۋبليكالىق ەكولوگيالىق اكتسياسىن قولداپ، شاراعا بەلسەندى تۇردە اتسالىسىپ جاتىر. ونىنشى قىركۇيەكتە ساران جاستارى بوگەتتىڭ جانىنداعى سۋ قويماسىنىڭ جاعالاۋىن قوقىستان تازارتتى.
"جاستار تازا قازاقستان ءۇشىن!" ەكواكتسياسىنا 100 قالا تۇرعىنى قاتىستى.
– بيىل ءبىزدىڭ سۇيىكتى قالامىزعا 70 جىل تولادى. ءبىز، جاستار، ساراندى ودان دا تازا جانە ادەمى ەتكىمىز كەلەدى. قالا مەن ەلدىڭ بولاشاعى ءۇشىن جاۋاپكەرشىلىكتى ءوز موينىمىزعا الۋعا دايىنبىز. ءبىز ۇنەمى ەكواكتسيالارعا قاتىسامىز. جاز بويى "جاسىل ەل" ەڭبەك جاساقتارى جۇمىس ىستەدى. بارشانى قورشاعان ورتانىڭ تازالىعىن ساقتاۋعا نەمقۇرايلى قاراماۋعا شاقىرامىز. بولاشاقتا ەكولوگيانىڭ جاقسى بولۋى بىزگە بايلانىستى، – دەيدى ساران جاستار رەسۋرستىق ورتالىعىنىڭ باسشىسى ءساندى اقانوۆا.
ءساۋىر ايىنىڭ باسىندا مەملەكەت باسشىسىنىڭ باستاماسىمەن "تازا قازاقستان" رەسپۋبليكالىق اكتسياسىن قازاقستاندىقتار ءبىر اۋىزدان قولدادى. وسىلايشا، ساراندا بۇل شاراعا 360 ۇجىم، 12 مىڭنان استام تۇرعىن قاتىستى. 14 مىڭ توننا قالدىق شىعارىلدى. ساياباقتار مەن گۇلزارلار قوقىستان تازارتىلدى، ءتۇرلى اعاشتاردىڭ 3 مىڭنان استام كوشەتتەرى ەگىلدى، تاريحي جانە مادەني ەسكەرتكىشتەردىڭ ماڭى جينالدى.
ايماقتا ەكولوگيالىق اكتسيالار ودان ءارى جالعاسادى. مىندەت – وبلىستىڭ ءار بۇرىشىن قامتۋ، قالالار مەن اۋىلداردى تازا ءارى جايلى ەتۋ.
